AU SEGA tale ni tubu niu sa yabaki ciwa. E yaco qori ena 34 na yabaki sa oti mai Côte d’Ivoire. Ena gauna mada ga qo e tolu ga na fiti na kequ balavu (1 na mita). Ni sa laurai levu na kequ ituvaki, rau uqeti au sara na noqu itubutubu meu cakacaka vakaukaua meu kua kina ni kauaitaka na kequ irairai. Au mani cakava e dua na teveli ni volitaki vuata ena mata ni neitou vale, au raica me savasava tu ga, qori na ka e dreti ira mai na dauvolivoli.

Noqu cakacaka vakaukaua e sega ni veisautaka e dua na ka. Au se lekaleka tu ga, qai so na ka e dredre vei au me vaka na cere ni vata ena sitoa. Vaka me buli kece ga na ka me baleti ira na tamata era balavu cake vei au. Dua na ka na noqu lomalomani au, mai veisau qori niu sa yabaki 14.

Dua na siga rau mai voli vuata e rua na marama iVakadinadina i Jiova, rau vakavulici au sara ena iVolatabu. Au sa qai mai kila ni bibi noqu kilai Jiova kei na nona inaki, sega ni kequ ituvaki. E vinaka sara ga vei au qori. Au dau taleitaka na Same 73:28. E tukuni ena itekitekivu ni tikinivolatabu ya: “E vinaka noqu toro voleka vua na Kalou.”

E vakasauri ga na neitou toki e Burkina Faso, mai veisau tale ga kina vakalevu na noqu bula. Sa matau vei ira na tiko volekati keitou mai Côte d’Ivoire mera raici au niu duri tu ena yasa ni teveli ni volitaki vuata. Ia na vanua keitou toki kina qo era raici au meu vulagi qai duatani, ra qai dau wadravi au. Au sa qai dau tu ga e vale me vakamacawa. Qori na gauna au nanuma kina ni vinaka meu toro voleka vei Jiova. Au volavola sara ina Valenivolavola ni Tabana ni iVakadinadina i Jiova. Au taleitaka dina na tacida e mai sikovi au—o Nani e dua na daukaulotu ni gole mai ena nona motopai lailai.

E dau sisisi na gaunisala nukunuku ena neitou yasa ni vale. Ni tau na uca e soso. Sa dau lutu vakavica o Nani ni gole mai me keirau vuli, ia e sega ni vakayalolailaitaki koya qori. E sureti au sara me keirau dau lakovata ena soqoni. Ena gauna qo meu sa na biubiu mai vale meu qai vosota nodra wadravi au na tamata. Kena ikuri sa na bibi na motopai lailai niu na vodo tale ga kina, sa dredre tu mada ga na vakauta. Ia au makutu ga niu nanuma tale na ikarua ni yatuvosa ena tikinivolatabu au  dau taleitaka ni kaya: “Au sa vakaruru ga vei Jiova na Turaga Cecere Duadua.”

So na gauna keirau dau lutu kei Nani, e sega ni dua na ka qo ni keirau vinakata ga me keirau gole ina soqoni. Era matadredredre na mataveitacini ena Vale ni Soqoni ni vakatauvatani kei na noqu dau wadravi! Au papitaiso ni oti ga e ciwa na vula.

E tukuni ena ikatolu ni yatuvosa ena tikinivolatabu au dau taleitaka: “Meu tukuna na nomuni cakacaka kece.” Au kila ni na dredre duadua na cakacaka vakaitalatala. Au sega ni guilecava rawa na imatai ni gauna au gole kina ena vunau, dua na ka nodra wadravi au na tamata. Era muri au ra qai vakamurimuria na noqu ilakolako. Dua na ka na kena mosi. Ia au sega ni soro koso niu dau nanuma tiko nira gadreva tale ga o ira qo mera bula ena Parataisi me vakataki au ga.

E rawarawa sara ni sa dua na noqu basikeli. E dau biligi au na noqu itokani ni keirau cabe, qai dau vodo ni keirau sirova na baba. A dredre na cakacaka vakaitalatala ena imatai ni gauna, ia qo dua na ka na noqu marautaka. Na levu ni noqu marau au bole sara kina meu painia tudei ena 1998.

E levu na noqu vuli iVolatabu, qai va vei ira qori era papitaiso. Kena ikuri ni lako tale ga mai na dina e dua na taciqu! Dau uqeti au dina niu rogoca na nodra toso na gonevuli. Ena dua na siga au taura e dua na ivola mai Côte d’Ivoire niu se qai bula vinaka tiko mai ena malaria. Keirau a vulivolatabu ena matanikatuba kei na dua na gonevuli ni univesiti mai Burkina Faso. Au qai soli koya me rau vuli kei na dua na tacida tagane. Mani toki o gonevuli e Côte d’Ivoire. Dua na ka na levu ni noqu marau ni sa dua na dautukutuku bera ni papitaiso!

Au na qaravi au vakacava? Eratou lomasoli na isoqosoqo e dau vukei ira na vakaleqai na yagodra me ratou vakavulici au ena culacula. Ni raica e dua na dauniveivakavulici na ivakarau ni noqu cakacaka, e kaya sara: “Keitou na vakavulici iko ena caka sovu.” Qori na ka au qai vulica. Au mani caka sovu ni savasava kei na sovu tale eso. Dua na ka nodra marautaka na tamata ra qai dau lai veitukuniyaka. Au dau kauta sara ga vei ira, niu vodo ena noqu motopai lailai.

E ka ni rarawa ena 2004 sa mosi mai vakalevu na noqu suitu, yaco sara meu cegu ena painia. Ia ena gauna qo au se solia tiko ga na noqu vinaka taucoko ena cakacaka vakaitalatala.

Era sa lai vakatotomuria tale ga na lewenivanua na ka au kilai kina, oya niu dau matadredredre. Cava tale meu rarawa tiko kina ni vinaka vei au na noqu dau volekata na noqu Kalou.​—Talanoataka o Sarah Maiga.