E TAROGI au o tinaqu: “Na cava o sega ni via sokaloutaki ira kina na noda qase? O kila tiko ni vukudra ga o bula kina? O sega ni vakavinavinakataki ira? Na cava mo biuta kina na ivakarau sa dau muri tiko mai? Nomu sega ni via rokovi ira noda qase e vaka mo tukuna tiko ni ka vakalialia na noda sokalou.” Oti qori e tagi o Na.

E sega ni dau vosa va qo o Na, ni a tuvanaka meu vulica na iVolatabu. E cakava qori me kua kina ni vuli. Au dau dokai koya, e dredre sara ga meu beca na nona ivakasala. Ia au cakava qo meu vakamarautaki Jiova. E rawa ga ena nona veitokoni.

Keitou lotu Buda me vakataki ira e levu e Japani. Ia ena loma ga ni rua na vula au vuli kei ira na iVakadinadina i Jiova, au vakadeitaka ni dina na iVolatabu. Au vulica ni tiko na Tamaqu vakalomalagi, au vinakata sara ga meu kilai koya. Keirau dau veitalanoataka kei Na na ka au vulica tiko. Au sa tekivu soqoni ena Sigatabu ena Vale ni Soqoni. Ni levu na ka dina au kila, au tukuna vei Na niu sa na sega ni vakaitavi ena lotu Buda. E veisau sara ga nona rai. E tukuna: “E ka vakamadua ni dua na lewenivuvale e sega ni lomani ira na noda qase.” E tukuna meu tinia na vuli iVolatabu kei na soqoni. Au sega ni tadra ni na tukuna qori o Na! Sa veisau sara ga o koya.

Au vulica ena Efeso wase 6, ni vinakata o Jiova meu talairawarawa vei rau noqu itubutubu. E totaki Na o Tamaqu. Au nanuma keu rogoci rau, rau na rogoci au tale ga, ena vinaka na neitou veimaliwai. E vinakati tale ga meu vakavakarau ena veitarogi e koronivuli. Au mani vakadonuya meu cakava na ka rau vinakata me tolu na vula. Ia au yalataka vei Jiova niu na tiko tale ena soqoni ni oti qori.

E rua na vuna e sega ni vinaka kina noqu vakatulewa. Kena imatai, au nanuma ni na dei na noqu vakatulewa ni oti e tolu na vula. Ia qo au sa waloloi vakayalo, sa tekivu meu yawaki Jiova. Kena ikarua, rau vakaukauataki au na noqu itubutubu meu biuta na ka kece e vauca na sokalou dina.

Niu tiko ena soqoni, au sotava e levu era tusaqati tale ga mai vale. Era vakadeitaka ni na vakaukauataki au o Jiova. (Maciu 10:34-37) Era uqeti au niu rawa ni vukei ratou noqu vuvale me ratou rawata na bula. Au mani masuti Jiova vagumatua, me vakavulici au meu dau nuitaki koya.

E duidui na sala au tusaqati kina e vale. Dau vakamasuti au o Na meu veisau. Levu na gauna au galu tu ga. Ia na gauna au vosa kina, keirau dau veiba ni keirau sa dui kauaitaka ga na neirau rai. Ena rairai vakamalumutaka na cudru keu kauaitaka tale ga nona rai kei na nona vakabauta. Rau solia vakalevu na cakacaka meu rawa ni tiko ga e vale. Ena so na gauna au sogo tu ga e tuba, se sega ni maroroi na kequ.

E qara veivuke o Na. E vakamasuti noqu qasenivuli, ia e sega ni kauai. E kauti au i valenicakacaka vei nona manidia me uqeti au ni tawayaga na lotu kece. Ni lesu i vale, e qiriti ira na wekai keitou me kerea nodra veivuke, dua na ka nona tagi. Au rarawa sara ga, ia ratou uqeti au na qase ni ivavakoso meu vakasamataki ira kece sa vunau tiko kina o Na.

Erau tukuna vei au noqu itubutubu meu lai vuli ena univesiti. Rau lalawataka me rau vakarautaka na ka erau nanuma ni vinaka duadua. Erau nuitaka niu na kunea e dua na cakacaka vinaka. E dau dredre me keitou veivosaki vinaka, au mani volavola vei rau meu vakamacalataka na noqu isausau. E vakarerei au o Ta ena levu ni nona katakata: “Ke o nanuma ni o rawa ni kunea e dua na  cakacaka, mo sa kunea e dua nimataka, ke sega mo biubiu.” Au masulaka qori vei Jiova. Ena cakacaka vakavunau ena siga tarava, rau kerei au e rua na tacida yalewa meu vakavulici luvedrau. E sega ni taleitaka o Ta na ka au cakava tiko, e galuvi au kina, e sega ni qai kauaitaki au. E tukuna o Na ni vinaka cake meu dua na dau basulawa, meu kua ga ni iVakadinadina i Jiova.

Au veinanuyaka ena so na gauna ke vinakata o Jiova me va sara qo noqu beca na ka rau vinakata noqu itubutubu. Ia e yaga na noqu dau masu kei na noqu vakasamataka vakatitobu na tikinivolatabu e vakamacalataka na loloma i Jiova, me donu kina noqu rai me baleta na veitusaqati, meu kila tale ga ni rau kauaitaki au na noqu itubutubu. E vukei au o Jiova me donu noqu rai, meu kila tale ga na ka meu cakava. Niu vakaitavi vakalevu ena cakacaka vakaitalatala, na levu tale ga ni noqu taleitaka. Mani noqu isausau na painia.

Era rogoca eso na tacida yalewa niu vinakata meu painia, era vakasalataki au meu wawa mada me malumu na ituvaki e vale. Au kerea na vuku, au vakekeli, au dikeva tale na vuna au via painia kina, au veitalanoa tale ga kei ira na tacida matua. Au vakadeitaka meu vakamarautaki Jiova. Kena ikuri, keu painia mada ga ena sega ga ni veisautaka nodrau rai na noqu itubutubu.

Au tekivu painia ena iotioti ni yabaki ni noqu vuli. Sega ni dede, au vinakata meu veiqaravi ena vanua e vinakati kina vakalevu na veivuke. Ia rau sega ni taleitaka noqu itubutubu meu biubiu e vale. Au mani wawa meu yabaki 20. Meu vakamarautaki Na, au kerea na valenivolavola ni tabana meu veiqaravi ena muaira kei Japani, nira tiko kina na wekai keitou.

Ena ilesilesi qori, au kalougata niu raica nodra papitaiso e levu au vakavulica. Au vulica na vosa vakavalagi meu vakarabailevutaka noqu veiqaravi. Keitou ivavakoso vata kei na rua na tacida tagane erau painia lavotaki. Dua na ka nodrau gugumatua me rau vukea e levu. Au mani vinakata meu painia lavotaki. Ena gauna qori, e vakarua nona tauvimate bibi o Na. Au mani lesu i vale meu qaravi koya. E kurabui sara ga, e veisau kina vakalailai nona rai.

Ni oti e vitu na yabaki, e volavola mai vei au o Atsushi, e dua vei rau na tacida tagane painia au vakamacalataka oti. E kaya ni vakasamataka tiko me vakawati, e via kila na kequ ituvaki kei na noqu rai. Au sega mada ga ni vakasamataka ni keirau a veidomoni ena gauna ya. Ni oti e dua na vula, au vola vua niu vinakata me keirau veikilai. Keirau raica ni levu na ka keirau taleitaka vata, keirau vinakata me keirau veiqaravi vakatabakidua, se mani ilesilesi cava ga e lesi vei keirau. Toso na gauna keirau vakamau sara. Dua na ka noqu marau ni tiko tale ga o Na, o Ta, kei na vica na wekai keitou!

Sega ni dede neirau painia tudei, e lesi o Atsushi me isosomi ni vakatawa ni tabacakacaka. E tarava mai e dua tale na veivakalougatataki. Keirau lesi me keirau painia lavotaki keirau qai veiqaravi vakaivakatawa ni tabacakacaka. Oti na imatai ni  neirau veisiko ena ivavakoso kece, eratou qiri mai na valenivolavola ni tabana me ratou taroga, ‘Drau vinakata mo drau veiqaravi vakaivakatawa ni tabacakacaka e Nepal?’

Au veinanuyaka ena vakacava na nodrau rai na noqu itubutubu niu sa na gole vakayawa. Au mani qiriti rau. E sauma mai o Ta, e kaya: “Qori na vanua vinaka.” Ena macawa yani e liu, dua nona itokani e solia vua na ivola me baleti Nepal, e nanuma kina ni vanua vinaka ni gade.

Ni keirau marautaka tiko neirau maliwai ira na itokani mai Nepal, keirau vakalougatataki tale. Sa wili tale ga o Bangladesh ena tabacakacaka keirau lesi kina, e voleka toka ia e levu na ka e duidui kina. E levu na yalava ni cakacaka. Oti e lima na yabaki keirau lesi tale i Japani, keirau marautaka tiko ena gauna qo na neirau veisiko.

Au vulica e levu sara na ka me baleti Jiova ena neirau veiqaravi e Japani, Nepal kei Bangladesh! E duidui na itovo kei na ka era kilai kina na vanua qo. Era talei kece na lewenivanua. Au vakadinadinataka nona kauaitaki ira yadua o Jiova, e ciqomi ira, vukei ira qai vakalougatataki ira.

E vakalougatataki au o Jiova niu mai kilai koya, na itavi e lesi au kina, kei na dua na watiqu vinaka. E vukei au meu vakatulewa vinaka, e vinaka na neirau veiwekani kei na noqu veimaliwai kei ratou e vale. Au vakavinavinakataki Jiova ni keirau sa veitokani vinaka tale kei Na. Au marautaka vakalevu niu veiyaloni kei na Kalou, au veiyaloni tale ga kei tinaqu.