Cava Meda Masu Kina ena Yaca i Jisu?

A DAU vakavuvulitaka o Jisu na masu. Ena nona gauna, era dau masu na iliuliu ni lotu vakaJiu ena “veitutu-ni-sala.” Cava na vuna? ‘Me raici ira kina na tamata.’ E macala nira vinakata mera qoroi ena nodra itutu vakalotu. E dau balavu nodra masu e levu ra qai weroka na ka era tukuna nira nanuma era na rogoci nira “vosa balabalavu.” (Maciu 6:​5-8) Kaya o Jisu ni tawayaga na ivalavala ni masu ya, e vinakata gona mera kila o ira na yalomalumalumu na ka mera kua ni cakava nira masu. Ia sega ni vakavulica ga o Jisu na ivakarau ni masu me kua ni muri.

Nida masu, e vakavulica o Jisu meda vakaraitaka nida vinakata me lagiti na yaca ni Kalou, yaco mai nona Matanitu, qai vakayacori na lomana. E vakavulica tale ga ni veiganiti meda kerea vua na Kalou na veika e tara noda bula. (Maciu 6:​9, 10, VV, 11-​13; Luke 11:​2-4) Me rogoci na masu, e kaya ena vosa vakatautauvata o Jisu ni vinaka na masu ena cikecike, vakabauta, kei na yalomalumalumu. (Luke 11:​5-13; 18:​1-14) E laurai na bibi ni ka e vakavulica ena ka e cakava.​—Maciu 14:23; Marika 1:​35.

Sega ni vakabekataki ni vakavuvuli ya i Jisu e  toroya cake na ivakatagedegede ni nodratou masu nona tisaipeli. Ena iotioti ni bogi ni nona bula e vuravura, a vakaraitaka kina vei ratou nona tisaipeli na lesoni bibi duadua me baleta na masu.

“Veisau Levu me Baleta na iVakarau ni Masu”

Ena iotioti ni bogi, a vakayaloqaqataki ratou tiko ga nona yapositolo yalodina o Jisu. Gauna veiganiti tale ga me vakatakila kina vei ratou e dua na ka vou. A kaya: “Oi au na sala, kei na vu-ni-dina, kei na vu-ni-bula; sa sega ni torovi Tamaqu walega e dua na tamata, e na vukuqu ga.” Mani yalataka: “Na ka kecega dou na kerea e na yacaqu, au na kitaka, me vakarokorokotaki na Tamaqu e na vuku ni Luvena. A ka kecega dou na kerea e na yacaqu, au na kitaka.” Ni bera ni cava nona vosa, e tomana: “Me yacova mai oqo, dou sega mada ni sa bau kerea e dua na ka e na yacaqu. Dou kerekere, ka na yaco vei kemudou, me ka taucoko kina na nomudou marau.”​—Joni 14:​6, 13, 14; 16:​24, VV.

Bibi dina na vosa oya. E vakamacalataka e dua na ivolavosa ni iVolatabu ni qo “e veisau levu me baleta na ivakarau ni masu.” Sega ni vakaibalebaletaka o Jisu meda masu vakadodonu vua. Ia e vakaraitaka na sala vou me torovi kina ena masu na Kalou o Jiova.

E dau rogoca na Kalou na nodra masu na nona tamata yalodina. (1 Samuela 1:​9-​19; Same 65:2) Tekivu na gauna e veiyalayalati kina na Kalou kei ira na Isireli, e dodonu mera kila o ira na vinakata me rogoci nodra masu ni o Isireli na matanitu e digitaka Kalou. Ena gauna i Solomoni dodonu tale ga mera kila ni ituvatuva ni Kalou na vakacaboisoro ena valenisoro. (Vakarua 9:​29; 2 Veigauna 6:​32, 33) Ia e sega ni tudei na ivakarau ni sokalou ya. Me vaka e kaya na yapositolo o Paula, ni Lawa a soli vei Isireli kei na vakacaboisoro ena valenisoro e “i yaloyalo wale ga ni veika dina era na muri mai, ka sega ni vatukana.” (Iperiu 10:​1, 2, VV) Na iyaloyalo qori ena sosomitaki ena dua na ka e dina. (Kolosa 2:​17, VV) Ena 33 S.K., na nona veiwekani e dua kei Jiova e sega ni vakatau ena nona muria na Lawa a soli vei Mosese. Ia e yavutaki ena nona talairawarawa vua e dusia na Lawa​—o Jisu Karisito.​—Joni 15:​14-​16; Kalatia 3:​24, 25.

 Na Yaca “sa Uasivi Cake e na Yaca Kecega”

A tekivuna o Jisu na yavu e uasivi cake me torovi kina o Jiova, vakavotuya ni o koya e itokani e vosayaco, e dolava tale ga na sala me rogoci qai saumi kina noda masu. Cava e rawa kina vei Jisu me cakava ya ena vukuda?

Nida ivalavala ca kece, sega ni dua na ka eda cakava se isoro eda cabora me bokoca na noda ivalavala ca se me vakadonui kina noda veiwekani kei na Kalou savasava o Jiova. (Roma 3:​20, 24; Iperiu 1:​3, 4) Ia e cabora o Jisu na nona bula savasava qai volia na kawatamata ivalavala ca me rawa nida veivinakati kei na Kalou. (Roma 5:​12, 18, 19) O ira kece era vinakata me bokoci nodra ivalavala ca me vakadonui ira o Jiova ra qai “doudou” na torovi koya ena masu, e dodonu mera vakabauta na isoro i Jisu kei na nodra masu ena yacana.​—Efeso 3:​11, 12.

Nida masu ena yaca i Jisu eda vakaraitaka tiko noda vakabauta na nona itavi e tolu ena kena vakayacori na inaki ni Kalou: (1) O koya “na Lami ni Kalou,” na nona isoro e vosoti kina na ivalavala ca. (2) Vakaturi koya o Jiova, gauna qo sa veiqaravi tiko vaka “bete levu” ena kena vakadewai na yaga ni isoro. (3) O koya ga “na sala” meda torovi Jiova kina ena masu.​—Joni 1:​29; 14:6; Iperiu 4:​14, 15.

E dokai o Jisu nida masu ena yacana. Qo e veiganiti, ni inaki i Jiova “me tekiduru . . . e na yaca i Jisu na duru vakaaduaga, . . .  me vakatusa talega na yame kecega ni sa Turaga ko Jisu Karisito, me vakarokorokotaki kina na Kalou na Tamada.” (Filipai 2:​10, 11) Koya gona e bibi noda masu ena yaca i Jisu ni lagiti kina o Jiova o koya a solia mai na Luvena ena vukuda.​—Joni 3:​16.

Meda kila e so tale na itavi bibi e vakacolati vei Jisu, e tu ena iVolatabu e so na icavuti kei na yaca e vakaibalebaletaki koya. Eda na kila kina na levu ni ka sa cakava oti, se cakava tiko, kei na kena ena qai cakava ena vukuda. (Raica na kato “iTavi Bibi i Jisu,” tabana e 12.) Io, a soli vei Jisu “na yaca sa uasivi cake e na yaca kecega.” * E soli tale ga vua na lewa  kece ga e lomalagi kei vuravura.​—Filipai 2:9; Maciu 28:18.

Sega ni Cavuti Wale Ga

Me rogoca o Jiova noda masu, eda na cabora ena yaca i Jisu. (Joni 14:​13, 14) Ia eda na sega ni cavuta ga “na yaca i Jisu” baleta ni sa matau vei keda. Cava na vuna?

Me kena ivakatautauvata. Kaya mada ni o taura e dua na ivola mai vua na daunibisinisi, me vaka ga na kena ivakarau e tini na ivola ena “nomuni dauveiqaravi.” O nanuma ni ya sara ga na ka e via tukuna na daunibisinisi, se vakayagataka ga na vosa e dau ciqomi raraba tu ni volai na ivola vakabisinisi? Na vakayagataki ni yaca i Jisu ni tini noda masu e dodonu me vakaibalebale, ena duidui mai na itinitini ni ivola vakabisinisi. Koya gona meda “masu tikoga” ena ‘yaloda taucoko,’ sega ena kena ivakarau sa matau vei keda.​—1 Cesalonaika 5:​17; Same 119:145.

Cava mo cakava mo kua kina ni cavuta wale tu ga “na yaca i Jisu”? Vakacava mo vakasamataka vakatitobu na itovo talei i Jisu? Vakasamataka na veika sa cakava oti kei na kena ena qai cakava ena vukumu. Vakavinavinaka qai vakacaucautaki Jiova ena masu ena sala uasivi e vakayagataki Luvena kina. Ni o cakava qori o na nuidei ena yalayala i Jisu: ‘Na ka kece ga o na kerea vei Tamaqu ena yacaqu ena solia vei iko o koya.’​—Joni 16:23.

[iVakamacala e ra]

[Tikina bibi ena tabana e 11]

Dodonu meda masu ena ‘yaloda taucoko,’ sega ena kena ivakarau sa matau vei keda

[Kato/​iYaloyalo ena tabana e 12]

ITAVI BIBI I JISU

Mo kila vinaka na itavi i Jisu, dikeva mada e so na icavuti, ivakamacala, kei na yaca e vakaibalebaletaki vua.

Apositolo.​—Iperiu 3:1.

Atama sa Muri.​—1 Korinica 15:45.

Bete Levu.​—Iperiu 4:​14, 15.

Daunivakasala Veivakurabuitaki.​—Aisea 9:​6, NW.

Dautukutuku Yalodina.​—Vakatakila 1:5.

Dauveisorovaki.​—1 Timoci 2:5.

Emeni.​—2 Korinica 1:​19, 20; Vakatakila 3:​14.

Imanueli.​—Maciu 1:​23.

Kalou Kaukauwa.​—Aisea 9:6.

Karisito/Mesaia.​—Maciu 16:16; Joni 1:​41.

Lami ni Kalou.​—Joni 1:​29.

iLiuliu.​—Maciu 23:​10, NW.

Luve ni Kalou.​—Joni 1:​34.

Luve ni Tamata.​—Maciu 8:​20.

Maikeli na Agilosi Turaga.​—1 Cesalonaika 4:​16, VV; Juta 9, NW.

Na Vosa.​—Joni 1:1.

Tama ni Gauna Tawamudu.​—Aisea 9:6.

Tui.​—Vakatakila 17:14.

Tui ni Sautu.​—Aisea 9:6.

Turaga.​—Joni 13:13.

Turaganilewa.​—Cakacaka 10:​42, VV.

Ulu ni iSoqosoqo Lewenilotu [“ivavakoso,” NW].​—Efeso 5:​23.

iVakabula.​—Luke 2:​11.

iVakatawa Vinaka.​—Joni 10:11.

iVakavuvuli.​—Joni 13:13.

Vunibula.​—Cakacaka 3:​15.