Susu Gone ena Vuravura e Tara Kina na Ka Kece Ga

O SA bau raica e dua na gone e cikevi nona itubutubu ena dua na iyaya ni vakatatalo e sega ni via volia vua? Se dua na gone e vinakata me lai qito ni sa tukuna oti na itubutubu me “Tiko vakadua”? Ena ituvaki qori eda raica ni cakava na itubutubu na ka e vinaka vua na gone. Ia vakalevu mera biuti luvedra na itubutubu mera cakava ga na ka era vinakata. Ena nona tagi kei nona cike na gone, e veisau kina na lomai itubutubu mai na sega ina io.

Era vakabauta e levu na itubutubu, ni veisusu vinaka na kena soli vei ira na gone na cava ga era vinakata. Kena ivakaraitaki mai Mereke, era a vakatarogi kina e le 750 na gone yabaki 12 ina 17. Nira tarogi se cava era cakava ni rau tukuna na itubutubu na sega, voleka ni 60 na pasede era kaya nira kerekere tiko ga. E rauta ni 55 na pasede era kaya ni dau mana na iwalewale ya. De dua era nanuma na itubutubu ni nodra veivakademeni e ivakaraitaki ni loloma, e dina beka ya?

Vakasamataka mada na vosa vakaibalebale makawa ena iVolatabu: “O koya sa vakamenemenea na nona bobula ni sa gone, ena yaco e muri me sega ni dau vakavinavinaka.” (Vosa Vakaibalebale 29:​21, NW) E macala ni gone e sega ni bobula. Ia e sega beka ni okati ena ivakavuvuli qo ena nodra susugi na gone? Ke ra vakamenemenei, se soli vei ira na ka kece ga era vinakata, era na yaco e muri mera “sega ni dau vakavinavinaka”​—dre ga nodra mua ra qai sega ni lomavakacegu.

Koya gona na iVolatabu e vakasalataki ira na itubutubu: “Vakatavulica na gone e na sala e dodonu me lako kina.” (Vosa Vakaibalebale 22:6) Era na muria gona na ivakaro qo na itubutubu yalomatua, era na kotora na lawa e matata, veiganiti, ra qai raica me muri. Ra kila tale ga ni nodra lomani na gone e sega ni kena ibalebale mera vakademeni vakasivia, se soli vei ira na ka nira veivakasosani, cike, se nira vakacudrucudru. Era duavata ga ena ivakaro vuku i Jisu: “Me io, na io, me sega, na sega, na nomudou vosa.” (Maciu 5:​37) Cava gona e okati ena nodra tuberi na gone? Vakasamataka mada na kena ivakatautauvata qo.

“Vaka na Gasau e na Liga”

Na ivakatautauvata ena iVolatabu e baleta nodrau veiwekani na gone kei na itubutubu, e vakabibitaka ni gone e gadreva dina na  veidusimaki. E kaya na Same 127:​4, 5: “Me vaka na gasau e na liga ni tamata kaukauwa; sa vakakina na luvedra era sa cauravou tiko. Sa kalougata na tamata sa sinai kina na nona taga ni gasau.” Era vakatauvatani na gone ina gasau, o ira na itubutubu era vaka na tamata kaukaua. O koya na dau vanataki dakaititi e kila ni sega ni vakacalaka na lau ni gasau ena takete, era kila tale ga na itubutubu dauloloma ni susu gone e ka ni sasaga qai sega ni caka ga me rawa. Na “takete” era vinakata na itubutubu mera yacova na luvedra​—na bula e vakainaki, marau ra qai nuitaki nira sa uabula. Mera digidigi tale ga vakayalomatua na luvedra, mera vuku me kua kina nira sotava na leqa vakasakasaka, ra qai sauva na isausau e yaga. Ena yaco ga qori ke saga na itubutubu me cakava nona itavi.

Na cava me caka me lau na gasau ena takete? Ena vakarautaki vinaka sara na gasau, taqomaki vinaka, qai vanataki vakadodonu ina takete. O ira tale ga na gone ena vinakati mera vakarautaki vinaka, taqomaki, ra qai dusimaki vakadodonu me vinaka nodra bula ena gauna mai muri. Meda dikeva yadudua mada e tolu na basoga ni nodra tuberi na gone.

Vakarautaki Vinaka na Gasau

Ena gauna vakaivolatabu, era dau vakarautaka vinaka na gasau na dau vanataki dakaititi. Na kau ena vakayagataki ena rairai mamada ga, ena sivi ga e liga qai sivi me dodonu vinaka sara. Dua na muana ena sivi me momoto, ena muana kadua ena coba kina na vutinimanumanu me rawa ni mua kina vakadodonu na gasau.

Oni vinakata tale ga na itubutubu mera vaka na gasau dodonu na luvemuni​—mera yalododonu, ra qai dei. Ke o itubutubu vuku, o na sega ni vakalecalecava na malumalumu i luvemu, ia o na vukea me cakava kina e dua na ka qai vakavinakataka. E levu gona na cakacaka me vakayacori ena nona susugi na gone ni “ka lialia sa vauci e lomana.” (Vosa Vakaibalebale 22:15) E vakasalataki ira na itubutubu na iVolatabu mera vakavulica na luvedra. (Efeso 6:4) Io, e yaga dina na veivakavulici ena kena bucini qai vakadodonutaki na itovo kei na nona vakasama na gone.

Sa rauta me kaya na Vosa Vakaibalebale 13:24: “O koya sa sega ni vakanakuitataka na luvena sa cati koya: ia ko koya sa lomani koya sa [“vakavulica,” NW] ni sa gone.” Ena tikinivolatabu qo, na vosa vakanakuitataka e kena ibalebale ga na veivakadodonutaki, se mani sala cava e vakayacori kina. Ni vakayacori ena loloma, ena saga na itubutubu me vakadodonutaka na cala me kua ni vakamatauna o gone, ke sega ena vakavuna me rarawa vakalevu o gone ni sa uabula. Ke o lomana na luvemu o na vakavulica.

Ena vakaraitaka tale ga na itubutubu dauloloma vei ira na luvena na vuna e kotori kina na lawa ena vuvale. Sega ni okati ga ena veivakavulici na ivakaro kei na tau ni itotogi, ia e bibi me vukei na gone me kila na veika e vauci ena ivakaro. E kaya na iVolatabu: “O koya sa vakabauta na vunau [“ivakaro,” NW] sa gone vuku.”​—Vosa Vakaibalebale 28:7.

E dau coba na vutinimanumanu ena dua na mua ni gasau me rawa ni mua kina vakadodonu ni sa vanataki. Na ivakavuvuli vakaivolatabu tale ga e taka mai vua a tauyavutaka na vuvale ena dei e lomana na gone ni sa biubiu e vale, qai yaga ena nona bula taucoko. (Efeso 3:​14, 15, VV) Era na kila vakacava na itubutubu ni sa dei ena nodra vakasama kei na nodra bula na luvedra na ivakavuvuli ya?

Vakasamataka na ivakasala ni Kalou vei ira na Isireli ena gauna i Mosese: “Na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni.” (Vakarua 6:​6, 7) E rua na ka mera cakava na itubutubu. iMatai, mera vulica na Vosa ni Kalou qai bulataka, mera taleitaka na lawa i Jiova. (Same 119:97) Oti sa qai rawa nira cakava na kena ikarua​—mera “vakavulica” na lawa ni Kalou vei ira na luvedra. Me dei e lomadra na gone na lawa qori, ena vinakati na iwalewale ni veivakavulici e maqosa qai vakayacori wasoma.

 E macala ni vakatavuvulitaki ni iVolatabu se na kena vakayagataki me vakadodonutaki kina na cala e se yaga tiko ga nikua. Qori na sala uasivi mera vakarautaki kina na gone era vaka na “gasau” mareqeti, me rawa ni dodonu tiko ga kina nodra ilakolako qai dei me yacova nira sa uabula.

Taqomaki ni Gasau

Meda taleva mada na ivakatautauvata e tukuni ena Same 127:​4, 5. Vakasamataka na dau vanataki dakaititi e vakatawana na gasau ena “nona taga ni gasau.” Ni vakarautaki oti na gasau, ena taqomaki vinaka sara. Ena dreketa voli na gasau ena kena taga na dau vanataki dakaititi me kua kina ni ca se ramusu. Talei dina na parofisai ena iVolatabu e tukuni kina ni Mesaia e vaka na gasau e ‘vunitaka o Tamana ena nona taga ni gasau.’ (Aisea 49:2) Na Tama tawavakatauvatani rawa o Jiova a taqomaka na Luvena lomani o Jisu mai na leqa me yacova sara nona vakamatei na Mesaia me vaka a parofisaitaki. A taqomaki koya tale ga me kua ni mate vakadua, ena nona vakaturi koya me lai bula tawamudu e lomalagi.

Sega ni vakabekataki ni itubutubu vinaka ena via taqomaka tale ga na luvena mai na veika rerevaki ni vuravura ca qo. Rairai ena vakatabui gone mai na so na ka ena rawa ni vakamuai koya ina veika ca. Kena ivakaraitaki, na itubutubu yalomatua ena muria vinaka na ivakavuvuli qo: “Sa vakacala nai valavala vinaka na dautiko vata kei ira era sa ca.” (1 Korinica 15:33) Ke ra taqomaki na gone mai na nodra vakailala kei ira era beca na ivakatagedegede savasava ni iVolatabu, era na sega ni vakayacora na ka ena vakaleqa nodra bula se ra mate sara ga kina.

De dua era na sega ni dau taleitaka na gone na nodra veitaqomaki na itubutubu. So na gauna era na cata sara ga, ni nomu veitaqomaki e kena ibalebale nomu na sega ni dau vakayacora na ka era vinakata. E dua na dauvolaivola rogo me baleta na susu gone e kaya: “Era sega ni dau vakaraitaka na gone ra qai sega tale beka ga ni vakavinavinakataka nodra veitaqomaki na itubutubu, ia era vinakata mera vakarautaka nodra itubutubu na ituvatuva ni vuvale e dei qai yaga ena nodra bula.  Ena rawa qori ke dei na itubutubu ena nona lewa qai yalana na ka vei ira na gone.”

Io, ni o lomana na luvemu o na taqomaki koya mai na veika e vakavuna na nuiqawaqawa, itovo ca, se na vakaleqa nona veiwekani vinaka kei na Kalou. Nira tubu cake, era na kila na vuna e kotori kina na lawa ra qai vakavinavinakataka nomu veitaqomaki ena yalololoma.

Veidusimaki

Ena Same 127:​4, 5 e vakatauvatani na itubutubu ina “tamata kaukauwa.” Kena ibalebale beka ni yaga duadua ga na veidusimaki nei tama? Sega. Na ivakatautauvata qo e okati kina o tama kei tina​—vaka kina na itubutubu ledua. (Vosa Vakaibalebale 1:8) Na vosa “tamata kaukauwa” e dusia ni gadrevi na igu ena kena vanataki na gasau ni dakaititi. Ena gauna vakaivolatabu, e dau ubi na dakaititi ena kopa, qai tukuni ni rairai ‘butuka na dakaititi’ na sotia me vakawataka. (Jeremaia 50:​14, NW, 29) Macala gona ni vinakati na igu kei na sasaga ni dreta na wa me vanataka na gasau ina takete!

Na nodra susugi tale ga na gone e gadrevi kina vakalevu na sasaga. Sega nira na tu tu ga mera vinaka vakataki ira, me vaka ga na gasau ena sega ni yacova na takete ke sega ni dua e vanataka. Ka ni rarawa ni levu na itubutubu era sega ni saga mera susugi ira vinaka na luvedra. Era muria ga na sala rawarawa. Ra biuta na luvedra mera vulica ena tivi, e koronivuli, kei ira nodra icaba na ka e dodonu kei na ka e cala, na itovo savasava, kei na ka e vauca na veiyacovi. Na cava ga era vinakata na luvedra era vakayacora. Ni dredre mera tukuna na sega, sa ra dau tukuna ga na io, ra qai dau ulubaletaka nodra vakatulewa nira sega ni via vakararawataka na luvedra. Na nodra veivakamenemenei ena vakaleqa sara vakalevu nodra bula na gone.

Sega ni rawarawa na susu gone. Gadrevi na sasaga ena kena vakayagataki na veidusimaki ena Vosa ni Kalou, ia e sega ni vakatauvatani rawa na ka e rawati kina. E kaya na ivola na Parents: “Ena vakadidike a vakayacori . . . e laurai ni o ira na itubutubu era dau veivakavulici vakadodonu, era veinanumi, ra dau tokoni luvedra ra qai dei ena ka era yalana​—e dau vinaka nodra ka ni vuli na luvedra, vinaka nodra veimaliwai, ra qai marau ni vakatauvatani kei ira na gone e yalovinaka tale vakasivia se ra voravora na nodra itubutubu.”

E tiko e dua na icovi e uasivi cake. Eda sa veivosakitaka oti na imatai ni tikina ni Vosa Vakaibalebale 22:6: “Vakatavulica na gone e na sala e dodonu me lako kina.” E tomana na vosa uqeti qo: “Ni sa qase mai, ena sega ni lako tani maikina.” Kena ibalebale beka ni na yaco dina na ka e tukuni ena vosa uqeti qo? Sega. Na luvemu e tu tale ga vua na dodonu me na vakatulewa ni sa uabula. Ia e dua na ka e tukuni ena tikinivolatabu qo mera nuidei kina na itubutubu. Na cava ya?

Ke o vakavulica na luvemu ena ivakavuvuli ena iVolatabu, o sa kotora tiko na yavu ena rawati kina na veika totoka​—era na tubu cake na luvemu mera marau, lomavakacegu, qai nuitaki. (Vosa Vakaibalebale 23:24) Koya gona, vakarautaki ira na gone era vaka na “gasau,” taqomaki ira, qai gumatua ni dusimaki ira. O na sega ni veivutunitaka.

[iYaloyalo ena tabana e 13]

Nira vakayacora na itubutubu na ka kece ga era vinakata na gone e ivakaraitaki beka ni loloma dina?

[iYaloyalo ena tabana e 15]

Na itubutubu dauloloma ena vakamacalataka na vuna e kotori kina na lawa ena vuvale

[iYaloyalo ena tabana e 15]

Na itubutubu vinaka ena taqomaka na luvena mai na veika rerevaki ni vuravura ca qo

[iYaloyalo ena tabana e 16]

Sega ni rawarawa na susu gone ia e sega ni vakatauvatani rawa na ka e rawati kina