E Vinakata Meda Tamata Yaco
Toro Voleka Vua na Kalou
E Vinakata Meda Tamata Yaco
ERA vinakata na itubutubu dau veikauaitaki me vakainaki na bula nei luvedra, ra marau, mera tamata yaco tale ga. E vinakata tale ga qori vei keda na Tamada vakalomalagi o Jiova. Ena nona kauai, e tukuna sara ga na ka meda cakava me rawa kina nida tamata yaco. Vakasamataka mada na vosa a cavuta vei Josua, ena Josua 1:6-9.
Raitayaloyalotaka na ituvaki e toka qori ena yasana imatau. Ni sa mate o Mosese, sa qai nodra iliuliu vou na vica vata na milioni na Isireli o Josua. Era sa vakarau curu ena vanua a yalataka na Kalou vei ira nodra qase. Ia a vakasalataki Josua na Kalou ena so na ka, ke muria ena rawa ni tamata yaco. Na ivakasala qo e sega ni yaga duadua ga vua, ke da muria eda na tamata yaco tale ga.—Roma 15:4.
E tukuna sara ga vakatolu o Jiova vei Josua me kaukaua qai yaloqaqa. (Tikina e 6, 7, 9) Mera yaco bula ina Vanua Yalataki na matanitu o Isireli, qori sara ga na ka ena vinakati vei Josua. Na cava ena vakayaloqaqataki koya?
Ena nona wilika na ivola era uqeti vakalou. E kaya o Jiova: “Mo vakabauta mo cakava me vaka nai vakaro kecega sa vakarota vei iko ko Mosese na noqui talatala.” (Tikina e 7) Kena irairai ni vica wale ga na ivola ena iVolatabu era se volai ena gauna ya. * E sega ni ivakadei nida na tamata yaco ke da taukena wale tu ga na Vosa ni Kalou. Me yaga gona vei Josua, e rua na ka me cakava.
Kena imatai, me tugana wasoma na Vosa ni Kalou e lomana. E kaya o Jiova: “Mo vakanananu kina e na siga kei na bogi.” (Tikina e 8) Dua na ivola e vakamacalataka: “Na Kalou a vakaroti Josua me ‘vosavosaiyalonataka,’ ‘vakasamataka’, se ‘vakananuma’ me kasa kina vua na nona Lawa.” Ena vosota rawa ga o Josua na veika dredre sa tu mai liu ke wilika e veisiga qai vakananuma na Vosa ni Kalou.
Kena ikarua, ena vinakati me bulataka o Josua na veika e vulica. E tukuna vua o Jiova: “Mo cakava me vaka na ka kecega sa volai kina: . . . ko na qai tamata yaco.” (Tikina e 8) Na nona tamata yaco o Josua e salavata kei na nona cakava na inaki ni Kalou. Cava na vuna? Ni dauyaco kece na inaki ni Kalou.—Aisea 55:10, 11.
A yalodina tiko ga ni qaravi Jiova o Josua, qai vakainaki nona bula ni muria na ivakasala i Jiova.—Josua 23:14; 24:15.
O vinakata tale ga me vakainaki nomu bula me vakataki Josua? E vinakata o Jiova mo tamata yaco. Ia e sega ni rauta wale ga nomu taukena tu na iVolatabu. E tukuna e dua na lotu vaKarisito a veiqaravi tu mai ena yalodina: “Cega na iVolatabu, wilika qai bulataka.” Ke o dau vakatawa na lomamu ena Vosa ni Kalou qai bulataka na ka o vulica, o na “tamata yaco” me vakataki Josua.
[iVakamacala e ra]
^ para. 7 Rairai a okati tale ga ena ivola uqeti era a tu ena gauna i Josua na lima na ivola a vola o Mosese, (Vakatekivu, Lako Yani, Vunau ni Soro, Tiko Voli mai na Lekutu, kei na Vakarua), na ivola na Jope, kei na dua se rua na same.
