1—Na Cava Meda Masu Kina?
MASU. E vica ga na ulutaga vakaivolatabu e taleitaki vakalevu e dau vakavu lomatarotaro tale ga, e dua vei ira na masu. Meda raica mada e vitu na taro e dau tarogi me baleta na masu da qai raica na kedra isau ena iVolatabu. E inaki ni ulutaga veitaravi qo me vukei iko mo masu ke o se sega ni cakava tiko qori, se mo vakavinakataka me rawa ni rogoci.
E NODRA ivakarau ena levu na vanua kei na lotu e veiyasa i vuravura mera masu. Era masu nira tiko taudua; era masu vakailawalawa. Era masu e valenilotu, ena valenisoro, mosque, kei na so tale na vanua ni qaravi kalou. Era na rairai vakayagataka na ibe ni masu, rosario, ivakatakarakara, ivola ni masu, se ra vola na nodra masu ra qai biuta ena dua na dramu (prayer wheel), se ra vola ena papa lalai mera lili ena vata.
Na noda dau masu e dua na sala eda duatani kina vei ira na vo ni kabula e vuravura. E tiko na ka eda tautauvata kina kei ira na manumanu. Eda gadreva ruarua na kakana, cagi, kei na wai. Me vakataki ira, eda sucu mai, da bula tiko ena dua na gauna, oti da mate sara. (Dauvunau 3:19) Ia na tamata ga e masu. Na vuna?
De dua nida gadreva meda masu. Era vakabauta e levu ni masu e sala ni veitaratara kei na ka era okata me ka tabu, dokai qai yaga tawamudu. E tukuna na iVolatabu nida buli meda gadreva na veika va qori. (Dauvunau 3:11) A kaya ena dua na gauna o Jisu Karisito: “Era marau o ira na kila nira gadreva na Kalou.”—Maciu 5:3.
Sa rauta meda raica e vuqa na valenilotu lelevu, na iyaya e vakayagataki ena sokalou, kei na vica vata na aua e dau caka kina na masu, qo e vakaraitaka ni tiko na ‘gagadre’ vakayalo. So era nuitaki ira ga se ra nuitaka eso tale me vakaceguya na nodra gagadre vakayalo. Ia kua ni guilecava ni vakaiyalayala ga na ka eda rawata, eda na sega gona ni rawa ni veivuke. Eda malumalumu, e lekaleka ga na noda bula, e qiqo tale ga na noda rai. E rawa ga ni vukei keda o koya e vuku qai kaukaua cake sara vei keda, e tawamudu tale ga na nona bula. Na gagadre vakayalo cava ena uqeti keda meda masu?
Vakasamataka mada: O bau gadreva ena dua na gauna mo dusimaki, mo vakavukui, se me saumi eso na nomu taro e rairai sega ni yacova na kilaka ni tamata? O bau gadreva mo vakacegui ena nomu rarawa, mo dusimaki ena dua na vakatulewa dredre mo cakava, se mo vosoti ena dua na cala o orataka voli?
E kaya na iVolatabu ni qori sara ga na vuna vinaka mo masu kina. E nuitaki duadua na ivakasala ni iVolatabu me baleta na masu, e volai tale ga kina na nodra masu e levu na tagane kei na yalewa yalodina. Era masuta mera vakacegui, mera dusimaki, mera vosoti, me saumi tale ga na nodra taro dredre.—Same 23:3; 71:21; Taniela 9:4, 5, 19; Apakuki 1:3.
E duidui na masu e volai ena iVolatabu, ia e dua na ka era tautauvata kina. Oya na nodra kila o ira na masu tiko na ka bibi me rogoci kina na masu, qori na ka era veilecayaki tu kina e levu nikua se ra vakawalena tu ga. O ira na tagane kei na yalewa yalodina oya, era kila mera masu vei cei.
