E Vu Vakalou na Duivosavosa?

“AU SEGA sara ga ni kila,” e tukuna o Devon. “E veimacawa e levu ena noqu lotu e vaka era curumi yalo tabu ra qai vosataka vakacakamana na veimataqali vosa. Eso vei ira qo e tawakilikili na ivakarau ni nodra bula. Ena gauna vata qori au saga meu bulataka na ivakatagedegede vakaivolatabu. Dua na ka na noqu kerea me sobuti au na yalo tabu, ia e sega ga. Na cava e sega ni sobuti au kina?”

Na lotu e lewena o Gabriel e vaka era dau curumi yalo tabu tale ga ra qai vosataka na veimataqali vosa. E kaya o Gabriel: “Au dau sevaka ni gauna au masu tiko kina eso era dau veivakasosataki ena rogolevu ni nodra vosa, au sega ni kila na ka era tukuna tiko vaka kina o ira. Na nodra duivosavosa e sega ni yaga vua e dua. E tiko na inaki vinaka e vakayagataka kina na yalo tabu na Kalou?”

Na ka erau tukuna o Devon kei Gabriel e basika kina e dua na taro vakavure vakasama, e vu dina vakalou na duivosavosa e caka tu ena so na lotu nikua? Me kilai na kena isau, ena yaga meda dikeva na isolisoli vakacakamana ni nodra duivosavosa na lotu vaKarisito ena imatai ni senitiuri.

“Era Qai Vosataka na Veimataqali Vosa”

Eda wilika ena iVolatabu ni so na tagane kei na yalewa a tu vei ira na kaukaua mera vosataka na vosa era se sega ni bau vulica. A tekivu qo ena Penitiko 33 S.K., ni oti ga e vica na macawa na mate i Jisu Karisito. Ena siga oya era a tiko e Jerusalemi e rauta nira le 120 na tisaipeli i Jisu, qai “sobuti ira kece na yalo tabu era qai vosataka na veimataqali vosa.” O ira na vulagi mai na veivanua “era kurabui nira rogoci ira na tisaipeli nira vosataka tiko na nodra dui vosa.”​—Cakacaka 1:15; 2:​1-6.

E tukuni tale ga ena iVolatabu na nodra vosataka na veimataqali vosa eso na imuri taumada i Jisu. Na yapositolo o Paula me kena ivakaraitaki, a vosataka na vosa ni veivanua tani ena kaukaua ni yalo tabu. (Cakacaka 19:6; 1 Korinica 12:​10, 28; 14:18) Ia e tiko na inaki vinaka e vakayagataki kina na yalo tabu ni Kalou. Na cava na inaki ni duivosavosa ena gauna vakaivolatabu?

iVakatakilakila ni Veitokoni na Kalou

Ni volavola vei ira na lotu vaKarisito ena siti o Korinica, a vakamacalataka vei ira na duivosavosa na yapositolo o Paula, “na duivosavosa . . . [e] ivakatakilakila vei ira na sega ni vakabauta.” (1 Korinica 14:22) Koya gona, me  salavata kei na cakamana tale eso, na duivosavosa e vakatakila vei ira na vakarorogo ni Kalou e vakadonuya, e tokona tale ga na ivavakoso vaKarisito e tauyavu vou. Na isolisoli vakacakamana qo e vaka na ivakatakilakila ni gaunisala e dusimaki ira na via kila na ka dina ina vanua era tiko kina na tamata digitaki ni Kalou.

E sega ni bau cavuti ena iVolatabu ni a vosataka vakacakamana o Jisu se dua vei ira na parofita ni bera na gauna vaKarisito na vosa era sega ni vulica. A tiko gona na inaki ni nodra duivosavosa na tisaipeli i Jisu.

Dua na Sala me Vakatetei Kina na iTukutuku Vinaka

Ena itekitekivu ni nona cakacaka vakaitalatala, a dusimaki ira na nona tisaipeli o Jisu mera vunautaka na itukutuku vinaka ni Matanitu ni Kalou vei ira ga na Jiu. (Maciu 10:6; 15:24) Oya na vuna era sega ni vunau kina na tisaipeli ena vanua era sega ni tiko kina na Jiu. Ia sa na vakarau veisau oya.

Ni oti ga vakalailai na nona mate ena 33 S.K., a vakaroti ira na nona imuri o Jisu ni sa vakaturi mera ‘vakavulici ira na lewe ni veivanua kece ga mera nona tisaipeli.’ A tukuna tale ga nira na tukuni koya ina “veivanua yawa sara kei vuravura.” (Maciu 28:19; Cakacaka 1:8) Me tete na itukutuku vinaka ina veivanua yawa ena gadrevi na duivosavosa, sega ni vosa ga vakaIperiu.

Ia e levu vei ira na tisaipeli taumada era ‘sega ni vuli vinaka ra qai tauvanua ga.’ (Cakacaka 4:13) Era na vunau vakacava ina veivanua yawa nira sega ni se bau rogoca na kena vosa, era sega tale ga ni vosataka? Na kaukaua ni yalo tabu a rawa kina vei ira eso na dauvunau gugumatua mera vunau ena vosa era sega mada ga ni vulica.

Koya gona, e rua na inaki bibi ni duivosavosa. Kena imatai, ena laurai na ivakatakilakila me dusia ni tokona na Kalou. Kena ikarua, e yaga vakalevu vei ira na lotu vaKarisito ena imatai ni senitiuri mera cakava na nodra ilesilesi mera vunau vei ira e duidui na nodra vosa. Qo beka na inaki vata ga era duivosavosa kina e levu na lotu nikua?

Duivosavosa Nikua ​—iVakatakilakila ni Tokona na Kalou?

O na vakaduria e vei na ivakatakilakila mera raica e levu ena nomu itikotiko? Ena loma ni dua na vale? Sa macala tu ga ni na sega! E tukuni ena ka a yaco ena siga ni Penitiko nira rogoca e dua na “ilala levu sara,” era raica na ivakatakilakila ena nodra rogoci ira na tisaipeli nira vosataka vakacakamana na veimataqali vosa. Na cava e yaco, “e rauta ni tolunaudolu” tale era wili mera lewe ni ivavakoso vaKarisito ena siga oya! (Cakacaka 2:​5, 6, 41) O ira nikua era tukuna nira duivosavosa era cakava qori ena valenilotu, era na raica vakacava na ivakatakilakila na ilala levu sara era tawavakabauta?

E tukuni ena Vosa ni Kalou ni veidauci kei na “itovo vakayago” eso e veisaqasaqa kei na yalo tabu, kuria ni “o ira na cakava na ka kece qo era na sega ni rawata na matanitu ni Kalou.” (Kalatia 5:​17-21) Ke o raica na nodra itovo tawakilikili o ira era duivosavosa, rairai o na vaqaqa lo, ‘E rawa vakacava ni sobuti ira na yalo tabu ra qai cakava tiko na itovo e vakacala na Vosa ni Kalou?’ Qo ena vaka na kena vakaduri na ivakatakilakila ni gaunisala e dusi cala.

Duivosavosa Nikua​—E Vunautaki Kina na iTukutuku Vinaka?

Vakacava e dua tale na inaki ni duivosavosa ena imatai ni senitiuri? Na inaki beka ni duivosavosa e caka ena valenilotu me vunautaki kina na itukutuku vinaka vei ira era duidui vosa? Meda nanuma tiko ni o ira na tiko mai Jerusalemi ena siga ni Penitiko 33 S.K., era cavutu mai na levu na vanua ra qai kila vinaka na veimataqali vosa era vosataka vakacakamana na tisaipeli. Qo e veibasai kei ira na  duivosavosa nikua, ni sega sara ga ni dua vei ira na rogoca e kila na ka e tukuni.

E macala gona ni duivosavosa nikua e duidui sara mai na isolisoli ni yalo tabu a sobuti ira na imuri i Jisu taumada. E sega ni dua na itukutuku nuitaki e vakamacalataka ni a soli na kaukaua vakacakamana qori vua e dua nira sa mate na yapositolo. Qo era sega ni kurabui kina na dauwili iVolatabu. A parofisaitaka na yapositolo uqeti vakalou o Paula, ni ‘na mudu’ na isolisoli vakacakamana, oka kina na duivosavosa. (1 Korinica 13:8) Eda na kilai ira vakacava e dusimaki ira dina tiko na yalo tabu nikua?

O Cei e Vakadinadinataki ni Dusimaki Ira Tiko na Yalo Tabu?

E kila vinaka o Jisu ni na mudu na isolisoli ni duivosavosa ni tauyavu oti ga na ivavakoso lotu vaKarisito. Ni bera ni mate, a tukuna o Jisu na ivakatakilakila era na kilai kina na nona imuri dina. E tukuna: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Ena tikinivolatabu vata ga e tukuni kina ni na mudu na duivosavosa, e kaya: “E sega vakadua ni seavu na loloma.”​—1 Korinica 13:8.

Na loloma na imatai ni ciwa na itovo e umani ena “vua” ni yalo tabu ni Kalou. (Kalatia 5:​22, 23) O ira e dusimaki ira tiko na yalo tabu ni Kalou​—qai tokoni ira tiko na Kalou​—era na veilomani dina. Kuria qo, na ikatolu ni itovo e umani ena vua ni yalo tabu na vakacegu. Era na lomavakacegu, era na sega ni veitovaki, veicati vakamatatamata, se mera ivalavala voravora o ira era dusimaki tiko ena yalo tabu.

Mo vakasamataka tale ga na parofisai i Jisu ena Cakacaka 1:8. E tukuna o Jisu ni na sobuti ira na nona tisaipeli na yalo tabu era na qai tukuni koya ina “veivanua yawa sara kei vuravura.” A vakatakila tale ga ni na caka tiko na cakacaka qo “me yacova na i vakataotioti kei vuravura.” (Maciu 28:​20, VV) Koya gona ena caka tiko ga na vunau e vuravura raraba me ivakatakilakila ni dusimaki ira tiko na yalo tabu.

Na cava mada na nomu nanuma? Na ilawalawa cava nikua e laurai vei ira na ivakatakilakila ni dusimaki ira tiko na yalo tabu? O cei era vuataka na itovo e umani ena vua ni yalo tabu, me vaka na veilomani, na vakacegu ra qai vakacacani vei ira na veiliutaki nira sega ni via vakaitavi ena ivalu? (Aisea 2:4) O cei era saga tiko mera kua ni muria na gagadre vakayago, me vaka na veidauci, ra qai biuti ira tani mai na ivavakoso o ira era sega ni veivutuni? (1 Korinica 5:​11-13) O cei e vunautaka tiko e vuravura raraba ni Matanitu ni Kalou e inuinui duadua ga ni kawatamata?​—Maciu 24:14.

O ira na tabaka na mekesini qo era sega ni lomalomarua mera tukuna ni ganiti ira na iVakadinadina i Jiova na ivakamacala ena iVolatabu me baleti ira era dusimaki tiko ena yalo tabu. Ena vinaka gona mo saga mo veikilai kei ira mo qai vakadeitaka, e tokoni ira dina tiko na Kalou se sega?