Taro na Dauwiliwili . . .

Era dauveivakabulai vakacakamana na iVakadinadina i Jiova?

▪ Era se sega vakadua ni veivakabulai na iVakadinadina i Jiova. Ia me vakataki Jisu, era vakabauta ni nodra itavi bibi ga me vunautaki na itukutuku vinaka ni Matanitu ni Kalou. Era vakabauta tale ga nira sega ni kilai na lotu vaKarisito dina ena nodra veivakabulai ia e tiko na ka e bibi cake era kilai kina.

E yaga dina vei keda kece na nona veivakabulai ena veinanumi o Jisu Karisito ena imatai ni senitiuri S.K. E vakadeitaka qori ni gauna ena veiliutaki kina vakatui ena Matanitu ni Kalou, e sega ni dua ‘na lewenikoro ena kaya, au sa tauvimate.’​—Aisea 33:24.

Ia vakacava nikua? Era tukuna eso na lotu ni Veivanua vaKarisito kei na so tale na vakabauta nira dauveivakabulai. O Jisu a vakaroti ira vakaukaua na tukuna tiko nira “cakava na cakamana e vuqa” ena yacana, ena nona kaya: “Au sega sara ni kilai kemudou; dou lako tani vei au ni dou sa tamata dau caka ca!” (Maciu 7:​22, 23, VV) Koya gona, e tokoni ira dina na dauveivakabulai nikua na Kalou, e vakadonui ira tale ga?

Meda raica mada na ka e tukuna na iVolatabu me baleta na veivakabulai i Jisu. Nida veidutaitaka na ka e volai ena iVolatabu kei na ka era cakava ena gauna qo na dauveivakabulai, eda na kila se vu vakalou na ka era cakava se sega.

A sega vakadua ni veivakabulai o Jisu mera muri koya kina e levu se dua na ilawalawa. Ena so na gauna a vakabula eso e matanalevu, ia e tukuna vei ira mera kua ni talanoataka.​—Luke 5:​13, 14.

A sega vakadua ni saumi na veivakabulai i Jisu. (Maciu 10:8) E dau mana na ka e cakava. A vakabulai ira kece na tauvimate era lako mai vua, ia a sega ni vakatau qori ena nodra vakabauta. (Luke 6:19; Joni 5:​5-9, 13) E vakaturi ira mada ga na mate!​—Luke 7:​11-17; 8:​40-56; Joni 11:​38-44.

A veivakabulai o Jisu, ia a sega ni inaki ni nona cakacaka vakaitalatala me veisautaka na nodra vakabauta e levu ena nona veivakabulai vakacakamana. E nona inaki bibi ga me vunautaka na Matanitu ni Kalou. A tuvanaka vei ira na nona tisaipeli mera vakavulici ira tale eso me baleta na inuinui ni bula uasivi ena veiliutaki ni Matanitu ni Kalou.​—Maciu 28:​19, 20.

Eso na imuri i Jisu ena imatai ni senitiuri era dauveivakabulai, ia a oti na isolisoli qori. (1 Korinica 12:​29, 30; 13:​8, 13) Era sega ni kilai na lotu vaKarisito dina ena gauna qo mera dauveivakabulai, ia era kilai ga ena nodra veilomani dina. (Joni 13:35) Era sega ni rawata na dauveivakabulai ena gauna qo mera vakaduavatataki ira na duikaikai, se duidui na nodra isususu.

E tiko e dua na ilawalawa lotu vaKarisito ena gauna qo era duavata ena loloma dina, era sega gona ni veivakacacani vakataki ira​—se vakacacana e dua tale​—se mani vakacava sara na nodra veileqaleqati. O cei o ira qo? Qo o ira na iVakadinadina i Jiova. Era kilai e veiyasai vuravura nira dau vakaraitaka na loloma vaKarisito. E rawa ni tukuni na nodra vakaduavatataki e vaka na cakamana nira cavutu mai na duidui vanua, matanitu, qai duidui na nodra itovo vakavanua. E rawa ga qori ena vuku ni yalo tabu ni Kalou. Ena vinaka moni lai tiko ena dua na nodra soqoni moni raica sara ga.

[iYaloyalo ena tabana e 13]

E tokoni ira dina na dauveivakabulai nikua (itaba ena yasana imatau) na Kalou?