Vakadamurimuria Nodra Vakabauta

“Au Vakabauta”

A RAITAYALOYALOTAKA o Marica na vatu e sogota tu na ibulubulu kei ganena. Na nona rarawa e vaka ga ni bikai tu ena dua na ka e batabata qai bibi me vaka na vatu oya. E sega ni vakabauta ni sa yali vakadua na ganena lomani o Lasarusa. Na ka kece e nanuma o Marica me baleta na va na siga sa oti a takali kina o ganena e vaka ga na tadra vua.

Ia qo sa duri tu e matana na turaga erau veivolekati sara kei Lasarusa. Sa qai rarawa ga vakalevu o Marica ni raici Jisu tale, ni kila o koya duadua ga e rawa ni vakabulai ganena. Ia e lomavakacegu o Marica ni tiko kei Jisu ena taudaku ni taoni o Pecani e toka e delana. E vakayaloqaqataki koya ena gauna lekaleka oya na nona raica e matai Jisu na yalololoma kei na kauai dina. E taroga o Jisu na taro ena uqeti Marica me vakasamataka vakabibi na nona vakabauta kei na nona inuinui me baleta na veivakaturi. Na nodrau veivosaki qori a lutu kina mai gusui Marica na itukutuku bibi duadua me bau cavuta: “Au vakabauta ni o kemuni ga na Karisito na Luve ni Kalou, o koya ena lako mai vuravura.”​—Joni 11:27.

E vakasakiti dina na vakabauta i Marica. Na itukutuku lekaleka eda wilika ena iVolatabu me baleti koya ena vakaukauataka na noda vakabauta. Meda kila se rawa vakacava qori, meda raica mada na imatai ni gauna e volatukutukutaki kina ena iVolatabu o Marica.

‘Lomaocaoca Qai Nuiqawaqawa’

Ena vica na vula yani e liu, a se bula voli o Lasarusa qai sega ni tauvimate. Sa vakarau tadu mai ena nona vale e Pecani na vulagi dokai duadua, o Jisu Karisito. E duatani toka na vuvale qo ni ratou se tiko vata ga ni ratou sa uabula na veiganeni o Lasarusa, Marica, kei Meri. Era nanuma eso na dauvakadidike ni rairai qase vei ratou na le tolu o Marica ni rairai dau qaravi ira na vulagi, qai cavuti e liu na yacana ena so na gauna. (Joni 11:5) E sega ni kilai a bau vakawati e dua vei ratou se sega. Ia eda kila ga ni ratou veitokani voleka kei Jisu. Ena nona cakacaka vakaitalatala voli e Jutia, na  vanua e cati qai saqati vakalevu kina, e dau vakaicili o Jisu ena nodratou vale na veiganeni. E sega ni vakabekataki ni a marautaka vakalevu qori, ni vakila kina na vakacegu kei na veitokoni.

A dau oga o Marica ena qaravi ni nodratou itikotiko kei na nodra vakacegui na vulagi. Ni mamakutu, e rairai dau ogaoga ena levu na ka. A vakayacora tale ga qori ni veisiko yani o Jisu. A nanuma me vakarautaka e vica na mataqali kakana vua na nona vulagi dokai, kei na so tale beka na nona lewenisala. E bibi dina ena gauna oya na veikauaitaki. Ni yaco mai e dua na vulagi, e dau kidavaki ena iregu, luva na nona ivava, vui na yavana qai lumuti na uluna ena waiwai boivinaka. (Luke 7:​44-​47) E kena ivakarau me qaravi vinaka na vulagi, na vanua e moce kina kei na ka me kania.

E levu na cakacaka me rau cakava o Marica kei Meri me baleta na nodratou vulagi dokai. A vukei tacina taumada o Meri, e nanumi ni vinaka cake na nona dau veinanumi kei na nona vakasamataka vinaka na ka. Ia a veisau qori ni yaco mai o Jisu. A vakayagataka vinaka na gauna qori o Jisu me vakavulici ira kina na tiko e kea! E duidui sara vei ira na iliuliu ni lotu ena gauna oya o Jisu ni dau dokai ira na yalewa qai vakavulici ira me baleta na Matanitu ni Kalou, na usutu ni nona cakacaka vakaitalatala. E marautaka sara o Meri na gauna qo, qai dabe e matai Jisu me vakarogoca na ka kece e tukuna.

Sa wacava na nona yalokatakata o Marica ni raica qori. Ni levu na kakana me vakarautaki qai tu na cakacaka tale eso me caka vei ira na vulagi, sa qai levu ga na nona nuiqawaqawa kei na nona kauai ena ka e cakava o tacina. Ni cumuwaqara na cakacaka qai raici tacina ni dabe toka ga qai sega ni veivuke, e damudamu beka na matana, vakaraitaka na nona vuturi se matacudrucudru? E sega ni kurabuitaki ke cakava qori. Ena sega ni rawa ni cakava duadua o Marica na cakacaka kece oya!

Ni sa sega ni kinoca rawa o Marica na nona rarawa, e mani tukuna yani vei Jisu: “Turaga, e sega ni dua na ka vei kemuni nona biuti au duadua o taciqu meu qai cakava kece tu na cakacaka o yau? Ni kaya mada vua me mai vukei au.” (Luke 10:40) E rogo kaukaua dina na  vosa oya. Eso era vakadewataka na taro qori me: “Turaga, oni sega ni kauai . . . ?” A kerei Jisu o Marica me vakatalai Meri me vukei koya.

A rairai kurabuitaka o Marica na ka a tukuna o Jisu, me vakataki ira ga e levu na dau wili iVolatabu. A tukuna vakamalua vua: “Marica, Marica, o sa lomaocaoca o qai nuiqawaqawataka e levu na ka. E vica ga na ka e gadrevi, se dua ga. E digia o Meri na ivotavota vinaka ena sega sara ni kau tani vua.” (Luke 10:​41, 42) Na cava na ibalebale ni vosa i Jisu? A kaya beka ni kauaitaka ga na veika vakayago o Marica? A nanuma beka ni sega ni bibi na nona ogaoga ni vakarautaka na kakana?

Sega. A kila vinaka o Jisu ni ka e cakava o Marica e vu mai lomana qai caka ena loloma. A sega tale ga ni nanuma ni cala na kena vakarautaki e dua na kakana levu me baleti ira na vulagi. Ena dua na gauna e liu, a tiko tale ga o Jisu ena vale i Maciu me vakayagataka e dua na “kakana levu” a vakarautaki ena vukuna. (Luke 5:​29) A sega gona ni vosa tiko o Jisu ena kakana a vakarautaka o Marica, ia na ka ga e vakaliuca. Ni kauai ga ena levu ni kakana me vakarautaka, sa sega ni vakasamataka kina na ka e bibi cake. Na cava oya?

E tiko sara ga ena nodratou vale o Jisu na Luvena duabau na Kalou o Jiova me vakavulica na ka dina. Qori e bibi cake mai na kakana totoka kei na veika tale eso e vakarautaka o Marica. A rarawataka o Jisu ni sa calata tiko o Marica na veika vinaka me vakatitobutaki kina na nona vakabauta, ia e tu vei Marica na dodonu me vakatulewataka na ka e vakaliuca. E sega ga ni dodonu me vakatulewataka na ka me vakaliuca o Meri.

A mani vakadodonutaki Marica ena yalololoma o Jisu ni cavuta vakamalua toka na yacana me ruru kina na nona cudru, qai vakadeitaka vua ni sega ni gadrevi me ‘lomaocaoca se nuiqawaqawataka e levu na ka.’ Sa na rauta ke vakarautaki e dua se rua na mataqali kakana rawarawa ga, vakauasivi ni tu na kakana vakayalo me vakayagataki. Ena sega gona ni kauta tani vei Meri na “ivotavota vinaka” e sa digia, oya me vuli vei Jisu.

E levu na ka era rawa ni vulica na imuri i Karisito nikua ena itukutuku lekaleka ni veika a yaco ena nodratou vale o Marica. Me kua mada ga ni dua na ka e vakalatia na noda sasaga meda kila na Kalou. (Maciu 5:3) Eda na via vakatotomuri Marica ena nona yalovinaka kei na nona mamakutu, ia me kua ga ni ‘lomaocaocataki qai nuiqawaqawataki’ vakasivia na veika me baleti ira na noda vulagi, qai vakawaleni kina na veika e bibi cake. Na noda veimaliwai kei ira eda vakabauta vata e sega ni kena inaki ga na kana, ia meda veivakayaloqaqataki ena noda vota na isolisoli vakayalo. (Roma 1:​11, 12) Ena rawa ga qori ke caka ga e dua na kakana lailai.

Mate Qai Bula Tale

A ciqoma beka o Marica qai vuli ni vakadodonutaki koya ena yalololoma o Jisu? E sega ni dodonu meda lomatarotarotaka qori. Ni vakamacalataka na yapositolo o Joni na itukutuku vakasakiti me baleta na ganei Marica, e kaya: “E dau lomani Marica kei tacina kei Lasarusa o Jisu.” (Joni 11:5) Sa oti toka e vica na vula mai na nona ilakolako taumada i Pecani o Jisu. E macala ni a sega ni levaci Jisu o Marica, a sega ni yalocataki koya ena nona ivakasala a tauca ena yalololoma. A ciqoma ga ena yalomalumalumu. Na ka e cakava o Marica e ivakaraitaki totoka dina ni vakabauta meda vakatotomuria ni na gadrevi meda vakadodonutaki kece ena so na gauna.

Ni tauvimate bibi o ganena, a ogaoga o Marica na qaravi koya. A solia nona vinaka kece me vakaceguya na yaluma kei na mosi a vakila o ganena me rawa ni bula vinaka tale. Ia sa qai bibi ga na kena mate o Lasarusa. E tiko ga e yasana o ganena ena siga kei na bogi. Ni raica na kiro ni matai Lasarusa ena vuku ni kena mate, ena rairai vakasamataka lesu o Marica na marau kei na rarawa ratou vakila ena vica vata na yabaki ratou bula vata tu kina.

Ni rau raica o Marica kei Meri ni sa sega ni  dua na ka erau na cakava rawa vei Lasarusa, erau mani vakauitukutuku vei Jisu. A vunau tiko o Jisu ena dua na vanua ena taura e rua na siga na kena lakovi. E lekaleka ga na nodrau itukutuku: “Turaga, e tauvimate na nomuni itokani dredre.” (Joni 11:​1, 3) Erau kila ni dau lomani ganedrau o Jisu, erau vakabauta ni na cakava na ka ga e gadrevi me vukei nona itokani kina. Erau nuitaka beka ni na yaco yani o Jisu ni bera ni mate o Lasarusa? Ke vaka kina, a mate wale na nodrau vakanuinui ni a qai mate o Lasarusa.

Erau lolositaki ganedrau o Marica kei Meri, erau vakarautaka na veika me baleta na veibulu, era mai vakacegui rau tale ga e levu mai Pecani kei na veivanua voleka. Ia se bera ga ni yaco yani o Jisu. Sa qai veilecayaki ga o Marica. Ni oti e va na siga na mate i Lasarusa, a rogoca sara o Marica ni sa voleka yani i Pecani o Jisu. E vusolo tu na lomana, ia e cavu vaka na dalo matua na yalewa mamakutu qo me lai tavaki Jisu qai sega ni bau tukuna vei Meri.​—Joni 11:20.

Ni raica na nona Turaga, a talaucaka o Marica na ka a vakararawataki rau voli kei Meri ena vica na siga: “Turaga, ke oni a tiko eke, ke a sega ni mate o ganequ.” A sega ni seavu na vakabauta kei na inuinui i Marica. E tomana: “Ia au kila ena gauna mada ga qo ni ka kece oni kerea vua na Kalou ena solia vei kemuni.” A sega tale ni wawa o Jisu me cavuta e dua na ka me vakadeitaka na nona inuinui: “Ena tucake tale na ganemu.”​—Joni 11:​21-​23.

A nanuma o Marica ni vakaibalebaletaka tiko o Jisu na veivakaturi ena gauna se bera mai, e kaya: “Au kila ni na tucake tale ena gauna ni veivakaturi ena iotioti ni siga.” (Joni 11:24) E vakasakiti dina na nona vakabauta dei na ivakavuvuli qori. Eso na iliuliu vakaJiu era vakatokai na Setoki era sega ni vakabauta na veivakaturi, ia na ivakavuvuli ni veivakaturi e vakamatatataki tu ena vosa uqeti na iVolatabu. (Taniela 12:13; Marika 12:18) A kila o Marica ni vakavulica o Jisu na inuinui ni veivakaturi, sa vakaturi ira oti tale ga eso​—ia e sega ni dua a mate dede toka me vakataki Lasarusa. E sega gona ni kila na cava ena yaco.

A qai cavuta o Jisu e dua na itukutuku e guilecavi dredre: “O yau na tucake tale kei na bula.” Io, sa solia na Kalou o Jiova vei Luvena na kaukaua me na veivakaturi ena gauna se bera mai ena ivakatagedegede ena tara na vuravura taucoko. E tarogi Marica o Jisu: “O vakabauta?” A tukuna sara o Marica na veika a veivosakitaki ena itekivu ni ulutaga qo. E vakabauta ni o Jisu na Karisito se Mesaia, na Luve ni Kalou o Jiova ra qai parofisaitaka na parofita ni na lako mai vuravura.​—Joni 5:​28, 29; 11:​25-​27.

E talei beka vua na Kalou o Jiova kei na Luvena o Jisu Karisito na vakabauta va oya? E saumi vinaka qori ena veika a raica o Marica ni yaco tarava. A vakusakusa me lai kacivi tacina. E raica na rarawa i Jisu ni vosa tiko vei Meri kei na levu tale era lolosi vata tiko. A raica ni tuturu na wainimatana me vakaraitaka na vusolo ni lomana ena rarawa levu e vakilai ni dua e mate. E rogoca o Marica ni tukuna o Jisu me kau tani na vatu ena gusu ni ibulubulu i ganena.​—Joni 11:​28-​39.

A via tarovi Jisu o Marica ni tukuna ni sa na boi na yagoi Lasarusa ni sa va na siga na nona mate. E tukuna vua o Jisu: “Au a sega beka ni tukuna vei iko ke o vakabauta o na raica na lagilagi ni Kalou?” A vakabauta qori o Marica qai raica dina na lagilagi ni Kalou o Jiova. Ena gauna qori, a solia o Jiova na kaukaua vei Luvena me vakabulai Lasarusa! Vakasamataka mada na ka ena guilecava dredre o Marica me yacova ni mate: Na nona vakarota o Jisu, “Lasarusa, lako mai tuba!”; a tavasa na ibulubulu ni sasaga mai na gusu ni ibulubulu na tagane a mate e viviraki tu ena isolenimate. A mani kaya o Jisu, “sereka na isolenimate me lako”; ena levu ni nodrau marau o Marica kei Meri, erau cici yani rau qai mokoti ganedrau. (Joni 11:​40-​44) E seavu na rarawa i Marica!

Na itukutuku qo e vakaraitaka ni nodra vakaturi na mate e sega ni tadra wale ga; qo na ivakavuvuli veivakacegui ena iVolatabu, e vakadinadinataki tale ga ena itukutuku ni veigauna  ni a yaco dina. Erau vinakata sara ga na veitamani o Jiova kei Jisu me rau vakalougatataki ira na tamata vakabauta, me vaka ga rau cakava vei Marica, Meri kei Lasarusa. Erau na vakalougatataki iko tale ga ke kaukaua tiko ga na nomu vakabauta me vakataki Marica. *

“E Vakarau Kakana o Marica”

E cavuti Marica tale vakadua na iVolatabu. Qo na iotioti ni macawa ni nona bula e vuravura o Jisu. Ni kila vinaka na veika rarawa ena yaco vua, a digia tale o Jisu na vanua o Pecani me lai vakaicili kina. Ena taubaletaka e tolu na kilomita mai Pecani i Jerusalemi. Erau kana tiko o Jisu kei Lasarusa ena vale i Saimoni na vukavuka, qori tale ga na iotioti ni gauna e cavuti kina o Marica ni tukuni: “E vakarau kakana o Marica.”​—Joni 12:2.

Qo na nona ivakarau o Marica na marama mamakutu! Ena imatai ni gauna eda wilika kina na kena itukutuku ena iVolatabu, a ogaoga voli, ia na iotioti ni kena itukutuku, e se cakacaka voli ga qai solia na nona vinaka kece me qarava na veika me baleti ira tale eso. E kalougata na ivavakoso era lewena na imuri i Jisu nikua nira tu kina na marama era vakataki Marica​—era yalovinaka ra qai lomasavu nira cakava sara ga na ka era vakabauta, era sega ni tu suka. Qori na ka a rairai cakava tiko ga o Marica. E ka vakayalomatua ke a cakava qori, ni sa vakarau yaco qo e dua na ituvaki rarawataki sara.

Ena raica o Marica ena vica ga na siga qo na nona mate vakaloloma na nona Turaga o Jisu. Era saga tale ga na ilawalawa dauveivakaisini era vakamatei Jisu, mera vakamatei Lasarusa, ni nona vakaturi e vakavuna mera vakabauta e levu. (Joni 12:​9-​11) Na mate a qai tawasea dina na kedratou ivau ni veilomani na veiganeni. Eda sega ni kila na ka e yaco se na gauna e yaco kina, ia eda rawa ga ni vakadeitaka qo: A vosota tiko ga me yacova na iotioti o Marica ena vuku ni nona vakabauta. Qori na vuna mera vakatotomuria kina na lotu vaKarisito nikua na vakabauta i Marica.

[iVakamacala e ra]

[iYaloyalo ena tabana e 11]

Ena gauna sara mada ga ni nona lolosi, a laivi Jisu o Marica me dusimaki koya ena ka ena vakaukauataka na nona vakabauta

[iYaloyalo ena tabana e 12]

Ni ‘lomaocaoca qai nuiqawaqawa,’ a ciqoma o Marica na nona vakadodonutaki ena yalololoma

[iYaloyalo ena tabana e 15]

A vakalougatataki na nona vakabauti Jisu o Marica ni raica na nona vakaturi o ganena