E Veisautaka na Bula na iVolatabu

NA CAVA e vakatulewataka kina e dua e dau saqati ira na iVakadinadina i Jiova qai vica tu na watina me iVakadinadina? Na cava e veisautaka kina na ka e vakabauta e dua na italatala ni lotu Penitiko? A valuta vakacava na nona dau beci koya e dua na yalewa a vakalolomataki ni se gone, qai toro voleka vua na Kalou? Na cava e uqeta e dua e dau taleitaka na ivakatagi karakaravisa na heavy-metal me dua na italatala ni lotu? Wilika mada na ka eratou tukuna.

“Au sa Dua na Tagane Vakawati Vinaka.”—RIGOBERT HOUETO

SUCU: 1941

VANUA: BENIN

KA E KILAI KINA: VICA NA WATINA, SAQATI IRA NA IVAKADINADINA I JIOVA

NOQU BULA E LIU: Au cavutu mai Cotonou, e dua na siti levu e Benin. Au susugi ena lotu Katolika, ia au sega ni lako vakalevu i lotu. E levu na Katolika ena noqu vanua e vica tu na watidra ni vakalawataki qori ena gauna oya. Au mani vakawatitaka e va na yalewa.

A yaco na vakaduduile ena 1970 vakacaca. Niu nanuma ena yaga ena noqu vanua, au tokona sara na vakaduduile, au vakaitavi tale ga ena politiki. O ira na vakaduduile era sega ni taleitaki ira na iVakadinadina i Jiova nira tawaveitovaki tu ga. Au dua tale ga vei ira na saqati ira na iVakadinadina i Jiova. Nira vakatalai na daukaulotu ni iVakadinadina i Jiova ena 1976, au vakadeitaka sara ga nira na sega tale ni lesu mai.

VEISAUTAKI AU NA IVOLATABU: Ni oti na vakaduduile ena 1990, au kurabuitaka nira lesu tale mai na daukaulotu ni iVakadinadina i Jiova. Au vakasamataka kina de dua e tokoni ira na Kalou. Au veisautaka na noqu cakacaka donuya na gauna qori. E iVakadinadina i Jiova e dua na noqu itokani vou vakacakacaka, mani tukuna sara vei au na ka e vakabauta. A vakaraitaka vei au na tikinivolatabu e tukuna ni o Jiova e Kalou dauloloma, e dau lewadodonu tale ga. (Vakarua 32:4; 1 Joni 4:8) Niu taleitaka na itovo qori, au via vulica tale ga e levu tale na ka me baleti Jiova, au mani vakadonuya meu vulica na iVolatabu.

Au tekivu lakova na nodra soqoni na iVakadinadina i Jiova. Au qoroya na loloma dina au raica kina—e sega kina na veivakaduiduitaki vakamatatamata se vakamatailawalawa. Niu veimaliwai vakalevu kei ira na iVakadinadina i Jiova, au sa qai vakadeitaka ga nira imuri dina i Jisu.—Joni 13:35.

Au vakasamataka ni dodonu meu biuta na lotu Katolika keu via qaravi Jiova. E sega ni rawarawa qori niu leqataka na nodra nanuma eso tale. Sa oti e dua na gauna balavu, ena veivuke  tale ga i Jiova, au sa qai doudou meu kere vakacegu mai na lotu au lewena tu.

Ia e dua tale na veisau levu meu cakava. Au vulica ena iVolatabu ni sega ni vakadonuya o Jiova me dua e vica tu na watina. (Vakatekivu 2:18-24; Maciu 19:4-6) Ena nona rai, na imatai ga ni noqu vakawati e dodonu. Au vakalawataka na neirau vakawati, au vakatalai ratou na le tolu, au tuvanaka tale ga me vakarautaki na ka meratou bula kina. Ni toso na gauna, erau mai iVakadinadina i Jiova e rua na watiqu e liu.

KENA YAGA: E se Katolika tiko ga o watiqu, ia e doka na noqu vakatulewa meu qaravi Jiova. Keirau duavata niu sa dua na tagane vakawati vinaka.

Au dau nanuma niu na yaga ena noqu itikotiko keu vakaitavi ena politiki, ia e tawayaga na sasaga qori. Au sa kila qo ni iwali duadua ga ni noda leqa na Matanitu ni Kalou. (Maciu 6:9, 10) Au vakavinavinaka vei Jiova ni dusimaki au ena sala meu marautaka kina na noqu bula.

“E Sega ni Rawarawa na Noqu Veisau.”—ALEX LEMOS SILVA

SUCU: 1977

VANUA: BRAZIL

KA E KILAI KINA: ITALATALA NI PENITIKO

NOQU BULA E LIU: Au susu ena taudaku ni siti o Itu, ena yasana o São Paulo. E kilai na taoni qori ni levu kina na basulawa.

E voravora sara qai vakasisila na noqu itovo. Au dau volitaki wainimate gaga tale ga. Ia au biuta na ivakarau ni bula qori niu liaca niu na bala kina e valeniveivesu seu na tini kina ena ibulubulu. Au mani lewena na lotu Penitiko, au lai dua sara na kena italatala.

Au nanuma niu na vukei ira vinaka na lewenivanua ena noqu cakacaka ena lotu. E kaburaki tale ga ena dua na siteseni ni retio na noqu porokaramu ni lotu, era kilai au e levu ena yasayasa au tiko kina. Ia au raica ni o lotu e sega ni kauaitaki ira na lewena—sega tale ga ni kauaitaka na nona rokovi na Kalou. Au nanuma ni kauaitaka ga na kumuni ilavo, au mani kere vakacegu mai kina.

VEISAUTAKI AU NA IVOLATABU: Au raica niu se qai tekivu vuli iVolatabu ga kei ira na iVakadinadina i Jiova nira duidui mai na lotu tale eso. E rua na ka au qoroya. Kena imatai, era sega ni tukuna wale ga nira lomana na Kalou kei na kainodra; era vakaraitaka sara ga. Kena ikarua, era sega ni vakaitavi ena politiki se ivalu. (Aisea 2:4) Na rua na ka qori e vakadeitaka vei au niu sa kunea na lotu dina—na sala rabalailai e basika ina bula tawamudu.—Maciu 7:13, 14.

Au vakasamataka ni dodonu meu cakava eso na veiveisau levu meu vakamarautaka kina na Kalou. E dodonu meu kauaitaki ratou vakalevu na noqu vuvale, meu yalomalumalumu tale ga. E sega ni rawarawa na noqu veisau, ia au cakava rawa ena veivuke i Jiova. A drukataka o watiqu na veisau au cakava. A vulica e liu o koya na iVolatabu, qai toso  vinaka sara na nona vuli. Keirau vinakata me keirau iVakadinadina i Jiova, keirau mani papitaiso vata ga ena dua na siga.

KENA YAGA: Keirau marautaka tiko vakaveiwatini na neirau vukei ratou na luvei keirau me ratou veitokani voleka kei Jiova. Keitou vuvale mamarau. Au vakavinavinaka vei Jiova ni vagolei au mai na dina e volai ena nona Vosa, na iVolatabu. E veisautaka dina na bula! Au vakadinadinataka sara ga qori.

“E Savasava na Noqu Lewaeloma, sa Vakainaki na Noqu Bula, au Marau Tale ga.”—VICTORIA TONG

SUCU: 1957

VANUA: OSITERELIA

KA E KILAI KINA: VAKALOLOMATAKI NI SE GONE

NOQU BULA E LIU: Au susugi mai Newcastle, New South Wales. Au qase duadua vei keitou na le vitu na veitacini, e dau voravora na itovo nei Ta qai daumateni, e voravora tale ga na itovo nei Na. E dau vakalolomataki au o tinaqu ena ka e cakava kei na ka e tukuna. E dau tukuna vei au niu na lai vakararawataki i eli niu gone ca. Qori e vakarerei au sara ga.

Au calata vakalevu na vuli ni dau vakamavoataki au o tinaqu. Niu yabaki 11, au kau tani mai vei rau na noqu itubutubu, au lai biu e liu ena dua na vanua e tuvanaka na matanitu mera qaravi kina na gone vakataki au, oti au qai kau ina dua na itikotiko ni lotu Katolika. Au dro mai na vanua oya niu yabaki 14. Niu sega ni via lesu i vale, au mani lai tu ena salatu ni Kings Cross, e dua na yasayasa e Serene.

Au vakayagataka na wainimate gaga ena gauna qori, au gunu, cakava na ka e vakaraitaki ena iyaloyalo ca, au volitaki au tale ga. E dua na ka au sotava e vakarerei au sara ga. Au sa lai vakaitikotiko ena nona vale e dua na itaukei ni valenidanisi. Erau lai raici koya yani ena dua na yakavi e rua na tagane. A vakatalai au ina rumu, ia au rogoca rawa na ka eratou veitalanoataka. Sa veivosakitaka tiko na itaukei ni valenidanisi me volitaki au vei rau na tagane erau gole yani, erau na vakavodoki au vuni ena dua na waqa ni usa iyaya e gole i Japani meu lai cakacaka ena dua na valenigunu. E vuka sara ga na yaloqu, au mani lade mai na varada ni tabavale au tiko kina niu vaqara bula.

Au sotava sara e dua na tagane e gade yani i Serene, au vakamacalataka vua na kequ ituvaki au qai nanuma ni na solia vei au eso na ilavo. Ia a sureti au ina vanua e tiko kina meu lai sili au kana tale ga. Au sega tale ni biubiu mai na nona vale na tagane oya ni keirau vakamau ena yabaki tarava.

VEISAUTAKI AU NA IVOLATABU: A veiveisau na ivakarau ni lomaqu niu tekivu vuli iVolatabu kei ira na iVakadinadina i Jiova. Au cudru niu kila ni vakavuna na ca o Setani; au dau kila tu ga ni vakavuna tiko na Kalou na  noda rarawa. E cegu sara ga na lomaqu niu kila ni sega ni dau veivakararawataki i eli, qori e dua na ivakavuvuli e vakarerei au tu ena dua na gauna balavu.

Au qoroya na nodra yavutaka ena iVolatabu na nodra vakatulewa na iVakadinadina i Jiova. Era bulataka na ka era vakabauta. Au dau yalodredre, ia era lomani au, ra dokai au na iVakadinadina se mani cava au tukuna se cakava.

E bau dredre dina meu valuta na noqu dau beci au. Dua na ka noqu sevaki au, se tiko ga na rai qori ni oti mada ga e dua na gauna balavu na noqu papitaiso meu iVakadinadina i Jiova. Au kila niu lomani Jiova, ia au kila tale ga ni sega ni rawa ni lomana e dua me vakataki au.

Sa qai veisau na noqu rai ni oti e rauta na 15 na yabaki na noqu papitaiso. Ena dua na ivunau au rogoca ena nodra Kingdom Hall na iVakadinadina i Jiova, a cavuti kina na Jemesa 1:23, 24. Ena tikinivolatabu qori na Vosa ni Kalou e vaka na iloilo, e rawa nida raici keda kina ena nona rai o Jiova. Au vakasamataka de dua e duidui na noqu rai mai na rai i Jiova. Au sega ni taleitaka e liu na vakasama vou qori, niu se nanuma tiko ga ni dredre me lomani au o Jiova.

Oti e vica na siga, e dua na tikinivolatabu au wilika e veisautaka na noqu bula. Qori na Aisea 1:18, e tukuna kina o Jiova: “Dou mada mai, me tou veivosaki vata . . . ke sa vaka na ka kulakula na nomudoui valavala ca, sa na vulavula me vaka na uca-vulavula.” E vaka sara ga e tukuna tiko vei au o Jiova: “Lako mai Vicky, me daru veivosaki mada. Au kilai iko, na nomu cala, kei na lomamu—au lomani iko tale ga.”

Au sega ni moce ena bogi oya. Au se lomatarotarotaka tiko ga ni rawa ni lomani au o Jiova, ia au qai vakasamataka na isoro ni veivoli i Jisu. Sa qai matata vei au ni dua na gauna balavu e vosoti au voli mai kina o Jiova, e vakaraitaka vei au ena levu na sala ni lomani au. Ia e vaka meu tukuna tiko vua: “E sega ni veirauti na nomuni loloma me vakadeitaka ni oni kauaitaki au. E sega ni ganiti au na isoro i Luvemuni.” E vaka ga au viritaka lesu tiko vei Jiova na ivoli. Ia niu vakasamataka vakatitobu na iloloma uasivi na keda ivoli, au vakila ni lomani au dina o Jiova.

KENA YAGA: E savasava na noqu lewaeloma, sa vakainaki na noqu bula, au marau tale ga. Sa vinaka na noqu bula vakawati, au marau nira rawa ni vuli ena noqu ivakaraitaki e levu tale. Au sa volekati Jiova tale ga.

“Sa Saumi na Noqu Masu.”—SERGEY BOTANKIN

SUCU: 1974

VANUA: RUSIA

KA E KILAI KINA: TALEITAKA NA IVAKATAGI KARAKARAVISA

NOQU BULA E LIU: Au sucu e Votkinsk, na vanua e sucu tale ga kina na daunivucu rogo o Pyotr Ilich Tchaikovsky. E dravudravua na neitou vuvale. E levu na ka vinaka e dau cakava o tamaqu, ia na nona daumateni e dau tarai keitou tale ga kina na leqa.

E sega ni vinaka sara na noqu ka ni vuli, au beci au kina ni toso na yabaki. Au dau via tu taudua ga, au sega tale ga ni nuitaka e dua, au vakacauoca na lai vuli. Kena  ivakaraitaki, ni vinakati meu vakamacala, e dau dredre meu vakamacalataka na ka rawarawa au rawa ni tukuna ena so tale na gauna. Ni oti na noqu vuli ena kalasi walu, e tukuni ena noqu ripote: “E lailai na vosa e kila, e sega ni rawa ni tukuna na nona nanuma.” Qori e vakayalolailaitaki au sara ga, au sa qai beci au ga vakalevu. Au veinanuyaka kina na inaki ni noqu bula.

Au tekivu gunu niu se itabagone. Qori e vakacegui au ena loma ni dua na gauna. Ia e vakaleqa tale na noqu lewaeloma na noqu gunu sivia. E vaka ga e sega tu ni vakainaki na noqu bula. Au lomabibi vakalevu, eso tale ga na gauna au via tu ga e vale me vica vata na siga. Au vakasamataka tale ga de vinaka meu vakamatei au.

Au kunea e dua na ivurevure vou ni vakacegu niu yabaki 20, na ivakatagi karakaravisa na heavy-metal. E vaka e dau solia vei au na igu na ivakatagi va qori, au vaqarai ira tale ga era dau taleitaka. Au vakatubuulu, vakasau, qai vakamuria na nodra isulusulu na daunivakatagi au dau sakitaka. Ni toso na gauna, au vakaveitaliataka na noqu bula qai voravora na noqu itovo, au dau veiba tale ga kei ratou e vale.

Au nanuma ni na vakamarautaki au na ivakatagi karakaravisa, ia e yaco ga na kena veibasai. Sa veisau sara na noqu ivakarau ni bula! Au vakila niu dabuitaki niu rogoca eso na ka ca era cakava na daunivakatagi rogo au dau sakitaka.

Au sa qai vakasamataka ga vakalevu meu vakamatei au. Na ka ga e tarovi au na noqu vakasamataka na rarawa ena vakila o tinaqu. Dua na ka nona lomani au, e levu tale ga na ka sa cakava vei au. Sa bau mosimosi dina na ituvaki qori. Au vinakata meu mate, ia au sega ni rawa ni vakamatei au.

Au mani vakawilika eso na ivola vakaRusia meu vakawelei tu kina. E dua na italanoa au wilika e baleta e dua na tagane qaqa e veiqaravi ena lotu. Qori e uqeti au sara ga meu cakava e dua na ka vua na Kalou kei ira tale eso. Au talaucaka na lomaqu vua na Kalou ena masu, na ka au sega ni dau cakava e liu. Au kerea vua na Kalou me vakaraitaka vei au na sala me vakainaki kina na noqu bula. Au lomavakacegu sara ga niu masu tiko. Ia e vakasakiti sara na ka e yaco tarava. Ni oti ga e rua na aua, e sikovi au mai e vale e dua na iVakadinadina i Jiova qai sureti au meu vulica na iVolatabu. Au vakabauta ni sa saumi na noqu masu. Au sa tekivu marautaka sara ga e keri na noqu bula vou.

VEISAUTAKI AU NA IVOLATABU: E dredre dina meu kolotaka laivi na ka kece e tu vei au me baleta na ivakatagi karakaravisa, ia au cakava ga. E leqa ga ni dredre me seavu mai na noqu vakasama na ivakatagi oya. Na gauna kece au lako sivita kina e dua na vanua e vakatagitaki tiko kina, au dau lai nanuma sara na noqu bula e liu. Au sega ni vinakata meu vakasamataka na veika au cakava e liu, ni levu na veika vinaka e sa vakatawani tiko ena noqu vakasama kei na lomaqu. Au mani nakita meu yawaka na vanua va qori. Niu temaki meu vakasamataka na veika sa oti, au dau masu vagumatua. Niu cakava qori, au vakila na “vakacegu ni Kalou e uasivia na vakasama kece.”—Filipai 4:7.

Au vulica ena iVolatabu ni nodra itavi na lotu vaKarisito mera tukuna na ka era vakabauta vei ira tale eso. (Maciu 28:19, 20) Au vakabauta mai vu ni lomaqu niu sega ni rawa ni cakava qori. Ia au marau qai lomavakacegu ena veika vovou au vulica tiko ena gauna vata qori. Au kila ni bibi mera kila tale eso na ka dina. Au rere ni tukuna vei ira tale eso na ka au sa vulica tiko, ia au cakava ga. Au kurabui ni vakanuideitaki au na noqu tukuna vei ira tale eso na ka e kaya na iVolatabu. E vakaukauataka tale ga na noqu vakabauta na veika vovou au sa vulica.

KENA YAGA: Au marautaka tiko na noqu bula vakawati, au vukei ira tale ga e vica mera kila na iVolatabu, wili kina o ganequ kei tinaqu. Sa qai vakainaki dina na noqu bula niu qarava na Kalou, au vukei ira tale ga eso tale mera vulica na veika me baleti koya.