Me Sauma na iVolatabu

O na Kila Vakacava na Sokalou Dina?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. E dua ga na lotu dina?

E dua ga na lotu a vakavulici ratou kina na nona imuri o Jisu, oya na lotu dina. Na lotu qori e vaka na sala e basika ina bula. A tukuna o Jisu me baleta na sala qori: “[E] vica wale sara era kunea.” (Maciu 7:14) Na Kalou e vakadonuya ga na sokalou e yavutaki ena ka dina ena nona Vosa. O ira kece na dausokalou dina era duavata ena vakabauta.—Wilika Joni 4:23, 24; 14:6; Efeso 4:4, 5.

2. Na cava era tukuna kina e levu na lotu nira lotu vaKarisito?

Era vakadukadukalitaka na ivakavuvuli vaKarisito na parofita vakailasu ra qai vakatanitaka me yaga ga vei ira. Me vaka ga e parofisaitaka o Jisu, era tukuna o ira qori nira “sipi,” ia na nodra itovo e vaka na olifa daukata. (Maciu 7:13-15, 21, 23) A tete na ivakavuvuli lasu ni ratou sa mate na yapositolo i Jisu. —Wilika Cakacaka 20:29, 30.

3. Na cava eso na ka ena kilai kina na sokalou dina?

O ira na dausokalou dina era doka na iVolatabu ni Vosa ni Kalou. Era saga mera muria na kena ivakavuvuli. E duidui gona na lotu dina mai na lotu e muria na ivakavuvuli vakatamata. (Maciu 15:7-9) O ira na dausokalou dina era bulataka na ka era tukuna. —Wilika Joni 17:17; 2 Timoci 3:16, 17.

Na lotu dina e rokova na yaca ni Kalou, o Jiova. A dau vakatakila o Jisu na yaca ni Kalou. A vukei ira na tamata mera kila na Kalou, a vakavulici ira tale ga mera masuta me dokai na yaca ni Kalou. (Maciu 6:9) Na lotu cava ena nomu itikotiko e uqeta me vakayagataki na yaca ni Kalou?—Wilika Joni 17:26; Roma 10:13, 14.

  4. O na kilai ira vakacava na dausokalou dina?

Era vunautaka na Matanitu ni Kalou na lotu vaKarisito dina. A talai Jisu mai vuravura na Kalou me vunautaka na Matanitu ni Kalou. Qori na inuinui duadua ga ni kawatamata. A vunautaka tiko qori o Jisu me yacova sara na siga a mate kina. (Luke 4:43; 8:1; 23:42, 43) A tukuna vei ira na nona imuri mera vunautaka na Matanitu ni Kalou. Na lotu cava o nanuma ni lewena o koya e vunautaka vei iko na itukutuku vinaka ni Matanitu ni Kalou?—Wilika Maciu 10:7; 24:14.

Era sega ni vakavuravura na imuri i Jisu. Era sega ni vakaitavi ena politiki se veileti vakamatatamata. (Joni 17:16) Era sega tale ga ni vakatotomuria na ivakarau ca ni vuravura kei na kena ivakarau ni rai.—Wilika Jemesa 1:27; 4:4.

5. Na cava era kilai tani kina na lotu vaKarisito dina?

E vakasakiti na nodra veilomani na lotu vaKarisito dina. Era vulica ena Vosa ni Kalou mera dokai ira na matatamata kece. E tokona vakalevu o lotu lasu na nodra veiraravui na veivanua, ia era sega ni cakava qori na dausokalou dina. (Maika 4:1-4) Era sega ni nanumi ira ga nira vakayagataka na nodra gauna kei na iyau mera veivuke kina ra qai veivakayaloqaqataki.—Wilika Joni 13:34, 35; 1 Joni 4:20, 21.

Na ilawalawa cava era yavutaka ena Vosa ni Kalou na ivakavuvuli kece era muria, era rokova na yaca ni Kalou ra qai vunautaka na Matanitu ni Kalou me inuinui duadua ga ni kawatamata? Na ilawalawa cava era dauveilomani ra qai sega ni tokona na ivalu? E vakadinadinataki ni qori o ira na iVakadinadina i Jiova.—1 Joni 3:10-12.

Me ikuri ni ivakamacala, raica na wase 15 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.

[iYaloyalo ena tabana e 16]

“Era tukuna raraba nira kila na Kalou, ia era cakitaki koya ena ka era cakava.”—Taito 1:16