Ena Rawa Vakacava mo Toro Voleka Vua na Kalou?
Me Sauma na iVolatabu
Ena Rawa Vakacava mo Toro Voleka Vua na Kalou?
Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.
1. E rogoca na Kalou na masu kece?
E sureti ira na matatamata kece o Jiova mera toro voleka vua ena masu. (Same 65:2) Ia e sega ni rogoca na masu kece. Kena ivakaraitaki, nira caka ca tiko ga na Isireli a sega ni rogoca na Kalou na nodra masu. (Aisea 1:15) Ena tarovi tale ga na nona masu na tagane e dauvakalolomataki watina. (1 Pita 3:7) Ia ke dua e cala bibi qai veivutuni dina, ena rogoca na Kalou na nona masu.—Wilika 2 Veigauna 33:9-13.
2. Meda masu vakacava?
Ni ka dokai meda masu vua na Kalou qai wili me ivalavala ni sokalou, e dodonu gona meda masu ga vei Jiova. (Maciu 4:10; 6:9) Nida ivalavala ca, e bibi meda masu ena yaca i Jisu ni o koya ga na “sala.” (Joni 14:6) E sega ni vinakata o Jiova meda cavuta tiko ga na qaqanimasu e wiligusutaki se volai, ia me vu mai lomada na noda masu.—Wilika Maciu 6:7; Filipai 4:6, 7.
E rawa mada ga ni rogoca na Dauveibuli na masu lo. (1 Samuela 1:12, 13) E sureti keda meda masu e veigauna, kena ivakaraitaki ena mataka se nida vakarau moce, ena gauna ni kana, se gauna ni leqa.—Wilika Same 55:22; Maciu 15:36.
3. Na cava era dau soqoni vata kina na lotu vaKarisito?
E sega ni rawarawa na noda toro voleka vua na Kalou nida bula maliwai ira era sega ni vakabauti koya ra qai vakasewasewana na nona yalayala me baleta na bula sautu e vuravura. (2 Timoci 3:1, 4; 2 Pita 3:3, 13) E bibi gona me veivakayaloqaqataki na noda veimaliwai kei ira eda vakabauta vata.—Wilika Iperiu 10:24, 25.
O rawa ni toro voleka vua na Kalou ke o veitokani kei ira era lomani koya. Na nodra soqoni na iVakadinadina i Jiova e gauna vinaka mo vakayaloqaqataki kina ena nodra vakabauta eso tale.—Wilika Roma 1:11, 12.
4. Ena rawa vakacava mo toro voleka vua na Kalou?
O na rawa ni toro voleka vua na Kalou ke o vakasamataka vakatitobu na ka o vulica ena nona Vosa. Vakananuma na ka e cakava, nona veidusimaki kei na veika e yalataka. Ni o masu qai vakasama vakatitobu, o na vakavinavinakataka na loloma ni Kalou kei na nona vuku.—Wilika Josua 1:8; Same 1:1-3.
O na rawa ga ni toro voleka vua na Kalou ke o nuitaki koya, o vakabauti koya tale ga. Ia na vakabauta e vaka e dua na kabula e vinakati me vakani tiko ga. E dodonu mo vakania wasoma na nomu vakabauta se o vakaukauataka tiko ga ni o railesuva na veika e yavutaki kina.—Wilika 1 Cesalonaika 5:21; Iperiu 11:1, 6.
5. Ena yaga vakacava na nomu toro voleka vua na Kalou?
O Jiova e kauaitaki ira era lomani koya. E taqomaki ira mai na veika ena vakaleqa na nodra vakabauta kei na nodra inuinui ni bula tawamudu. (Same 91:1, 2, 7-10) E vakasalataki keda ena veika e rawa ni vakaleqa na noda bula kei na noda marau. E vakavulici keda o Jiova ena ivakarau ni bula vinaka duadua.—Wilika Same 73:27, 28; Jemesa 4:4, 8.
Me ikuri ni ivakamacala, raica na wase 17 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.