Toro Voleka Vua na Kalou

“I Jiova, ko ni . . . Kilai Au”

“NA ICOLACOLA levu duadua e rawa ni colata e dua oya na nona kila ni sega ni kauaitaki se sega ni kilai na veika e sotava tiko,”a vola o Arthur H. Stainback. * E va tale ga qori na nomu rai? O nanuma ni sega ni dua e kauaitaki iko se kila na veika o sotava se na veika e tu e lomamu? Ke vaka kina, ena rairai vakacegui iko qo: E kauaitaki ira vakalevu era sokaloutaki koya o Jiova, e kila na ka kece e yaco ena nodra bula e veisiga. Na ka dina qori e vakadeitaki vei keda ena vosa i Tevita ena Same 139.

E nuidei o Tevita ni kauaitaki koya na Kalou, e kaya: “I Jiova, ko ni sa dikevi au, ka kilai au.” (Tikina e 1) E totoka na sala e vakamacalataka kina qori o Tevita. Na vosa vakaIperiu e vakadewataki me “dikevi” e rawa ni kena ibalebale tale ga na keli vatutalei (Jope 28:3), kena raici e dua na vanua (Dauveilewai 18:2), se na itukutuku ni dua na kisi ni veilewai (Vakarua 13:14). Io, e kilai keda vinaka o Jiova me vaka ga e sa dikeva kece na ka me baleti keda. Ni cavuta o Tevita na vosa “au,” eda vulica kina ni Kalou e kauaitaki ira dina na nona tamata. E kilai ira yadudua tale ga ni dikevi ira.

E vakarabailevutaka o Tevita na nona dikevi keda vinaka na Kalou ni tukuna: “O ni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko.” (Tikina e 2) E “yawa” o Jiova ena vakasama ni tiko mai lomalagi. Ia e kila na gauna eda dabe kina, rairai ni oti na cakacaka ena dua na siga, qai kila na noda duri cake ena mataka meda cakava na veika e vauca na noda bula e veisiga. E kila tale ga na noda vakanananu, noda gagadre kei na noda inaki. E rivarivabi beka o Tevita ni dikevi koya vinaka va qori na Kalou? Sega, e marautaka sara ga. (Tikina e 23, 24) Na vuna?

E kila ni vinaka na inaki e dikevi ira kina na nona tamata o Jiova. E tukuna vakadodonu o Tevita na inaki qori ni vola: “O ni sa vakatovolea na noqui lakolako kei na noqui kotokoto, a sa kila deivaka na noqui valavala kecega.” (Tikina e 3) O Jiova e raica na ‘noda ivalavala kece ga’ e veisiga—na noda cala kei na veika vinaka eda cakava. Ia e kauai vakalevu ena ca se na vinaka? Na vosa vakaIperiu e vakadewataki me “vakatovolea” e rawa ni kena ibalebale na “samaka” se “ceburaka,” me vaka e dau cakava na dauteitei ena nona ceburaka na vua ni witi me cagina laivi na qana qai vo ga na ka me laukana. Ia na matavosa “kila deivaka” e vakadewataka na vosa vakaIperiu e kena ibalebale “vakamareqeta.” Ni dikeva o Jiova na veika era cakava e veisiga na nona dauveiqaravi, e vakamareqeta na veika vinaka. Na vuna? E vakamareqeta na nodra sasaga mera vakamarautaki koya.

Eda vulica ena Same 139 ni o Jiova e kauaitaki ira dina era sokalou vua. E dikevi ira vinaka qai vakaraici ira voli nira cakava na veika e vauca na nodra bula e veisiga. E kila na leqa era sotava, na curuoso ni nodra vakasama kei na mosi ni yalodra ena ituvaki dredre era sotava. E uqeti iko beka qori mo qarava na Kalou e dauveikauaitaki? Ke vaka kina, me vakanuideitaki iko qo: O Jiova ena sega ni ‘guilecava na nomu cakacaka kei na nomu kauaitaka dina na yacana.’—Iperiu 6:10.

Wili iVolatabu e Vakatututaki ena Seviteba:

◼ Same 119-150

[iVakamacala e ra]