Yavu ni Vuvale Mamarau

Drau Sasagataka Vakaveiwatini na Veika Vakayalo

Veresi *: “Ni keirau se qai vakawati ga, au surevaka me keirau vulica vakaveiwatini na iVolatabu. Au saga me vakarorogo vinaka o Lina ena gauna ni vuli, ia ena yamasamasa toka ga. Niu dau taro, ena sauma ga na io se na sega. E sega ni sauma vinaka sara na taro me vaka au namaka ni caka na vuli iVolatabu.”

Lina: “Keirau vakamau kei Veresi niu yabaki 18. Keirau vuli iVolatabu wasoma, ia na gauna keirau vuli kina e dau kauta cake mai na noqu malumalumu kei na sala meu vakayacora vinaka kina na noqu itavi vakaradinivale. Dua na ka noqu rarawa, au yalolailai tale ga!”

NA CAVA na nodrau leqa o Veresi kei Lina? E vinaka ruarua na nodrau inaki, erau lomana na Kalou, rau raica tale ga ni bibi me rau vulica vata na iVolatabu. E dodonu me vakaduavatataki rau qori, ia e qai yaco na kena veibasai. Erau vulica vata na iVolatabu, ia erau sega ni sasagataka vakaveiwatini na veika vakayalo.

Na cava na veika vakayalo? Na cava me rau sasagataka kina na veika vakayalo na veiwatini? Na leqa cava e rawa ni yaco, erau na walia vakacava?

Na Cava na Veika Vakayalo?

E tukuna na iVolatabu na nodra ivakarau ni rai eso me baleta na bula. (Juta 18, 19) Me kena ivakaraitaki, a vakabibitaka na dauvola iVolatabu o Paula na kedrau duidui na tamata vakayago kei na tamata vakayalo. E kaya ni o ira e vakayago na nodra rai era sega ni dauveinanumi, era cakava na ka ga era nanuma ni donu, ra qai sega ni muria na ivakatagedegede ni Kalou.—1 Korinica 2:14; Kalatia 5:19, 20.

Ia e duidui sara o ira e vakayalo na nodra rai nira muria na ivakatagedegede ni Kalou. Era okati Jiova me nodra itokani ra qai saga mera vakatotomuria na nona itovo. (Efeso 5:1) Oya  na vuna era dauloloma kina, ra veikauaitaki, ra qai yalomalua nira veimaliwai. (Lako Yani 34:6) Era na talairawarawa tiko ga vua na Kalou ke mani dredre mada ga mera cakava qori. (Same 15:1, 4) O Darren sa 35 na yabaki na nona vakamau e vakaitikotiko mai Kenada, e kaya: “Au nanuma ni o koya e matua vakayalo ena kauaitaka se na tara vakacava na nona veiwekani kei na Kalou na ka e tukuna kei na ka e cakava.” E tomana na watina o Jane: “Au nanuma ni yalewa e matua vakayalo ena sasagataka e veisiga me vakaitovotaka na itovo e umani ena vua ni yalo tabu.”—Kalatia 5:22, 23.

E sega ni gadrevi sara me vakawati e dua me qai tiko vua na rai vakayalo. Na iVolatabu e uqeti keda kece meda vulica na veika me baleta na Kalou da qai vakatotomuri koya.—Cakacaka 17:26, 27.

Sasagataka Vakaveiwatini na Veika Vakayalo

Na cava me sasagataki kina vakaveiwatini na veika vakayalo? Raica mada na ivakatautauvata qo: Erau taukena e dua na qele e rua na dauteitei, rau via tei kakana draudrau. E dua vei rau e via teitei sara, ia o kena ikarua e kaya me qai caka vakamalua. Dua vei rau e via vakayagataka e dua na mataqali maniwa, ia o kena ikarua e sega ni taleitaka. Dua vei rau e ogaoga ena iteitei, o kena ikarua e sega ni via cakava e dua na ka. De dua ena tamusuki eso na itei, ia ena levu sara na ka erau rawata ke rau duavata ena nodrau vakatulewa rau qai cakacakavata.

Erau va tale ga qori na veiwatini. Ke dua ga vei rau e sasagataka na veika vakayalo, ena vinaka toka na nodrau bula vakawati. (1 Pita 3:1, 2) Ia ena vinaka sara ke rau duavata me rau muria na ivakatagedegede ni Kalou rau qai veitokonitaka nodrau qarava na Kalou! A vola na tui vuku o Solomoni: “Sa vinaka ni lewe rua ka ca ni le dua bauga.” Na vuna? “Ni rau sa rawata nai voli vinaka ni nodrau cakacaka. Kevaka sa bale a dua, ena tubera cake na kenai sa.”—Dauvunau 4:9, 10.

O na rairai vinakata mo drau sasagataka vakaveiwatini na veika vakayalo. Ia me vaka ga na teitei, ena qai rawa ga na ka drau vinakata ke drau cakava kina e dua na ka. Raica mada e rua na leqa e rawa ni yaco kei na ka e rawa ni caka me wali kina.

KENA IMATAI: Sega na gauna. “Dau mai kauti au o watiqu ni suka na cakacaka ena 7 na kaloko na bogi” e kaya o Sue se qai vakawati ga. “Ni keirau yaco i vale, sa tu na ka me keirau cakava. E gu na lomai keirau me keirau vulica vata na veika me baleta na Kalou, ia e wawale na yago, keirau sa vinakata ga na vakacegu.”

Ka e rawa ni caka: Yalorawarawa qai veitokoni. E kaya o Sue: “Keirau vakatulewataka vakaveiwatini me keirau yadra vakamataka, wilika qai veivosakitaka na iVolatabu ni bera ni keirau lai cakacaka. E vukei au tale ga o watiqu ena so na itavi e vale, qori na gauna keirau rawa ni marautaka vata.” E yaga vakacava na nodrau cakava qori? E kaya o Ed na wati Sue: “Ni keirau veivosakitaka wasoma na veika vakayalo, e rawarawa sara me keirau walia na neirau leqa kei na veika keirau nuiqawaqawataka.”

Me ikuri ni nomudrau veivosaki vakaveiwatini, ena vinaka me tiko na gauna mo drau masu vata kina e veisiga. Ena yaga vakacava qori? O Ryan sa 16 na yabaki nona vakamau e kaya: “A tadre toka na neirau bula vakawati ena dua na gauna lekaleka ga qo. Ia keirau saga me keirau masu vata e veibogi qai talaucaka vua na Kalou na neirau leqa. A wali na neirau leqa ni keirau masu vata qai vakilai tale na marau ena neirau bula vakawati.”

TOVOLEA MADA QO: Drau rawa ni veivosakitaka vakaveiwatini eso na ka vinaka drau sotava ena dua na siga, qori na ka drau rawa ni vakavinavinakataka vua na Kalou. Drau rawa ni veivosakitaka tale ga eso na  leqa drau na vinakata kina na veivuke ni Kalou mo drau rawa ni walia. Me qarauni: Me kua ni veivosakitaki ena gauna qori na nomudrau dui malumalumu. Ni drau masu vata me talaucaki ga na veika mo drau vakavinakataka ruarua, drau qai saga mo drau bulataka.

KENA IKARUA: Duidui na ka keirau rawa ni cakava. E kaya o Tony: “Au sega ni dau taleitaka na wilivola.” E kaya na watina o Natalie: “Au dau taleitaka na wilivola, meu veitalanoataka tale ga na veika au vulica. Au nanuma ena so na gauna ni dau lomaleqa o Tony ni keirau veitalanoa ena iVolatabu.”

Ka e rawa ni caka: Dauveitokoni, kua ni veisisivi se veivakalewai. Vakacaucautaki watimu ena veika vinaka e cakava. E kaya o Tony: “Ena so na gauna e veivakadrukai tale na nona dau via veitalanoa ena iVolatabu o watiqu. Au sega soti ni taleitaka e liu me keirau dau veitalanoataka na veika vakayalo, ia e dau veitokoni o Natalie. Keirau sa veitalanoataka wasoma ena gauna qo na veika vakayalo, au raica tale ga ni sega ni dodonu meu leqataka e dua na ka. Au dau marautaka na neirau veitalanoa, keirau lomavakacegu kina qai veiyaloni.”

E levu na veiwatini era tukuna ni vakavinakataka na nodra vakawati na nodra dau wilika qai vulica vata na iVolatabu e veimacawa. Me qarauni: Ni o wilika e dua na ivakasala vakaivolatabu, raica na sala o rawa ni vakaitovotaka kina, sega ni ka me vakaitovotaka o watimu. (Kalatia 6:4) Me kua ni veivosakitaki ena gauna ni vuli na ka e rawa ni vakavu veiba, me caka qori ena dua tale na gauna. Na vuna?

Vakasamataka mada: O na savata qai vadretitaka e dua na mavoa e kakana tu ni dou kana vakavuvale? Sega, ni na oti sara ga kina na nodratou via kana na nomu vuvale. E vakatauvatana o Jisu ina kakana na noda vulica kei na noda vakayacora na loma ni Kalou. (Maciu 4:4; Joni 4:34) Ke o dau tukuna na ka vakamosiyalo ena gauna kece e veivosakitaki kina na iVolatabu, e rawa ni seavu na nona taleitaka o watimu na veika vakayalo. E macala ni dodonu mo drau veivosakitaka na leqa, ia me caka qori ena dua tale na gauna veiganiti.—Vosa Vakaibalebale 10:19; 15:23.

TOVOLEA MADA QO: Vola e rua se tolu na itovo i watimu o taleitaka vakalevu. Ni drau veitalanoa tale ena iVolatabu qai vakamacalataki kina na itovo qori, tukuna sara vei watimu na levu ni nomu marautaka na sala e dau vakaraitaka kina.

Tamusuka na ka o Kaburaka

Ke drau kaburaka se sasagataka vakaveiwatini na veika vakayalo, ena vakilai vakalevu ena nomudrau vakawati na vakacegu kei na marau. E tukuna vakamatata na iVolatabu ni “ka kece ga e kaburaka e dua ena tamusuka tale ga.”—Kalatia 6:7.

Erau vakadinadinataka na ivakavuvuli vakaivolatabu qori o Veresi kei Lina, rau cavuti ena itekivu ni ulutaga qo. Ena 45 na yabaki ni nodrau vakawati, erau vakadinata na yaga ni nodrau sasagataka vakaveiwatini na veika vakayalo. “Au dau beitaki watiqu ni sega ni dauveivosaki,” e kaya o Veresi. “Ia ni toso na gauna au vakasamataka ni na vinakati tale ga meu cakava kina e dua na ka.” E kaya o Lina: “Na neirau lomani Jiova e yaga vakalevu ena veika dredre keirau sotava. Ena veiyabaki sa sivi me yacova mai qo, keirau vuli iVolatabu wasoma keirau masu vata tale ga. Au raica tale ga ni saga tiko vakaukaua o Veresi me dau vakaraitaka na itovo vaKarisito, qori e vakarawarawataka na noqu lomani koya.”

[iVakamacala e ra]

TAROGA . . .

▪ Gauna cava sara mada au a masu vata kina kei watiqu?

▪ Na cava meu cakava me rawa ni talaucaka kina na lomana o watiqu ni keirau veivosakitaka na veika vakayalo?