E Bibi mo Kila na Kena iSau?

“Au vakaitau niu se qai yabaki tini. E liu, keirau dau veitauriliga ga keirau veireguci kei na noqu itau. Sega ni dede keirau sa veiyagoi yago tabu, keirau vakatovolea tale ga na iwalewale eso ni veiyacovi. Au tekivu cakacaka niu yabaki 15 ra qai dau vinakata na tagane e vanua ni cakacaka me keimami veiyacovi. Au via vakatovolea na ka, meu tomani ira tale ga na noqu ilala ena ka era cakava. Niu vinakata mera ciqomi au na noqu itokani au sa qai veiyacovi ga kina vakalevu.”—SERA, * OSITERELIA.

O NA rairai kurabuitaka nomu kila ni a tuberi mai o Sera ena dua na vuvale lotu. Erau saga na nona itubutubu me rau tuberi koya me muria na ivakatagedegede vakaivolatabu me baleta na itovo, ia a sega ni via muria qori.

Era na rairai duavata e levu ena vakatulewa i Sera. Era nanuma ni sa madra na ka e tukuna na iVolatabu me baleta na veiyacovi. Eso tale era nanuma ni sega ni cala ke o tukuna ni o daulotu o qai cakava ga na ka o vinakata me baleta na veiyacovi.

E bibi beka mo kila qai muria na ka e tukuni ena iVolatabu me baleta na veiyacovi? E tukuni ena iVolatabu ni ‘Kalou e vakavuna na kena volai, e yaga me veivakavulici.’ (2 Timoci 3:16) Ke o vakabauta ni buli keda na Kalou, e vakavuna tale ga na volai ni iVolatabu, o na vakadinata ni bibi meda kila na ka e tukuna me baleta na veiyacovi.

E rarawataki ni levu era veilecayaki ena ivakavuvuli vakaivolatabu me baleta na veiyacovi. E veicalati na nodra ivakavuvuli na iliuliu ni lotu era tukuna nira doka na iVolatabu. Na ivakavuvuli qori era tawase kina e levu na matalotu lelevu.

Vakacava mo dikeva sara ga na ka e tukuna na iVolatabu me baleta na veiyacovi, kua ni rogoca ga na ka era tukuna na so. Ena veivosakitaki ena ulutaga tarava na rai ni iVolatabu ena tini na taro e tarogi vakalevu me baleta na veiyacovi. O na raica tale ga kina na kena isau dodonu e yavutaki ena ka sara ga e tukuna na iVolatabu. Ena qai veivosakitaki ena ikatolu ni ulutaga na vuna e bibi kina na vakatulewa eda cakava.

[iVakamacala e ra]