Taro na Dauwiliwili  . . .

Mera Vakavulici Luvedra Beka na iTubutubu ena Ka me Baleta na Veiyacovi?

▪ Dua na ka nodra sasaga e levu na itubutubu mera taqomaki luvedra mai na mate rerevaki. Mera saga tale ga vakaukaua mera taqomaki luvedra mai na veika e rawa ni vakaleqai ira. Era rawa ni cakava qori ena nodra vakavulici ira ena ka dodonu me baleta na veiyacovi. (Vosa Vakaibalebale 5:3-23) E bibi me rau veivakavulici na itubutubu rau qai veidusimaki, ni levu tale na sala era rawa ni vulica kina na gone na veika me baleta na veiyacovi me vaka na tivi, internet, ivola kei na komiki.

E tukuna o Diane Levin e parofesa ena tabana ni vuli e dauvolaivola tale ga: “E sega ni leqa na nodra vakavulici nikua na gone ena veika me baleta na veiyacovi. E leqataki ga na veika era vulica, na yabaki era vulica kina, vaka kina o ira na veivakavulici. Era rawa ni bacani na gone mera vulica na veika me baleta na veiyacovi ena nodra itukutuku na dauveivoli kei na ivakarau ni bula sa takalevu tu nikua, ia qori ena vakaleqai ira.”

E bibi mera taqomaki luvedra na itubutubu mai na rai cala qai dukadukali e vakavuna na kena torosobu tiko ga nikua na bula. (Vosa Vakaibalebale 5:1; Efeso 6:4) Mera vakavulici na gone nira se lalai ena veika me baleta na yagodra kei na ka mera cakava, mera qarauni ira tale ga mai vei ira na tamata ca. Ni bera ni vakila o gone na veiveisau e yagona—de vinaka me rau vakamacalataka na itubutubu vei luvedrau yalewa na vuna ena matenivula kina, e yaco tale ga vakacava qori. Me rau vakamacalataka tale ga vei luvedrau tagane na ka me baleta na bura ni wainitagane, ni rawa ni yaco tale ga qori ni dua e tadra na veiyacovi. Nira se lalai na gone, mera veivakavulici na itubutubu ena yaca dodonu ni veitikiniyago. Na itubutubu dauloloma ena vakavulici luvena ena tolu na ka bibi: (1) Na veitikiniyago qori e ka tabu. (2) E sega ni dodonu me veivosakitaki vakatani. (3) E sega ni dodonu me tara e dua tale se vakaraitaki vua. Nira tubucake tiko, me rau vakasamataka na itubutubu na gauna me vakamacalataki kina na nodrau tiko vata na tagane kei na yalewa me qai sucu e dua na gone. *

Me tekivu ena gauna cava nodrau veivakavulici na itubutubu? E rawa ni caka totolo sara qori mai na gauna era rairai namaka e levu. Na nona matenivula e dua na goneyalewa e rawa ni tekivu ni se qai yabaki 10 se ni bera na yabaki oya. E rawa ni tekivu bura na nona wai e dua na tagane ni se qai yabaki 11 se yabaki 12. Era na veilecayaki na gone ena veiveisau e yaco ena nodra bula ke sega ni vakamacalataki rawa vei ira. Me tukuni vakailiu vei ira mera kua ni lomaleqa ke ra vakila na veiveisau e yagodra. Qori e gauna vinaka tale ga mera vukei kina na gone mera kila na yaga kei na bibi ni nodra muria na ivakatagedegede ni itovo savasava ena iVolatabu. E sega ni vakarautaki na idusidusi qori ena porokaramu e tuvanaki nikua me vakavulici kina na veika me baleta na veiyacovi.—Vosa Vakaibalebale 6:27-35.

[iVakamacala e ra]