Taro na Dauwiliwili . . .

Na cava a kerei Eparama kina na Kalou me cabori luvena?

▪ E volatukutukutaki ena Vakatekivu ni Kalou o Jiova a kerei Eparama me cabora na luvena tagane o Aisake me isoro. (Vakatekivu 22:2) Eso na dauwili iVolatabu e dredre na nodra kila na ibalebale ni italanoa qori. E kaya e dua na parofesa o Carol: “Niu rogoca na italanoa qori niu se gone, dua na ka noqu cudru. Na Kalou vakacava ena kerea qori?” E macala ni na va tale ga oya na noda rai, ia e vinaka meda nanuma eso na tikina bibi.

Kena imatai, meda raica mada na ka e sega ni cakava o Jiova. A sega ni vakalaiva o Jiova me cabori luvena o Eparama me isoro, dina ga ni a tu vakarau o Eparama. A sega tale ga ni bau kerea na Kalou vua e dua tale me cakava qori. E vinakata o Jiova mera bula kece na nona dauveiqaravi wili kina o ira na gone​—me dede na nodra bula ra marautaka tale ga.

Kena ikarua, e tukuna na iVolatabu ni tiko na vuna bibi a kerea kina o Jiova me cabori Aisake o Eparama. A kila na Kalou ni vica na senitiuri e muri ena qai soli Jisu na Luvena * duabau ga me mate ena vukuda. (Maciu 20:28) E via vakaraitaka vei keda na Kalou na nona rarawa kei na mosimosi ni nona cabori luvena. Na ka e kerea vei Eparama e ivakaraitaki uasivi ni isoro ena qai cabori ena dua na gauna e muri. Na isoro cava ya?

Raica mada na ka e tukuna o Jiova vei Eparama: “Mo kauta mada na luvemu, na luvemu e dua bauga, ko Aisake ko sa lomana . . . ka vakacabori koya kina mei soro kama.” (Vakatekivu 22:2) A tukuni Aisake e keri o Jiova me gonetagane “ko sa lomana.” A kila o Jiova ni vakamareqeti Aisake o Eparama. A kila na Kalou ni va tale ga qori na nona rai me baleti Jisu na Luvena. Na levu ni nona lomani Jisu o Jiova a vosa kina vakarua mai lomalagi qai tukuna sara ga ni o Jisu na ‘Luvena lomani.’​—Marika 1:11; 9:7.

Vakasamataka tale ga ni kerekere i Jiova vei Eparama e okati kina na vosa “mada.” Na vosa qori e ivakamamada ni ivakaro se itatau. E tukuna e dua na vuku ni iVolatabu ni nona vakayagataka na Kalou na vosa “mada” e vakaraitaka “ni kila na TURAGA ni dredre na ka e kerea tiko.” Sa wacava na nona rarawa o Eparama ena ka e kerei me cakava; e va tale ga qori na levu ni nona rarawa o Jiova ni raica na nona vakararawataki kei na nona vakamatei na Luvena lomani. E se qai vakadua me vakila o Jiova na rarawa qori, ena sega ni vakila ena dua tale na gauna.

De dua eda na lomatarotarotaka na ka e kerea o Jiova vei Eparama, ia e vinaka meda nanuma tiko ni a sega ni vakalaiva o Jiova me cabori luvena na peteriaki yalodina. A tarovi Eparama me kua ni cakava na ka mosimosi duadua vua e dua na itubutubu; a vakabulai Aisake me kua ni mate. Ia o Jiova a sega ni taqomaki ‘Luvena mai na mate, a soli koya ena vukuda kece.’ (Roma 8:32) Na cava a vakadonuya kina o Jiova me yaco na ka vakaloloma qori? A cakava qori “meda vakabulai kina.” (1 Joni 4:9) Qori e ivakaraitaki uasivi ni nona lomani keda na Kalou! Me uqeti keda qori meda dolea lesu na nona loloma. *

[iVakamacala e ra]