‘A Kabiti Jiova Tiko Ga’
Vakavulica na Luvemu
‘A Kabiti Jiova Tiko Ga’
O SA bau vakabira oti e dua na itaba ena pepa?— * Ena kabi dei na itaba qori ke vinaka na qulu. Na vosa ‘kabi’ e kena ibalebale mo tara dei se volekata tu ga. Eda na veivosakitaka qo e dua na turaga e tukuna na iVolatabu ni ‘a kabiti Jiova tiko ga’ na Kalou dina. Na yacana o Esekaia. Na cava eda rawa ni vulica ena nona ivakaraitaki?
A sega ni vinaka nona isususu o Esekaia. Na tamana o Easi na Tui Juta a gole tani mai na nona qaravi Jiova. A liutaka sara ga na qaravi kalou lasu o Easi ni se gone sara o Esekaia. A vakamatea mada ga e dua na luvena o Easi—na taci Esekaia—qai vakacabora vua na kalou e qarava tiko!
E dina ni a cakava tiko ga na veika ca o Easi, a talairawarawa tiko ga o Esekaia vei Jiova. O nanuma ni dredre vua me cakava qori?—Kena irairai ni a dredre vua, ia a sega ni soro o koya! Meda raica mada se a rawa ni kabiti Jiova vakacava, kei na sala eda rawa ni cakava tale ga kina qori.
A vulica o Esekaia na nodra ivakaraitaki e levu era kabiti Jiova. Dua vei ira qori o Tevita. A bula o Tevita ena vica na drau na yabaki yani e liu, ia e rawa ni vulica na veika me baleti koya o Esekaia ena Vosa ni Kalou. A vola o Tevita: “Ni sa laivi au na tamaqu kei na tinaqu, ena qai keveti au cake ko Jiova.”
O raica rawa na ka a vukei Tevita me talairawarawa vei Jiova?—Nona vakabauta! A vakadeitaka o Tevita ni na vukei koya o Jiova ke talairawarawa vua. A sega ni bau vakatitiqataka qori! Ni dau vakananuma o Esekaia nona ivakaraitaki o Tevita a vukei koya me kabiti Jiova ni talairawarawa vua. E rawa tale ga ni vukei iko o Jiova ke o kabiti koya tiko ga ni o talairawarawa vua.
Vakacava ke rau sega ni qaravi Jiova na nomu itubutubu?—E tukuna na Kalou mera talairawarawa na gone vei ira na itubutubu. Koya gona mo talairawarawa vei rau na nomu itubutubu. Ke rau tukuna mo cakava na ka e vakatabuya na Kalou, o rawa ni vakamacalataka na vuna o na sega ni cakava kina. E sega ni dodonu mo lasu, butako, se cakava na ka e tukuna na Kalou ni cala, veitalia se o cei e tukuna mo cakava. E dodonu mo talairawarawa vua na Kalou!
E levu tu na ivakaraitaki vinaka e rawa nida muria. E sega wale ga ni vakaraitaki vinaka vei Esekaia o Tevita, a vuli tale ga vua na tukana o Jocame. A mate o Jocame ni bera ni sucu o Esekaia, ia a rawa ni vulica na veika me baleti koya o Esekaia ena iVolatabu, me vaka ga eda dau cakava nikua. O rawa ni vakasamataka tale eso na ivakaraitaki vinaka meda muria?—
O rawa ni vulica ena iVolatabu eso na cala ratou cakava o Esekaia, Tevita, Jocame kei na levu tale era ivalavala ca. Ia o ira qori era lomani Jiova, era vakatusa na nodra cala ra qai saga mera cakava tiko ga na ka e dodonu. Nanuma tiko, a uasivi ga o Jisu na Luve ni Kalou. Meda vulica vinaka na nona ivakaraitaki da qai vakatotomuria.
Wilika ena nomu iVolatabu
Same 27:10; Efeso 6:1; Kolosa 3:20
2 Veigauna 27:1, 2; 1 Pita 2:21
[iVakamacala e ra]
^ para. 3 Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.
