“Dou Veilomani”

“Au solia vei kemudou e dua na ivunau vou, mo dou veilomani; mo dou veilomani me vaka ga na noqu lomani kemudou. Na ka qo era na kila kece kina ni dou noqu tisaipeli, ke dou veilomani.”​—JONI 13:34, 35.

Kena iBalebale: A tukuna vei ratou na nona imuri o Karisito me ratou veilomani me vaka ga na nona lomani ratou. A vakaraitaka vakacava o Jisu na nona loloma? Era dau vakaduiduitaki na veimatatamata kei na yalewa ena nona gauna, ia e lomani ira kece na tamata o Jisu. (Joni 4:7-10) Na loloma a uqeti Jisu me solia na nona gauna kei na nona igu, qai vakuai koya mai na so tale na ka me rawa ni vukei ira eso tale. (Marika 6:30-34) E dua na sala uasivi a qai vakaraitaka kina na nona loloma o Karisito. A tukuna: “O yau na ivakatawa vinaka. Na ivakatawa vinaka ena solia nona bula ena vukudra na sipi.”​—Joni 10:11.

Lotu vaKarisito Taumada: Era veikacivi na lotu vaKarisito ena imatai ni senitiuri ena ‘taciqu’ se ‘ganequ.’ (Filimoni 1, 2) Era ciqomi ena ivavakoso vaKarisito o ira na gole mai na veimatanitu, nira vakabauta “ni rau sega ni duidui na Jiu kei na kai Kirisi, ni dua ga na noda Turaga.” (Roma 10:11, 12) Ni oti na Penitiko 33 S.K., o ira na tisaipeli e Jerusalemi “era volitaka nodra iyau kei na ka era taukena, ra qai wasea na ka era rawata mai kina vei ira era leqa tu.” Na cava na kena inaki? Me rawa nira tiko ga e Jerusalemi o ira na se qai papitaiso mera “cuqena tiko ga na nodra ivakavuvuli na yapositolo.” (Cakacaka 2:41-45) Na cava a uqeti ira na tisaipeli? A se bera ni 200 na yabaki na nodratou mate na yapositolo, a vola o Tertullian na ka era kaya eso me baleti ira na lotu vaKarisito: “Era dau veilomani . . . era tu vakarau sara ga mera mate ena vukudra na nodra itokani.”

O Cei Nikua Era Vakataki Ira na Lotu vaKarisito Taumada? E tukuni ena ivola The History of the Decline and Fall of the Roman Empire (1837) ni “lailai na nodra tusaqati ira na lotu vaKarisito o ira [era sega ni lotu vaKarisito], e kaukaua sara na nodra veitusaqati ga vakataki ira” o ira era kaya tiko nira lotu vaKarisito ena veisenitiuri. Ena dua na vakadidike a vakayacori mai Merika ena dua na gauna ga qo, a laurai kina nira dau veivakaduiduitaki vakamatatamata o ira era kaya nira daulotu​—e levu vei ira qori era kaya nira lotu vaKarisito. O ira na lewenilotu ena dua na vanua era sega ni kauaitaki ira na nodra lewenilotu ena dua tale na vanua ra qai sega ni rawa ni veivuke se ra bese ga ni vukei ira era vakabauta vata ena gauna ni leqa.

Ena 2004, a vakacaca e Florida e va na cagilaba ena loma ga ni 2 na vula. A via kila na jeameni ni Emergency Operations Committee e Florida se vakayagataki tiko vakavuku na iyaya ni vakacoko. A tukuna ni sega ni dua tale na ilawalawa e tuvanaki vakavinaka me vakataki ira na iVakadinadina i Jiova, a tu vakarau na jeameni me solia na cava ga era gadreva na iVakadinadina. Ena vica na yabaki yani e liu ena 1997, a gole ina Democratic Republic of Congo e dua na timi ni vakacoko ni iVakadinadina i Jiova qai kau na wainimate, kakana, kei na isulu mera vukei kina na tacidra vaKarisito kei na so tale era gadreva na veivuke. Era cautaka tale ga na iVakadinadina mai Urope na iyaya e tiko na kena isau ena dua na milioni na ilavo ni Merika.