“Ena Vunautaki Mada na iTukutuku Vinaka ni Matanitu ni Kalou”

“Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”​—MACIU 24:14.

Kena iBalebale: A tukuna na dauvola Kosipeli o Luke ni o Jisu a “lako . . . ina veikoro lelevu kei na veikoro lalai me lai vunautaka na itukutuku vinaka ni matanitu ni Kalou.” (Luke 8:1) A tukuna sara ga o Jisu: “E dodonu meu tukuna tale ga na itukutuku vinaka ni matanitu ni Kalou . . . ni qo na ka au talai mai kina.” (Luke 4:43) A talai ratou na nona tisaipeli me ratou lai vunautaka na itukutuku vinaka ena veitauni kei na veikoro qai vakaroti ratou ena dua na gauna e muri: “Dou na qai tukuni au . . . [i]na veivanua yawa sara kei vuravura.”​—Cakacaka 1:8; Luke 10:1.

Lotu vaKarisito Taumada: Eratou sega ni weletaka na tisaipeli na ka e tukuna vei ratou o Jisu. “Ena veisiga kece, ena valenisoro kei na veivale tale ga, eratou sega ni cegu ena nodratou veivakavulici kei na nodratou vunautaka na itukutuku vinaka kei Jisu, o koya na Karisito.” (Cakacaka 5:42) A sega ni yalani ga na vunau ina dua na ilawalawa lailai era kenadau kina, ia era vakaitavi kece kina na lewe ni ivavakoso. A tukuna o Neander na daunitukutuku makawa, ni o “Celsus na kedra meca na lotu vaKarisito taumada e dau vakalialia na nodra vunautaka vagumatua na kosipeli o ira na dau cula vutinimanumanu, dau caka ivava, o ira na dau vakarautaka na kulinimanumanu, o ira qori era tauvanua ga ra qai sega ni vuli vinaka.” A vola o Jean Bernardi ena nona ivola The Early Centuries of the Church: “[Na lotu vaKarisito] e dodonu mera lako yani i veivanua mera vunau vei ira na tamata kece ga. Ra lako yani e veisalatu kei na veikoro lelevu, ena vanua ni gade kei na veivale. Era ciqomi se sega. . . . Me yacova sara na iyalayala kei vuravura.”

O Cei Nikua Era Vakataki Ira na Lotu vaKarisito Taumada? A vola o David Watson e bete  ni lotu Jaji: “Na nona sega ni raica vakabibi o lotu na vunau kei na veivakavulici, e dua na vuna era sega ni taleitaka kina e levu nikua mera qarava na Kalou.” Ena nona ivola Why Are the Catholics Leaving?, a vola kina o José Luis Pérez Guadalupe na nodra cakacaka na lotu Tawase, Kavitu, kei na so tale qai tukuna nira “sega ni dau lako e veivale.” A vola me baleti ira na iVakadinadina i Jiova: “Era dau vunau vinaka sara e veivale.”

E totoka e dina tale ga na vakadidike nei Jonathan Turley ena ivola na Cato Supreme Court Review, 2001-2002: “Ni cavuti na iVakadinadina i Jiova, e levu era na vakasamataki ira ga na dauvunau era dau sikova na noda veivale ena gauna cala. E sega ni inaki ga ni nodra veivakalotutaki e veivale mera vakatetea kina na ka era vakabauta, ia e bibi tale ga ena nodra vakabauta mada ga o ira.”

[Kato ena tabana e 9]

O Cei Era Lotu vaKarisito Dina?

Ni veidutaitaki vata kei na ivakatagedegede vakaivolatabu e veivosakitaki ena vica na ulutaga veitaravi sa oti, o cei nikua era lotu vaKarisito dina? E vica vata na udolu na ilawalawa se lotu era kaya nira lotu vaKarisito, ia nanuma tiko na ka e tukuna o Jisu vei ratou na nona imuri: “Era na sega ni curu kece ina matanitu vakalomalagi o ira era tukuna vei au, ‘Turaga, Turaga,’ o koya ga e cakava na loma i Tamaqu mai lomalagi.” (Maciu 7:21) Era kilai mera lotu vaKarisito dina o ira era cakava na loma ni Kalou, o na vakalougatataki tawamudu ena veiliutaki ni Matanitu ni Kalou ke o vaqarai ira qori o qai veitokani kei ira. Moni kerei ira na iVakadinadina i Jiova era veisoliyaka na mekesini qo, mera vakamacalataka eso tale na ka me baleta na Matanitu ni Kalou kei na veivakalougatataki ena kauta mai.​—Luke 4:43.