“Muria Tiko ga na Noqu Vosa”

“Oni noqu tisaipeli dina ke oni muria tiko ga na noqu vosa, oni na kila na ka dina, na ka dina ena qai sereki kemuni.”​—JONI 8:31, 32.

Kena iBalebale: Na “vosa” i Jisu e vakaibalebaletaki ina nona ivakavuvuli, e lako mai vua e dua e cecere. A tukuna o Jisu: “Au sega ni vosa vakataki au ga, ia o Tamaqu e talai au mai e vakaroti au ena ka meu tukuna kei na ka meu vakavulica.” (Joni 12:49) Ni masu o Jisu vua na Tamana vakalomalagi na Kalou o Jiova, a kaya: “E dina na nomuni vosa.” A dau cavuqaqataka na Vosa ni Kalou me tokona na ka e vakavuvulitaka. (Joni 17:17; Maciu 4:4, 7, 10) O ira gona na lotu vaKarisito dina era ‘muria tiko ga na nona vosa,’ se ra vakadeitaka ni “dina” na Vosa ni Kalou na iVolatabu ra qai yavutaka kina na ka era vakabauta kei na ka era cakava.

Lotu vaKarisito Taumada: Me vakataki Jisu ga, a dau doka tale ga na Vosa ni Kalou na yapositolo o Paula. A vola: “E vakavuna na Kalou na volai ni iVolatabu kece, e yaga.” (2 Timoci 3:16) O ira na tagane era lesi mera vakavulica na nodra itokani lotu vaKarisito mera “muria ga na Vosa ni Kalou, e dina qai nuitaki.” (Taito 1:7, 9, The Amplified Bible) Era vakasalataki na lotu vaKarisito taumada mera cata na “vuku vakavuravura kei na vosa ni veicavilaki e yavutaki ena ivakavuvuli vakatamata kei na ivakavuvuli e vakabibitaki e vuravura, e sega ni salavata kei na ivakavuvuli i Karisito.”​—Kolosa 2:8.

O Cei Nikua Era Vakataki Ira na Lotu vaKarisito Taumada?: E tukuni ena Catechism of the Catholic Church: “E sega ni vakadeitaka duadua ga ena iVolatabu na lotu [Katolika] ni dina na veika e vakatakilai. E dodonu gona me ciqomi qai dokai vakatautauvata na ivakavuvuli ni lotu kei na Vosa ni Kalou.” A volai ena dua na ulutaga ni mekesini na Maclean’s ni a taroga e dua na italatala mai Toronto, e Kenada: “Na cava meda vakarorogo kina ena nona veidusimaki e dua e dau ‘saqata na matanitu’ a bula ena ruanaudolu na yabaki sa oti? E levu tu vei keda na vakasama totoka, e leqa ga ni vinakati meda okata tale ga kina na veika me baleti Jisu kei na iVolatabu.”

E tukuna me baleti ira na iVakadinadina i Jiova na New Catholic Encyclopedia: “Era okata na iVolatabu me Vosa ni Kalou qai ivurevure duadua ga ni ka dina me baleta na Kalou.” Ni vakamacalataki koya tiko e dua na yalewa iVakadinadina i Jiova mai Kenada, a tukuna sara e dua na turaga: “Au kilai kemuni, ena ka o taura tu qori,” qai dusia na iVolatabu.