“Sega ni Vakavuravura”

“E cati iratou o vuravura ni ratou sega ni vakavuravura me vaka ga na noqu sega ni vakavuravura.”​—JONI 17:14.

Kena iBalebale: Ni sega ni vakavuravura o Jisu, a tawaveitovaki ena veileti vakapolitiki kei na veileti vakamatatamata ena nona gauna. A tukuna: “Ke vakavuravura na noqu matanitu, era na vala na noqu tamata meu kua ni soli yani vei ira na Jiu. Ia e sega sara ga ni vu eke na noqu matanitu.” (Joni 18:36) A uqeti ratou tale ga na nona imuri o Jisu me ratou kua ni muria na ivakarau ni rai, ivosavosa, kei na itovo e vakatabui ena Vosa ni Kalou.​—Maciu 20:25-27.

Lotu vaKarisito Taumada: A tukuna o Jonathan Dymond e dauvola na ivola ni lotu ni o ira na lotu vaKarisito taumada “era sega ni via vakaitavi ena [ivalu]; era bolea na cava ga ena caka vei ira, se ra vakamadualaki, bala e valeniveivesu se ra vakamatei sara.” Era bolea mera vakararawataki, mera kua ga ni veitovaki. Na ivakatagedegede tale ga ni itovo era muria e vakaduiduitaki ira. A tukuni vei ira na lotu vaKarisito: “Era kurabui ra qai vosavakacacataki kemuni ni oni sa sega tale ni tomani ira ena sala qo, e tini ina vanua lolovira ni bula torosobu.” (1 Pita 4:4) A vola na daunitukutuku makawa o Will Durant ni “ca na lomadra na lotu butobuto era dau guta na marau vakalialia nira raica na kilikili kei na rakorako ni nodra itovo” na lotu vaKarisito.

O Cei Nikua Era Vakataki Ira na Lotu vaKarisito Taumada? E tukuna na New Catholic Encyclopedia me baleta na nodra tawaveitovaki na lotu vaKarisito: “E cala ke o bese na lave iyaragi.” E tukuni ena dua na ulutaga ni Reformierte Presse ni ripotetaka e dua na isoqosoqo e valataka na dodonu ni lewenivanua mai Aferika, nira vakaitavi na lotu kece ena veivakamatematei mai Rwanda ena 1994 “vakavo ga o ira na iVakadinadina i Jiova.”

Ni vakamacala e dua na qasenivuli ni sekeneri me baleta na veivakamatei era vakavuna na Nazi, a rarawataka ni “sega ni dua na ilawalawa se isoqosoqo ni lewenivanua e kudruvaka na levu ni lasu, veivakalolomataki e lai tini sara ena veivakamatematei.” Ni veitaratara oti ina United States Holocaust Memorial Museum, a vola: “Sa saumi noqu vakatataro.” A qai kila nira dei tu ga ena ka era vakabauta na iVakadinadina i Jiova, dina ga ni vakayacori vei ira na ivalavala voravora.

Vakacava na itovo vaKarisito? E tukuna na mekesini na U.S. Catholic: “Levu na itabagone lotu Katolika nikua era sega ni duavata kei na ivakavuvuli ni lotu me baleta eso na ka me vaka na nodrau tiko vata e rua erau sega ni vakamau [kei] na veiyacovi ni bera na vakamau.” A volai ena mekesini qori na ka e tukuna e dua na ivukevuke ni bete: “Ni laurai vakapasede—dua na iwiliwili levu, au nanuma ni sivia na 50 na pasede era sa tiko vata ra qai vakamau.” E tukuni ena New Encyclopædia Britannica ni o ira na iVakadinadina i Jiova “era muria dei ga na ivakatagedegede cecere e vauca na itovo savasava.”