iVola Mai Rusia

Vaqara iYau Vuni ena Veiulunivanua Totoka Mai Altay

QO E dua dina na siga totoka ena vula o Me ena Ripabuliki kei Altay, e dua na yasayasa rairai totoka ena cevaira kei Siberia. Keirau raica toka mai na neirau katubaleka na veikauloa, na loga ni coniferous (kau e vaka na paini); qai tu mai dakuna na veiulunivanua cecere e karakarawa siawa qai solegi tu ena ucacevata. Na vanua sukusukura qai tu yawa qo e nodra itikotiko na Altaic, o ira qori era duatani toka vei ira na vo ni kai Esia qai dua ga na nodra vosa. Era vakaitikotiko ena veiulunivanua na Altai, na yaca ni ulunivanua qori e kau mai na dua na vosa vakaTurkic-Mongolia e kena ibalebale “koula.”

Sa vica toka na yabaki na neirau vulica vakaveiwatini na vosa vagalu vakaRusia, keirau veisiko tale ga ena ivavakoso kei na iwasewase lalai ni iVakadinadina i Jiova era vosa vagalu. Na vanua qo era tiko kina e rauta na 170 na matatamata kei na itovo vakavanua, ia era kila kece na vosa vakaRusia. Era vakayagataka na galu e dua tale na vosa, oya na vosa vagalu vakaRusia. Era dau veivolekati na galu, e levu tale ga keitou sotava era via talanoataki ira vei keitou, era kauaitaki keitou tale ga. E va sara tu ga qori na bula e Altay.

Keirau rogoca nira tiko eso na galu ena siti o Gorno-Altaysk, ena dua na koro lailai e rauta ni 250 na kilomita na kena yawa. Keirau kila nira tiko kina eso na iVakadinadina, ia era sega ni kila na vosa vagalu. Keirau nanumi ira na Altaic era galu, keirau mani nanuma me keirau lai vaqara na nodra itikotiko. Na neirau sasaga a uqeti rau e dua na veiwatini erau galu o Yury kei Tatyana, rau mani vakadonuya me keitou lako vata. Keitou vakavodoka ena neirau lori lailai na nodra ivola na galu sa tabaki tu ena DVD kei na misini me na saravi kina. Keitou kauta tale ga e dua na cemesi levu, seniwiji e vakayagataki kina na madrai braun qai biu e loma na soseti e vakabutari ena kubou, vaka kina na piroshki e se qai buta ga, qori e dua na kakana totoka ni Rusia e caka mai na falawa e kena vakasoso na kaveti kei na pateta qai dau vavi. Oti keitou vakayagataka rawa sara e yagoi keitou, neitou isulu, kei na neitou ivava na ivana ni kati ni manumanu lalai, e vakadewa tiko vakalevu ena yasayasa oya na mate me vaka na encephalitis (vuce ni mona).

Na gaunisala keitou muria e veibasogayaki qai cabesiviti na veiulunivanua totoka. E robota na vanua na iboi ni jasmine (senikau boi kamica e via vaka na bua ni Viti) kei na lilac (dua na mataqali rosi lokaloka). Dua na bula levu vei keitou qori! Keitou marau ni keitou raica e dua na qele ni dia ni Siberia era kana co welewelei toka. E veikabiti na vale kau ena nodra itikotiko na Altaic, e rairai vinaka tale ga na kava ni nodra dokanivale. Ena yasa ni levu na vale qori era tiko tale ga kina na vale  e vakatokai na ayyl, e yasaiono qai vaka na fanala na dokana. Eso e vaka na valelaca raoni era dau cakava na itaukei kei Merikamai na kulinimanumanu kei na kuli ni kau. Era dau vakaitikotiko e levu na Altaic ena nodra vale yasaiono ena vula o Me ina Seviteba ra qai toki tale ena nodra vale ena vulaibotabota kei na vulaililiwa.

Era kidavaki keitou na iVakadinadina ena koro oya ra qai kauti keitou ena nodrau vale e dua na veiwatini Altaic erau galu. Dua na ka na nodrau marau ni keitou sota, rau via kila na vanua keitou lako mai kina kei na neitou cakacaka. A dua toka na nodrau kompiuta. Ni keitou ucuna mai e dua na DVD, rau cikeva me rau biuta ena nodrau kompiuta. A mudu vakasauri na veivosaki, e vaka ga keitou a sega ni tiko e kea. E coba dei toka na matadrau ena kompiuta, rau vakatotomuria na vosa vagalu e caka tiko ena DVD rau qai deguvacu nirau marautaka na ka erau raica. Dua na ka na neitou saga me keitou tukuna vei rau me cegu mada, me keitou lesu tale ena itekivu ni iyaloyalo e tabaki tiko kina e dua na parataisi totoka e vuravura. Keitou cegu ena dua na iwase ni iyaloyalo me keitou veivosakitaka na ka ena cakava na Kalou vei keda na kawatamata, o cei tale ga ena bula tawamudu ena ituvaki erau raica toka oya. E tarai keitou sara ga na nodrau tataleitaki, ni oti na neitou veivosaki rau tukuna ni dua tale na veiwatini galu erau tiko ena dua na koro e vica toka na aua na kena lakovi.

Ni keitou tomana na neitou ilakolako, keitou takosova e dua na gaunisala qiqo qai muria sara e dua na gaunisala tatakelokelo me keitou yaco ena dua na koro lailai sara. Keitou sotava e keri e dua na vuvale eratou galu, o tagane, watina, luvedrau tagane lailai kei na tinai radinivale, eratou sega ni kila na neitou gole yani, ia dua na ka na nodratou marau. Ni keitou curu e vale, e totoka na iboi ni kau kei na buttermilk (waicala ni kirimu ni bata se sucu) e lalata na lomanivale. Nodratou doka ni vale e vaka na ibulibuli ni fanala, e qara tu na dokana me curu mai kina na rarama. E tu ena dua na yasa ni vale na nodratou ovani biriki vulavula, qai ubi tu na lalaga ena kapeti damudamu. Erau vakarautaka sara na veiwatini e dua na kakana vakaAltaic na doughnut lalai (e vaka na babakau) qai tawa mai na ti ena boulu lalai ni Esia. Keirau taroga sara ke ratou bau vakasamataka ni ratou rawa ni veitokani kei na Kalou. Eratou kauai sara ena taro qori. A tukuna o tinai radinivale ni dau kau kakana ni se gone ina ulunivanua me cabora vei ira na kalou. “Au sega ni kila na cava e dau caka kina oya,” e vakalekadomo qai dredre, e tomana “e dau neimami ivakarau ga oya.”

Keitou vakaraitaka sara na DVD ni ulutaga keitou veivosakitaka tiko, e veisau sara ga na irairai ni matadratou. Dua na ka nodratou vinakata me tomani tale na veivosaki, ia me na caka vakacava? E dau rawarawa na veitaratara kei ira na galu ena text ena mobail, ia a sega ena vanua oya na entena me rawa ni vakayagataki kina na mobail. Keitou mani yalataka me keitou na volavola vei ratou.

Sa dromu toka na siga qai vakaciriloloma na neitou veitalatala me sa mua lesu na ilakolako balavu i Gorno-Altaysk. Keitou wawale, ia keitou lomavakacegu. Ena dua tale na gauna e muri keitou tarogi ira na iVakadinadina ena vanua oya me baleti ratou na vuvale galu, era tukuna ni dau lako e veimacawa o tagane ena dua na taoni me lai vuli iVolatabu, me tiko tale ga ena nodra soqoni na iVakadinadina ni tiko kina e dua na yalewa iVakadinadina e kila na vosa vagalu qai rawa ni vukei koya. Keitou marau dina ni vuavuaivinaka na neitou sasaga!

Na neitou vaqarai ira na galu e rawa ni vakatauvatani kei na vaqara iyau vuni. E vakalougatataki na neitou vaqaqara me vica vata na aua ni keitou kunea e dua na iyau vuni ena dua na vanua keitou sega ni namaka. E koula tu ga vei keitou na ulunivanua o Altay ni kedra ivakananumi na yalomalumalumu keitou sotava ena veiulunivanua sukusukura.