Na Cava ena Tukuna o Jisu?

Era nanuma e levu na daulotu ni dodonu me vakaitavi na lotu ena politiki. Era vakabauta ni rawa ni veivuke na lotu me walia na leqa ni kawatamata. Ia eso tale na daulotu era nanuma ni sega ni dodonu me vakaitavi na lotu ena politiki. Na cava mada na nomu rai me baleta na veivakamuai ni lotu ena politiki? E dodonu me rau bosoki vata?

E VAKATOKAI o Jisu Karisito me “turaga e kilailevu duadua ena itukutuku ni kawatamata.” Vakasamataka mada ke da tarogi koya: E dodonu me vakaitavi na lotu ena politiki? Na cava ena tukuna? A sauma na taro qori ena ka e tukuna kei na ka e cakava ni se bula voli e vuravura. Kena ivakaraitaki, ena nona iVunau rogo ena Ulunivanua, e tukuna kina o Jisu na idusidusi mera kila na nona imuri me baleta na nodra itavi ena vanua era vakaitikotiko kina. Dikeva mada eso na tikina mai na ivunau rogo qori.

Dauveiuqeti

E vakamacalataka o Jisu na rai me tiko vei ira na nona imuri me baleta na vuravura. E tukuna: “O kemuni na masima  kei vuravura; ia ke yali na tuituina ni masima, ena qai vakatuituinataki tale ena cava? Sa sega na kena yaga, me kolotaki ga e tuba me butuki. Oni rarama kei vuravura. . . . Me serau vaka kina na nomuni cina, mera raica na tamata na nomuni ivakarau vinaka, mera vakalagilagia na Tamamuni mai lomalagi.” (Maciu 5:13-16) Na cava e vakatauvatani ira kina nona imuri o Jisu ena masima kei na rarama?

E dusia na vosa i Jisu ni o ira na nona imuri era vaka na masima vei ira kece na kawatamata, sega ni dua ga na ilawalawa lailai. Era vaka tale ga na rarama vei ira kece na vinakata, sega ni dua ga na iwiliwili lailai. E vakayagataka o Jisu na vosa vakatautauvata oya me vakamatatataka kina ni sega ni vinakata mera yawaki ira na lewenivanua na nona imuri. Na cava na vuna?

Vakasamataka mada qo: Ena sega ni maroroi dede na kakana ke sega ni waki vata kei na masima. Ena sega tale ga ni vakararamataki e dua na rumu buto ke sega ni biu kina na cina. Eda rawa gona ni kila e keri na vuna a sega ni vakaroti ratou kina na nona tisaipeli o Jisu me ratou lai toka duadua ga ena dua na vanua, ratou qai tauyavutaka na ivavakoso era lewena ga na lotu vaKarisito. A sega tale ga ni uqeti ira na nona imuri mera tiko ga vakataki ira, mera kua ni veimaliwai kei ira era sega ni vakabauta vata. Ia me vaka ga na kena gadrevi me waki vata na masima kei na kakana, me biu tale ga na cina ena rumu buto me vakararamataki kina, e bibi mera dau veivuke tale ga na lotu vaKarisito me rawa nira yaga ena itikotiko.

“Sega ni Vakavuravura”

Ia na nona vakasalataki ira na nona imuri o Jisu mera veimaliwai kei ira na lewenivanua, e vakavurea e dua na taro bibi me baleta na nona rai na lotu vaKarisito ena veika vakapolitiki. Na vuna? Ni bera nona mate, e masulaki ratou na nona imuri o Jisu vua na Kalou: “Au kerei kemuni moni kua ni kauti iratou tani e vuravura, moni vakatawai iratou tiko ena vuku i koya na Vunica. Eratou sega ni vakavuravura me vaka ga na noqu sega ni vakavuravura.” (Joni 17:15, 16) E rawa gona vakacava mera kua ni vakavuravura na lotu vaKarisito, ena gauna vata qori mera dau veivuke ena nodra itikotiko? Meda raica mada na kena isau nida dikeva e tolu tale na taro qo:

• Na cava na rai i Jisu me baleta na politiki?

• E dodonu mera vakaitavi ena politiki na lotu vaKarisito nikua?

• E yaga vakacava ena itikotiko na ivakavuvuli vaKarisito?

[Tikina bibi ena tabana e 4]

E vakamatatataka o Jisu ni sega ni vinakata mera yawaki ira na lewenivanua na nona imuri