Na Cava na Rai i Jisu me Baleta na Politiki?

ERATOU vakamacalataka na dauvola Kosipeli e vica na ituvaki a temaki kina o Jisu ena nona cakacaka vakaitalatala me vakaitavi ena veika vakapolitiki. Kena ivakaraitaki, ni oti ga vakalailai nona papitaiso o Jisu ena gauna sa voleka ni yabaki 30 kina, a solia vua na Tevoro na itutu me lewa na vuravura. Ena dua tale na gauna, era vinakata na lewenivanua mera buli koya me nodra tui. Ena dua tale na gauna e muri, era via vakasaurarataki Jisu na lewenivanua me valataka na veisau vakapolitiki. Ia na cava a cakava o Jisu? Dikeva mada e vica na ituvaki qori.

Lewa na vuravura. E vakamacalataki ena Kosipeli ni a solia na Tevoro vei Jisu “na matanitu kece e vuravura” me lewa. Vakasamataka mada na ka vinaka e rawa ni cakava o Jisu ena nodra rarawa na kawatamata ke a lewa na vuravura! Ena sega ni vakasuka na lewa qori o koya e vakabauta ni rawa ni vukei keda na matanitu vakatamata. Ia a sega ni vinakata o Jisu na ka e dulaka vua o Setani. (Maciu 4:8-11) E kauaitaki keda dina o Jisu, ia e rairai tiko na vuna vinaka a sega ni ciqoma kina na ka e via solia vua o Setani.

Tui. E levu era bula ena gauna i Jisu era vinakata sara tu ga e dua na iliuliu me walia na nodra leqa ni bula vakailavo kei na leqa vakapolitiki. Nira kurabuitaka e levu na ka e rawa ni cakava o Jisu, era vinakata kina me vakaitavi ena politiki. Na cava a qai cakava? E vakamacalataka na dauvola Kosipeli o Joni: “Ni kila o Jisu nira vakarau lako yani mera vesuki koya ra qai buli koya me tui, e lako duadua tale yani ina ulunivanua.” (Joni 6:10-15) Qori e vakaraitaka ni sega ni via vakaitavi o Jisu ena veika vakapolitiki.

Valataka na veisau vakapolitiki. Dikeva mada na ka a yaco ena vica na siga ni bera nona vakamatei o Jisu. Era veivosaki kei Jisu na nodra tisaipeli na Farisi, qo o ira na vinakata mera tu galala mai na veiliutaki vakaRoma, kei ira na ito i Eroti era lewe ni isoqosoqo vakapolitiki e tokoni Roma. Era via vakasaurarataki koya me tukuna na nona nanuma me baleta na politiki ena nodra taroga ke dodonu vei ira na Jiu  mera sauma na ivakacavacava e lavaki mai Roma.

E volaitukutukutaka o Marika na ka a cakava o Jisu: “‘Na cava oni vakatovolei au kina? Ni solia mai vei au e dua na dinari meu raica.’ Era kauta mai vua e dua. E qai kaya vei ira: ‘Na matai cei kei na yaca i cei qo?’ Era kaya vua: ‘Nei Sisa.’ Mani kaya vei ira o Jisu: ‘Ni solia vei Sisa na ka e nei Sisa, vua na Kalou na ka e nona na Kalou.’” (Marika 12:13-17) E vakamacalataki ena ivola na Church and State—The Story of Two Kingdoms ni a sega ni via vakaitutu ena matanitu o Jisu. A vakamatatataka ni tiko eso na lawa ni matanitu e dodonu meda muria, e tiko tale ga na lawa ni Kalou meda muria.

Ia na nona sega ni vakaitavi ena veika vakapolitiki o Jisu e sega ni kena ibalebale ni sega ni kauaitaka na bula dravudravua, veidabui, kei na veika tawadodonu. E tukuna na iVolatabu ni tarai koya sara ga na kedra ituvaki vakaloloma na tamata ena gauna ya. (Marika 6:33, 34) A lomani ira na rarawa tu o Jisu ra qai saga eso me vakaitavi ena veika vakapolitiki ena gauna oya, ia a sega ni saga o Jisu me kauta laivi mai vuravura na veika tawadodonu.

E laurai ena ivakaraitaki qori ni a sega ni via vakaitavi ena veika vakapolitiki o Jisu. Ia vakacava o ira na lotu vaKarisito nikua, e dodonu mera vakaitavi kina?