Yavu ni Vuvale Mamarau

Saga mo Drau Veinuitaki Tale

Sitiveni *: “Au sega ni tadra ni na lasaituba o Joana. E oti vakadua na noqu nuitaki koya. Sa bau dredre dina meu vosoti koya.”

Joana: “Sa rauta me sega ni nuitaki au o Sitiveni. E vica vata na yabaki au vakaraitaka tiko kina vua niu rarawataka na ka au cakava.”

KE VEIBUTAKOCI e dua na isa ni vakawati, e tukuni ena iVolatabu ni vakatau sara ga vua e sega ni cala, me sereki watina se kua. * (Maciu 19:9) O Sitiveni kei Joana erau vakamacalataki e cake, erau vakatulewataka me rau kua ni veisere, me rau vakavinakataka ga na nodrau vakawati. Erau qai kila e muri ni sega ni okati ga kina na nodrau tiko vata ena dua na vale, ia e levu tale na ka me rau cakava. Na vuna? Me vaka ga erau tukuna, na nona lasaituba o Joana e vakaleqa sara ga na nodrau veinuitaki. Ni bibi na veinuitaki me marautaki kina na bula vakawati, ena gadrevi me rau sasaga vakaukaua me rau veinuitaki tale.

E macala ga ni na dredre na nomudrau sasaga mo drau vakavinakataka na nomudrau vakawati ke cala bibi e dua vei kemudrau, me vaka na veibutakoci. Ena rairai gauna dredre sara na imatai ni vica na vula ni sa kilai na nona veibutakoci e dua. Ia e rawa ni vakavinakataki na ituvaki qori. Ena rawa vakacava mo drau veinuitaki tale? E rawa ni veivuke na ivakasala vuku ena iVolatabu. Raica mada e va na vakatutu qo.

1 Veivosaki Vakadodonu. A vola na yapositolo o Paula: “Ni oni sa biuta tani na lasu, ni tukuna ga na ka dina.” (Efeso 4:25) Na lasu, itukutuku e sega ni vakadeitaki, kei na veigaluvi ena vakaleqa na veinuitaki. E bibi gona  mo drau veivosaki sara ga vakadodonu, me kua ni vunitaki e dua na ka.

Ena levu ni nomudrau rarawa, ena rairai dredre ni se qai tekivu mo drau veitalanoataka na leqa a yaco. Ia ni toso na gauna, ena vinakati mo drau veivosakitaka. De dua drau na sega ni via veitalanoataka sara vakamatailalai, ia e sega ni ka vakayalomatua mo drau sega sara ga ni veitalanoataka. E tukuna o Joana e sa cavuti oti mai: “Dua na ka dredre meu veivosakitaka na noqu lasaituba, au sega tale ga ni via cakava qori. Au rarawataka dina na ka au cakava, au vinakata meu guilecava ga na ka a yaco.” Ia e vakavu leqa tale na nodrau sega ni veivosaki. Na vuna? E tukuna o Sitiveni: “Na nona sega ni via veitalanoataka o Joana na nona lasaituba e sa qai vakavuna ga meu sega ni nuitaki koya.” Ni vakasamataka lesu o Joana na ka e cakava, e tukuna: “Na noqu sega ni veitalanoa kei watiqu e vakaleqa na neirau sasaga me keirau vakavinakataka na ka a yaco.”

E macala ga ni na mosimosi na veitalanoa me baleta na nona tawayalodina e dua. E kaya o Daiana me baleta na nona lasa na watina o Paula kei na nona vunivola: “Au lomatarotarotaka e levu na ka. A yaco vakacava? Na cava e yaco kina? Na cava erau veitalanoataka? Au dau luluvu, au vakasamataka wasoma na ka a yaco, au qai vakataroga e levu na ka ni oti e vica na macawa.” E kaya o Paula: “Keirau dau veiba kei Daiana ena so na gauna ni keirau veitalanoa. Ia keirau dau veivosoti tale e muri. Ni keirau dau veivosaki vakadodonu, keirau veivolekati sara ga kina.”

Na cava o rawa ni cakava me kua soti na veiba? Nanuma tiko me kua ni nomu inaki mo sauma na ka e cakava o kemu isa, ia mo vuli ena leqa a yaco qai saga me dei na nomu vakawati. Kena ivakaraitaki, rau vakasamataka tale o Pita kei na watina o Milika na nodrau veimaliwai vakaveiwatini ni oti na nona lasaituba o tagane. E tukuna o Pita: “Au liaca niu sa rui ogataka ga na veika me baleti au. Au kauaitaka tale ga vakalevu meu vakamarautaki ira tale na so, meu cakava na ka era vinakata. Niu vakayagataka vakalevu vei ira na noqu gauna, e lailai kina na gauna au vakayagataka vei watiqu.” Ni sa kilai rawa na leqa e tiko, erau saga sara me rau cakava na veiveisau e gadrevi. Qori a veivuke sara ena dei ni nodrau vakawati.

TOVOLEA MADA QO: Ke o tawayalodina, kua ni soli ulubale se beitaki watimu. Vakadinata ni o cala, ni o vakararawataki kemu isa tale ga. Ke o sega ni cala, kua ni kailavaki watimu se rulaki koya. Na nomu sega ni cakava qori ena uqeti watimu mo drau veivosaki tiko ga vakadodonu.​—Efeso 4:32.

2 Cakacaka Vata. E tukuna na iVolatabu: “Sa vinaka ni lewe rua ka ca ni le dua bauga.” Na vuna? “Ni rau sa rawata nai voli vinaka ni nodrau cakacaka. Kevaka sa bale a dua, ena tubera cake na kenai sa.” (Dauvunau 4:9, 10) Na ivakasala qori e yaga vakalevu ni drau saga tiko mo drau veinuitaki tale.

Ke drau cakacaka vata, drau na rawa ni veinuitaki tale vakaveiwatini. Ia ena vinakati mo drau sasaga ruarua me dei kina na nomudrau vakawati. Na nomudrau sega ni cakacaka vata ena rawa ni vakalevutaka ga na leqa. E bibi mo raica ni tiko na kemu isa mo drau sasaga vata.

Qori na ka erau vakadinadinataka o Sitiveni kei Joana. “E taura na gauna,” e tukuna o Joana, “ia keirau cakacaka vata kei Sitiveni me dei kina na neirau vakawati. Au vakadeitaka sara ga meu kua ni vakararawataki koya tale. A rarawa tu o Sitiveni, ia e sega ga ni vinakata me vakaleqai na neirau bula vakawati. Au vaqara e veisiga na sala meu vakadeitaka kina na noqu yalodina vua, qai lomani au tiko ga o Sitiveni. Qori na ka au dau vakavinavinakataki koya kina.”

TOVOLEA MADA QO: Drau dau sasaga vakaveiwatini mo drau veinuitaki tale.

3 Biuta Laivi na iTovo Makawa. Ni vakasalataki ira oti na vakarorogo o Jisu me baleta na veibutakoci, a tukuna: “Ke vakacalai iko tiko na matamu imatau, leuta, kolotaka laivi.” (Maciu 5:27-29) Ke o tawayalodina vei kemu  isa, o bau vakasamataka eso na itovo se ivakarau ni rai ena gadrevi mo veisautaka se mo muduka me dei kina na nomu vakawati?

E macala ga ni o na muduka na nomu veimaliwai kei koya drau veibutakoci. * (Vosa Vakaibalebale 6:32; 1 Korinica 15:33) O Paula e sa cavuti oti mai a veisautaka na nona gauna ni cakacaka kei na nona naba ni mobail me kua ni veivosaki se veimaliwai tale kina kei na yalewa erau a lasa. Ia a guce na nona sasaga, mani biuta o Paula na nona cakacaka ni vinakata me rau veinuitaki tale vakaveiwatini. Sa sega ni va mobail, sa vakayagataka ga na talevoni nei watina. Vakacava a yaga na veika a vakuai koya kina? E tukuna na watina o Daiana: “Oti e ono na yabaki, au se leqataka tiko ga ena so na gauna de na saga me veitaratara tale mai kei watiqu na yalewa erau a lasa. Ia au sa nuidei qo ni na sega ni rawai o Paula ke temaki.”

Ke o cala, ena rairai vinakati tale ga mo veisautaka na nomu itovo. Kena ivakaraitaki, de dua o dau wede se o dau tatadrataka ni o veidomoni tiko kei na dua tale. Ke dina qori, “luvata tani na tamata makawa kei na kena ivalavala.” Biuta laivi na itovo makawa qai sosomitaka ena itovo vou me dei kina na nona nuitaki iko o watimu. (Kolosa 3:9, 10) Vakacava na nomu isususu, e dau dredre mo vakaraitaka kina ni o taleitaki watimu? Ke sakasaka mada ga ni se qai tekivu, e bibi mo vakaraitaka e veigauna ni o domoni watimu qai vakadeitaka vua ni o se lomani koya tiko ga. E nanuma lesu o Sitiveni: “E vakaraitaka ena levu na gauna o Joana na nona taleitaki au ena ka e cakava, e dau tukuna tale ga ‘Au domoni iko.’”

E vinaka mo dau tukuna vei watimu na ka kece o cakava ena veisiga. O Milika e sa cavuti oti mai, e tukuna: “E dau tukuna sara ga vei au o Pita na ka kece e yaco ena veisiga, na veika mada ga e sega ni bibi, me vakaraitaka kina ni sega ni vunitaka e dua na ka.”

TOVOLEA MADA QO: Drau veitalanoataka qai vola na veika e rawa ni caka mo drau veinuitaki tale kina, oti drau qai cakava sara. Me ikuri ni ka drau sa cakava tiko, drau vakasamataka eso tale na ka drau rawa ni marautaka vata.

4 Kua ni Vakatulewa Totolo. Kua ni nanuma ni na vinaka tale na nomudrau bula vakawati ena dua ga na gauna lekaleka. E veivakasalataki na Vosa Vakaibalebale 21:5: “Na nodra nanuma na tamata kecega sa lomariri sa vakauta ga ki na viakana.” Ena taura na gauna, de dua ena vakayabaki sara mo drau qai veinuitaki tale.

Ke dabui iko o watimu, kua ni nanuma ni na rawarawa ga na nomu veivosoti. E nanuma lesu o Milika: “Au dau sega ni taura rawa na vuna e sega ni rawa ni veivosoti kina na yalewa ke tawayalodina o watina. Au sega ni kila se cava e dau cudru kina vakadede. Ia ena gauna a tawayalodina kina vei au o watiqu, au sa qai kila na vuna e dredre kina na veivosoti.” Ena taura na gauna me rawa na veivosoti kei na veinuitaki.

Ia e tukuni ena Dauvunau 3:1-3 ni tiko na ‘gauna ni veivakabulai.’ O na rairai nanuma mo se kua mada ni talaucaka na lomamu vei watimu. Ia ke o sa cakava tu ga qori, ena vakaleqa ga na nomudrau veinuitaki tale. Me vakavinakataki na nomudrau bula vakawati, e bibi mo vosoti watimu qai vakaraitaka qori ena nomu talaucaka vua na nomu nanuma kei na lomamu. Uqeti watimu tale ga me tukuna na ka e dau marautaka se kauai kina.

Kua ni dau vakasamataka na veika ena vakavuna vakalevu na nomu yaloca. Saga vakaukaua mo biuta laivi qori. (Efeso 4:32) Ena yaga mo dau vakasamataka na nona ivakaraitaki na Kalou. Dua na ka na nona rarawa nira sega ni via qaravi koya na nona tamata e Isireli makawa. E vakatauvatani koya mada ga na Kalou o Jiova kei na isa ni vakawati e dabuitaki.  (Jeremaia 3:8, 9; 9:2) Ia a sega ni ‘tawamudu na nona cudru.’ (Jeremaia 3:12) A vosoti ira na nona tamata nira veivutuni dina ra qai qaravi koya tale.

Ni drau sa lomavakacegu ena veiveisau drau cakava ena nomudrau bula vakawati, drau sa na qai nuidei. Ena gauna qori, drau sa na sega ni kauaitaka tu ga me vinaka tale na nomudrau bula vakawati, ia drau sa na sasagataka eso tale na ka. E se bibi tiko ga mo drau dau dikeva na veika drau sa cakava rawa, drau qai sasaga tiko ga. Kua ni vakawalena na leqa lalai e basika, drau qai dei ena nomudrau veidinadinati vakaveiwatini.—Kalatia 6:9.

TOVOLEA MADA QO: Drau kua ni saga me vakalesui mai na nomudrau bula vakawati e liu, drau vakasamataka ga mo drau tekivu vou tale, qai dei na nomudrau bula vakawati.

Sasaga Tiko Ga

Ke o nanuma ena so na gauna ni na guce na nomu sasaga, nanuma tiko: Na Kalou a tauyavutaka na vakawati. (Maciu 19:4-6) Ena rawa gona ni vukei iko me vinaka tale na nomu bula vakawati. Eratou muria kece na ivakasala vuku ena iVolatabu na veiwatini eratou sa vakamacalataki oti mai, mani vinaka tale na nodratou bula vakawati.

A basika na leqa ena nodrau bula vakawati o Sitiveni kei Joana ena sivia na 20 na yabaki sa oti. E tukuna o Sitiveni me baleta na nodrau sasaga me vinaka tale na nodrau vakawati: “Sa qai laurai na veisau levu ni keirau vulica na iVolatabu kei ira na iVakadinadina i Jiova. E vukei keirau dina qori. Keirau vosota rawa kina na veika dredre keirau sotava.” E tukuna o Joana: “Dua na ka na noqu marau ni keirau sega ni soro ena gauna dredre keirau a donuya. Ena neirau vulica vata na iVolatabu kei na neirau sasaga vakaukaua, sa vinaka sara qo na neirau bula vakawati.”

[iVakamacala e ra]

TAROGA . . .

▪ Na cava au vakatulewataka kina meu vakavinakataka na noqu vakawati, dina ga ni lasaituba o watiqu?

▪ Na itovo vinaka cava au raica vei watiqu ena gauna qo?

▪ Na cava eso na ka lalai au a cakava meu vakaraitaka kina vei kequ isa niu domoni koya ena gauna keirau se veibuku kina? Au rawa ni cakava tale vakacava qori?