Vakaleqai Kiesai na Kocokoco
Vakavulica na Luvemu
Vakaleqai Kiesai na Kocokoco
O DAU diva tu mo taukena na ka sara ga o vinakata?— * Ke vaka kina, e levu tale ga era dau diva tu qori. Ia e dodonu beka mo lasu ke o via rawata na ka o vinakata?—Sega, e sega ni dodonu mo lasu. O koya e cakava qori e dau kocokoco. Raica mada se a vakaleqai Kiesai vakacava na kocokoco. Na turaga qori e nona dauveiqaravi o Ilaisa, na parofita ni Kalou dina o Jiova.
Rau bula ena dua na gauna makawa sara o Ilaisa kei Kiesai, rauta ni duanaudolu na yabaki ni bera nona sucu e vuravura na Luve ni Kalou o Jisu. E dau vakayagataki Ilaisa o Jiova me vakayacora eso na ka veivakurabuitaki—me cakamana! Kena ivakaraitaki, e vakamacalataki ena iVolatabu ni a tauvi vukavuka e dua na turaga kilai levu ena mataivalu ni Siria. Sega ni dua a vakabulai koya rawa, ia a qai vakabulai koya o Ilaisa.
Ni dau vakayagataki Ilaisa na Kalou me vakabulai ira na tamata, e sega ni dau ciqoma o Ilaisa na ilavo. O kila na vuna?— Baleta ni kila o Ilaisa ni vakavuna o Jiova na cakamana kece a cakava—sega ni o koya. Ena gauna a vakabulai kina o Neamani, a vinakata sara ga me solia vei Ilaisa na iloloma koula, siliva kei na isulu totoka ena levu ni nona marau. A sega ni via ciqoma o Ilaisa e dua na ka, ia a vinakata sara ga o Kiesai me taukena na iloloma qori.
Ni lesu o Neamani, a sega ni kila o Ilaisa ni cicimuri Neamani o Kiesai. Ni sa sotavi Neamani, o kila na ka a tukuna vua o Kiesai?— ‘A talai au mai o Ilaisa meu tukuna vei iko ni se qai yaco mai e rua na vulagi. E vinakata na isulu me rawa ni solia vei rau.’
Ia qori e lasu! A bulia ga o Kiesai na italanoa me baleti rau na vulagi. A tukuna qori baleta ni vinakata na isulu a via solia o Neamani vei Ilaisa. A sega ni kila qori o Neamani. Mani marau ni solia vei Kiesai na iloloma. Na ka mada ga a solia o Neamani e levu tale mai na ka a kerea o Kiesai. O kila na ka qai yaco tarava?—
Ni lesu i vale o Kiesai, a tarogi koya o Ilaisa: ‘O lesu mai vei?’
A sauma o Kiesai: ‘Sega, sega ni dua na vanua.’ Ia a vakatakila o Jiova vei Ilaisa na ka a cakava o Kiesai. Mani tukuna o Ilaisa: ‘Qo e sega ni gauna mo taura kina na ilavo se na isulu!’
A tara o Kiesai na ilavo kei na isulu a sega ni dodonu me nona. A vakavuna kina na Kalou me tauvi Kiesai na vukavuka a tauvi Neamani. Na cava eda rawa ni vulica eke?— Dua na ka eda vulica kina oya meda kua ni dau bulia se tukuna na italanoa lasu.
Na cava a bulia kina o Kiesai e dua na italanoa lasu?— Baleta ni kocokoco. A vinakata me taukena na ka e sega ni dodonu me nona, a saga tale ga me taukena na ka kece qori ena nona tukuna na ka lasu. Ena vuku ni ka a cakava qori, a tauvi koya e dua na mate vakasisila ena nona bula taucoko.
Dua tale na ka a qai yacovi Kiesai e ca sara mai na nona vukavuka. O kila na cava ya?— Sa sega ni vakadonui koya o Jiova, sa sega tale ga ni lomani koya. Meda kua mada ga ni cakava e dua na ka meda vakayalia kina qori! Ia meda dau yalololoma, da qai tu vakarau ni wasea vei ira tale eso na ka e tu vei keda.
Wilika ena nomu iVolatabu
[iVakamacala e ra]
^ para. 3 Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.
[iYaloyalo ena tabana e 31]
[iYaloyalo ena tabana e 30]
