Era Kunea e Dua na ka e Vinaka Cake Sara
ERA vakatulewataka e vica vata na milioni na lotu vaKarisito mera kua ni solevutaka na Kirisimasi. Era raica vakacava na ka era sa vakatulewataka qori? Era nanuma beka nira sa calata e dua na ka vinaka? Era nanuma beka na luvedra nira sa sega ni lomani? Raica mada qo na ka era tukuna na iVakadinadina i Jiova e veiyasa i vuravura me baleta na tikina qori.
Vakananumi Jisu Karisito: “Ni bera niu dua na iVakadinadina i Jiova e tutu yadua meu lai lotu. Au na lai lotu ga ena gauna ni Siganisucu kei na Siga ni Mate ni Turaga. Ia ena gauna mada ga au lako kina, au sega ni dau vakananumi Jisu Karisito. Au sa sega ni dau solevutaka na Kirisimasi, ia au dau tiko ga ena soqoni vaKarisito vakarua e veimacawa, au vakavulici ira mada ga eso tale ena ka e tukuna na iVolatabu me baleti Jisu!”—EVE, OSITERELIA.
Marautaka na soli ka: “Au dau marau ni dua e solia vei au na iloloma ena gauna au sega ni namaka kina. Au dau taleitaka sara ga qori! Au taleitaka tale ga na caka kad se droini meu solia vei ira eso tale mera bau marau kina, ena vakamarautaki au tale ga.”—REUBEN, NOCA AILADI.
Vukei ira na vakaloloma: “Keitou dau taleitaka me keitou vakarautaka na kedra na tauvimate. So na gauna keitou dau kauta vei ira na senikau, keke, se dua na iloloma lailai me vakamarautaki ira. Keitou marau ni cakava qori baleta ni rawa ni keitou sikovi ira na tauvimate ena gauna cava ga keitou vinakata.”—EMILY, OSITERELIA.
Soqovata vakavuvale: “Ni keitou dau soqovata vakavuvale, e rawa kina vei ira na luvei keirau mera kilai ira na nodra momo, nodra nei, tubudra, kei na tavaledra, baleta qori e gauna marautaki. Ni keitou sega ni dau cakava qori ena dua na gauna lokuci e veiyabaki, ya gona na vuna keitou sega kina ni lomaocaoca, era kila tale ga na wekai keitou ni keitou sikovi ira baleta ni keitou kauaitaki ira dina.”—WENDY, CAYMAN ISLANDS.
Veiyaloni: “Ena gauna ni Kirisimasi, e levu tu na ka me caka, e vica ga na tamata era kauaitaka na veiyaloni. Au sa lomavakacegu ena gauna qo niu vulica na ka e yalataka na iVolatabu me baleti keda na kawatamata. Au kila tale ga nira na marautaka na luvequ na veigauna vinaka se bera mai.”—SANDRA, SIPENI.
