Me vaka ni o ira na Isireli era kawa kece ga i Jekope se o Isireli, era “veitacini” se dua ga na vuvale. Nira dau soqo vata gona mera solevu i Jerusalemi, e dau “vinaka” qai “marautaki.” Me vakataki ira na Isireli, e levu na vuvale nikua era dau vakanamata mera soqovata ra qai vakila na “vinaka” kei na “marautaki” ni gauna ni Kirisimasi.

E tukuna na Encyclopedia of Christmas and New Year’s Celebrations: “Na leqa lalai vakavuvale e dau yaco ena loma ni yabaki, e rawa ni tini me dua na leqa levu ena gauna era soqovata kina na vuvale ena gauna ni Kirisimasi.”

“Mera sauma tale ga na nodra dinau vei ira na nodra itubutubu kei ira na tukadra kei na budra.” (1 Timoci 5:4) Mo dau saga mo sikovi ira wasoma na nomu vuvale ke rawa. Ke yawa na vanua era tu kina na wekamu, o se rawa tiko ga ni veivosaki kei ira. Vakacava mo volavola vei ira, qiriti ira, vakauta e dua na imeli, se veitalanoa ena internet? Ni wasoma na nomu veivosaki kei ira na nomu vuvale ena sega ni levu kina na rai cala.

“O kemuni ga e qiqo na lomamuni ena nomuni vakaraitaka na loloma. . . . Moni lomasavu.” (2 Korinica 6:12, 13) Ena rawa nira vulagi tale na gone vei ira na wekadra ke ra dau raici ira ga vakadua e veiyabaki. Era vakila eso na gone nira sega ni veivolekati sara kei na tubudra kei na so na wekadra era tu yawa. Mo uqeti ira gona na luvemu mera “lomasavu” ena nomu sureti ira na wekamu itabaqase mera mai veimaliwai kei ira. O ira na gone era sikovi ira wasoma na itabaqase, era na lomani ira ra qai dokai ira vakalevu na qase cake.

“Na vosa e tau ena kena gauna donu e veivakacegui.” (Vosa Vakaibalebale 15:23, New Century Version) Na cava mo cakava me kua ni vakaleqa kina na veimaliwai ena vuvale na leqa kei na duidui e basika? Dua oya na nomu digitaka na “gauna donu” mo veivosakitaka kina eso na veika bibi e vauca na vuvale. Ke o dau veivosaki wasoma kei ira na lewe ni nomu vuvale, ena rawarawa kina mo torovi ira mo vakameautaka na leqa cava ga e basika, ena “vinaka” qai “marautaki” kina na nomudou soqovata vakavuvale.