Vakananumi Jisu Karisito
“Dou dau cakava qo mo dou vakananumi au kina.”—LUKE 22:19.
Vuna era solevutaka kina eso na Kirisimasi.
Eso era kaya ni vuku i Jisu ga e caka kina na Kirisimasi. Era solevutaka na Kirisimasi mera vakananuma kina na siga ni nona sucu.
Na cava e dredre kina me caka qori?
E levu na sere rogo ni Kirisimasi kei na kena ivakarau e sega ni okati vakalevu kina na ka me baleti Jisu Karisito. E vica vata na milioni era solevutaka na olodei qori era sega ni vakabauti koya, eso mada ga era sega ni vakabauta ni bula dina. Ena buturara ni bisinisi, na olodei ni Kirisimasi e gauna e dau kaburaki kina na itukutuku ni veivoli, sega ni gauna e dau vakananumi kina o Jisu.
Na ivakavuvuli vakaivolatabu cava e rawa ni vukei iko?
‘Na Luve ni tamata e lako mai me solia na nona bula me kedra ivoli e lewe levu.’ (Marika 10:45) E macala ga ni a cavuta o Jisu na malanivosa ena itekitekivu ni ulutaga qo ena bogi ni bera nona mate, sega ni gauna a sucu kina. Ena bogi ya, a tauyavutaka e dua na soqo rawarawa ga me vakananumi kina na nona mate. Ia na cava e tukuna kina o Jisu me ratou dau vakananuma na nona imuri na nona mate, sega ni gauna e sucu kina? Baleta ni isoro ni veivoli i Jisu e rawa kina vei ira na kawatamata talairawarawa mera bula tawamudu. E kaya na iVolatabu: “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.” (Roma 6:23) Koya gona, ena gauna e dau vakananumi kina na nona mate e veiyabaki, era dau vakananumi Jisu Karisito na nona imuri me “ivakabula kei vuravura,” sega ni gonedramidrami.—Joni 4:42.
“A vakararawataki o Karisito ena vukumuni, e qai laiva vei kemuni na ivakarau moni muria na weniyavana.” (1 Pita 2:21) Me rawa ni o rokovi Jisu qai vakananumi koya, e dodonu mo vulica na nona ivakaraitaki me vaka ni tamata uasivi qai vuku. Vakananuma matua tale ga na sala e dau vakaraitaka kina o Jisu na yalololoma, dauvosovoso, kei na doudou me cakava kina na ka e dodonu, qai saga mo vakatotomuria qori ena nomu bula.
“Na matanitu kei vuravura e sa mai matanitu ni noda Turaga kei na nona Karisito, ena veiliutaki vakatui me tawamudu.” (Vakatakila 11:15) Ni o vakananumi Jisu Karisito, mo vakasamataka na ka e sa cakava tiko ena gauna qo. Sa veiliutaki tiko vakatui mai lomalagi o Jisu. A parofisaitaka na Vosa ni Kalou me baleti koya: “Ena lewai ira vakadodonu ga na dravudravua, ka lewa vakadodonu e na vukudra na yalomalumalumu e vuravura.” (Aisea 11:4) Na itovo talei qori ena sega ni laurai vua e dua na gonedramidrami, ena laurai ga vua e dua na iLiuliu kaukaua.
