ULUTAGA LEVU: NA CAVA EDA VULICA VEI MOSESE
O Cei o Mosese?
Na cava o vakasamataka ni o rogoca na yaca i Mosese? O vakasamataka . . .
-
na gone dramidrami a vunitaki koya o tinana ena dua na kato qai biuta ena bati ni uciwai na Naile?
-
na gonetagane a susugi koya na luvei Fero yalewa ena bula vutuniyau e Ijipita—ia a sega vakadua ni guilecava ni dua na Isireli?
-
na turaga a vakatawasipi tu mai Mitiani me 40 na yabaki?
-
na turaga rau veivosaki kei Jiova * ena yasa ni vunikau kama?
-
na turaga a doudou ni vosa vua na tui kei Ijipita, qai kerea mera sereki na Isireli mai na veivakabobulataki?
-
na turaga a vakarota—ena veidusimaki ni Kalou—me tau na Tini na Kuita vei ira na kai Ijipita ni a talaidredre na nodra tui vua na Kalou dina?
-
na turaga a liutaki ira na Isireli ena ilakolako vakairogorogo ena nodra biuti Ijipita?
-
na turaga a dusimaki me wasea rua na Wasa Damudamu?
-
na turaga a vakasavuya na iVunau e Tini ni Kalou vei ira na Isireli?
A VAKAYACORA o Mosese na veika kece qori kei na so tale. Sa rauta me dokai vakalevu na turaga yalodina qo vei ira na lotu vaKarisito, Jiu kei ira tale ga na Musolomani!
E matata gona ni a vakaraitaka na parofita o Mosese na ‘kaukaua vakatubuqoroqoro.’ (Vakarua 34:10-12) E dina ni tamata ivalavala ca, ia a yalorawarawa me vakayagataki koya na Kalou me vakayacora e levu na ka vakatubuqoroqoro. Me vakataki koya ga na parofita o Ilaija, o Mosese e tamata ga “vakataki keda.” (Jemesa 5:17) E levu na leqa eda sotava nikua e tautauvata tale ga kei na ka a sotava o Mosese, ia a yalodina tiko ga.
O via kila se a cakava vakacava qori? Dikeva mada e tolu na itovo vinaka a vakaraitaka o Mosese kei na ka eda rawa ni vulica kina.
^ para. 7 E laurai ena iVolatabu ni yaca ni Kalou o Jiova.
