De dua ena dredre mo nuitaka e dua tale na lotu ni sega mada ga ni vakacegui iko na lotu o lewena tiko. Ia e tiko e dua na lotu o rawa ni nuitaka. Ni se bula voli e vuravura o Jisu, a vakavulica e dua na ilawalawa yalodina mera muria na ivakatagedegede ni Kalou. Era tiko tale ga nikua na imuri dina i Karisito, era saga mera muria na ivakavuvuli vaKarisito. O na kilai ira vakacava?

E kaya o Estelle, a cavuti ena dua na ulutaga sa oti: “Au sa qai kila na iVolatabu nira vakavulici au na iVakadinadina i Jiova. Sa qai matata vei au na ka e kaya na Joni 8:32: ‘Oni na kila na ka dina, na ka dina ena qai sereki kemuni.’”

E kaya tale ga o Ray, sa cavuti oti mai: “Niu vulica na iVolatabu kei ira na iVakadinadina i Jiova, au sa qai kila ni sega ni vakavuna na Kalou na rarawa eda sotava tiko. Au lomavakacegu niu kila ni tiko na vuna e vakalaiva kina na Kalou me yaco na veika ca, e yalataka tale ga ni sa voleka ni vakaotia.”

E ka ni sasaga meda caka dodonu nida maliwai ira e lolovira nodra ivakarau ni bula, ia e se rawa ga nida yalodina. E levu nikua e vinakati mera vulica na iVolatabu ni na yaga ena nodra bula. Qori na vuna era dau veivakavulici kina ena iVolatabu na iVakadinadina i Jiova vei ira e vica vata na milioni e veiyasa i vuravura, ia e sega ni saumi. E levu era sa vulica tiko e veimacawa na iVolatabu, era sa toro voleka vua na Dauveibuli, era sa marautaka tale ga na nodra bula. *

Ke o sotavi ira na iVakadinadina i Jiova, vakacava mo taroga na vuna era nuitaka kina na nodra lotu? Dikeva nodra ivakavuvuli kei na veika era kilai kina. O sa na qai kila se lotu cava o rawa ni nuitaka.