Au sucu ena dua na yasayasa e vutuniyau e Bilbao, mai Noca Sipeni. Keitou le va na veitacini, au taravi koya e qase. Keitou lotu Katolika, au dau lai Misa tale ga e veisiga. Au qasenivuli niu yabaki 23, qori na cakacaka au taleitaka au qai veivakavulici me 40 na yabaki. E dau gu na lomaqu meu vakavulica na veika me baleta na lotu Katolika, ena yakavi au dau lai vakavulici ira na goneyalewa era sa qai komunio vakadua.

A mai takali o watiqu ni oti e 12 na yabaki neirau vakawati, au sa qai qaravi iratou voli na va na luvei keirau yalewa. Ena gauna qori au se qai yabaki 33! Au qara na veivakacegui ena noqu vakabauta vakalotu, ia au se lomatarotarotaka voli eso na ka. Au taroga: ‘Ke sa voli keda oti o Karisito, na cava eda mate tiko ga kina? Na cava meda masuta tale kina me yaco mai na matanitu ni Kalou ke ra lako i lomalagi na tamata vinaka?’ Na kena e bibi duadua: ‘Ke sa lewai keda na Kalou ena gauna eda mate kina, na cava tale meda biubiu kina mai lomalagi, puregatorio, se eli ena otioti ni veilewai?’

Au taroga qori vei ira eso na bete. E dua vei ira e tukuna: “Au sega ni kila. Taroga na bisovi. Na cava o via kila kina? O vakabauta na Kalou? Qori ga na ka e bibi!” Ia au saga tiko ga meu kila na isau ni noqu taro. Ena dua na gauna au lai vakarogoca na nodra vunau na isoqosoqo na Jesuit, ira na lotu Penitiko, kei ira na Gnostic. Ia au sega ni rogoca e dua na isaunitaro e veivakacegui.

Niu sa yabaki 60 vakacaca, a sureti au e dua na goneyalewa yabaki vitu ina nodra soqoni na iVakadinadina i Jiova. Au taleitaka na ka au rogoca kei na ka au raica ena soqoni, ia ena levu ni noqu osooso au sega tale ni qai veitaratara kei ira. Ena rua na yabaki tarava erau sikovi au mai o Juan kei Maite erau iVakadinadina i Jiova. Ena loma ni tolu na vula erau sauma tiko ga na noqu vakatataro, yaco sara meu vulica na iVolatabu.

Au dau vakanamata ena vuli e veimacawa! Au vakavakarau vinaka sara qai vakayagataka e tolu na ivakadewa ni iVolatabu meu kila kina ke dina na ka era vakavulica tiko na iVakadinadina i Jiova. Sega ni dede au sa qai kila na veivakacalai ni lotu au lewena tu ena dua na  gauna balavu. Au rarawataka ni veicalati na ka au vakabauta tu e liu kei na ka au vulica ena iVolatabu. Sa vakawakana tu e lomaqu na ka au vakabauta tu ena dua na gauna balavu, ena vinakati me cavuraki laivi.

A tauvimate bibi na ikarua ni watiqu, mani mate sara. Au vakacegu mai na noqu cakacaka, au biubiu tale ga mai Bilbao. Erau sa toki tale ga o Juan kei Maite. E ca dina ni sa cegu tale ga e kea na noqu vulica na iVolatabu. Ia au kila niu sa kunea na iyau talei au na sega sara ni guilecava.

Ni oti e rauta e 20 na yabaki erau lesu tale mai Bilbao o Juan kei Maite, rau mai sikovi au sara, au sa yabaki 82 ena gauna qori. Dua na ka noqu marau niu raici rau! Au kila ni sega ni guilecavi au o Jiova, tekivu tale meu vulica na iVolatabu. Erau vosovoso o Juan kei Maite niu dau taroga vakavica e dua tiko ga na taro. E sega ni rawarawa meu biuta na ka au vakabauta tu e liu, au vinakata gona meu rogoca vakavica nodrau ivakamacala vakaivolatabu. Meu rawa ni vakamacalataka vinaka tale ga na ka dina ena iVolatabu vei ira na noqu itokani kei na noqu vuvale.

Na siga marautaki duadua ena noqu bula na noqu papitaiso niu sa yabaki 87. A yaco qori ena dua na nodra soqo na iVakadinadina i Jiova. E dua na qase ni ivavakoso a vunau me baleti keimami na vakarau papitaiso. Au luluvu niu rogoca na ivunau ya. E vaka sara ga e vosa tiko vei au o Jiova. Niu papitaiso oti era mai vakavinavinakataki au e vica na iVakadinadina i Jiova nira marautaka na ka au cakava, eso au se qai sotavi ira vakadua!

Au sa dau kila tu ni o Jisu Karisito “na sala.” (Joni 14:⁠6) Ia noqu vulica na iVolatabu au sa qai kilai Jiova na Kalou e dusimaki keda vua o Jisu. Sa rawa gona meu masu vua na Kalou e Tamaqu, e noqu iTokani tale ga. E veisautaki au sara ga na noqu wilika na ivola, Toro Voleka Vei Jiova. * Au wilika oti na ivola qori ena dua ga na bogi! E tarai au noqu kila ni o Jiova e dau yalololoma.

Noqu vakasamataka na gauna balavu au vakasaqara voli mai kina na ivakavuvuli dina, au nanuma sara na vosa i Jisu: “Kerekere tiko ga, ena qai soli vei kemuni; vaqaqara tiko ga, oni na qai kunea; tukituki tiko ga, ena qai dolavi vei kemuni.” (Maciu 7:7) Au sa kila na isau ni noqu vakatataro au vaqara voli ena dua na gauna balavu, au marau meu wasea vei ira eso tale.

Au sa yabaki 90, ia se levu ga na ka meu vulica me baleti Jiova. E talei na soqoni kece e dau caka ena Kingdom Hall niu vulica kina na ka dina, au marautaka tale ga na veimaliwai kei ira na mataveitacini. Au vinakata meu na dua tale na qasenivuli ena Parataisi e vuravura. (Vakatakila 21:3, 4) Au vakanamata meu na sotavi ira na wekaqu lomani era na vakaturi, meu na vakavulici ira tale ga ena ka dina ena iVolatabu. (Cakacaka 24:15) Au vinakata sara ga meu vakamacalataka vei ira na ka talei e solia o Jiova ena noqu bula vaqase!