O vakabauta na yalayala ena iVolatabu ni na yaco na veivakaturi? * E veivakacegui dina nida kila nida na sotavi ira tale na wekada era sa takali. Ia ena yaco dina na veivakaturi? Me saumi na taro qori, meda raica lesu na nodra ivakaraitaki na yapositolo i Jisu Karisito.

Raica na ulutaga “E Sega ni iTinitini ni Ka Kece o Mate!” ena tabana e 6 ni mekesini qo.

Eratou vakabauta dei na yapositolo na veivakaturi. Cava na vuna? Kena imatai, ni a vakaturi mai na mate o Jisu. E rairai sara ga vei ratou kei ira “na limanadrau vakacaca na veitacini ena dua ga na gauna.” (1 Korinica 15:6) Kena ikuri e volaitukutukutaki sara ga ena va na kosipeli na nona vakaturi o Jisu.​—Maciu 27:62–28:20; Marika 16:1-8; Luke 24:1-53; Joni 20:1–21:25.

Kena ikarua, eratou vakadinadinataka na yapositolo na tolu na veivakaturi a vakayacora o Jisu mai Neini, Kapenaumi kei Pecani. (Luke 7:11-17; 8:49-56; Joni 11:1-44) Na iotioti ni veivakaturi e vakayacora vua e dua na lewenivuvale eratou veivolekati, e cavuti ena itekivu ni ulutaga ena itabataba qo. Meda dikeva mada se cava e yaco.

“Ena tucake tale na ganemu.” E tukuna o Jisu na vosa qori vei Marica ni oti e va na siga na nona mate o Lasarusa na ganena. Ena gauna ya, a sega ni matata vei Marica na ibalebale ni vosa i Jisu. Mani tukuna, “Au kila ni na tucake tale,” ni nanuma ni na vakaturi ena dua na gauna se bera mai. Sa na wacava na nona marau o Marica ni rogoca oti ga na vosa i Jisu ni tukuna “o yau na tucake tale kei na bula,” qai raica ni sa vakaturi o ganena!​—Joni 11:23-25.

A tu e vei o Lasarusa ena va na siga e mate tu kina? E sega vakadua ni kaya ni a lai bula tu ena dua tale na vanua. E sega tale ga ni lako i lomalagi. Ni vakaturi Lasarusa o Jisu, e sega ni kauti koya tani mai na bula vakacegu e lomalagi, na vanua e volekata kina na Kalou. A tu ga e vei o Lasarusa? A tu ena ibulubulu.​—Dauvunau 9:5, 10.

E vakatauvatana o Jisu na mate me vaka ga na moce, eda na vakayadrati mai kina. E tukuna: “Sa moce na nodatou itokani o Lasarusa, ia au sa lako qo meu lai vakayadrati koya.” Eratou kaya vua na tisaipeli: “Turaga, ke moce dina o  koya, ena bula vinaka mai.” A tukuna tiko o Jisu ni sa mate o Lasarusa. Eratou nanuma ga na nona tisaipeli ni tukuna tiko ni moce me vakacegu. E qai tukuna vakamatata vei iratou o Jisu: “Sa mate o Lasarusa.” (Joni 11:11-14) Ni vakaturi o Lasarusa, e solia lesu vua o Jisu na nona bula, eratou veimarautaki tale vakavuvale. E veivakacegui na ka e cakava o Jisu vei iratou na vuvale qo!

Na veivakaturi kece e cakava o Jisu ni bula voli e vuravura, e ivakaraitaki lailai ni ka ena vakayacora ena gauna sa na veiliutaki kina vakatui ena Matanitu ni Kalou. * Ena gauna ena liutaki vuravura kina, ena vakaturi ira era moce tu ena ibulubulu ni kawatamata. Sa rauta me tukuna: “O yau na tucake tale.” Raitayaloyalotaka na nomu marau ni o sotavi ira tale na wekamu! Vakasamataka tale ga na nodra marau na vakaturi mai na mate!​—Luke 8:56.

E tukuna o Jisu vei Marica: “O koya e vakabauti au, ke mani mate, ena bula tale. O koya tale ga e bula tiko qai vakabauti au ena sega sara ni mate.” (Joni 11:25, 26) Ena rawa gona nira bula tawamudu o ira era vakaturi ena loma ni dua na udolu na yabaki ni veiliutaki i Jisu ke ra vakabauti koya dina.

Ni cavuta oti na veika totoka ya, e tarogi Marica ena dua na taro bibi: “O vakabauta?” E kaya vei Jisu o Marica: “Io Turaga, au vakabauta ni o kemuni ga na Karisito na Luve ni Kalou.” (Joni 11:26, 27) A vakabauta dei na veivakaturi o Marica. O vinakata me va tale ga qori na nomu vakabauta na veivakaturi? Ena vinaka mo na vulica mada e liu na inaki ni Kalou me baleta na kawatamata. (Joni 17:3; 1 Timoci  2:4) Na ka o vulica qori ena rawa kina ni o vakabauta. Vakacava mo kerea e dua na iVakadinadina i Jiova me vakavulici iko ena ka e tukuna na iVolatabu me baleta na ulutaga qo? Era na marau mera veivosakitaka kei iko na inuinui totoka ni veivakaturi.