Ena gauna au sucu kina, erau vakaiteitei tu na noqu itubutubu ena dua na koro e Galicia, ena vuaira kei Sipeni. Keitou le walu na veitacini, au kena ikava. Keitou vuvale mamarau. E kena ivakarau e Sipeni ena gauna ya me dua ena vuvale me lai vuli bete se sista ena koronivuli ni lotu Katolika. Au qai cakava qori kei na rua na taciqu.

Niu sa yabaki 13, au lai tomani tuakaqu ena nodra itikotiko na sista ni Katolika mai Madrid. E sega e kea na veinanumi kei na veitokani—e levu ga na lawa, masumasu, kei na vakatatabu. Keimami dau sota ena mataka lailai e valenilotu me keimami vakasama vakatitobu, levu na gauna e dau ciri na noqu vakasama. Oti keimami lagasere, caka tale ga na Misa ena vosa vakaLatina. Au sega ni taura rawa na ka kece e caka tiko, au nanuma tale ga niu sega ni rawa ni volekata na Kalou. Au sega ni marautaka na bula ena itikotiko ni lotu qo. Niu sota mada ga kei tuakaqu keirau na tukuna ga, “Vakacerecerei na yalosavasava i Meri.” Ni oti na kana e dau soli e veimama na aua me keimami veitalanoa kina. E duidui sara kei na ka e dau caka mai vale! Au dau tagi ena levu ni noqu galili.

Au kila niu sega ni veivolekati kei na Kalou, au bubuluitaka ga meu dua na sista niu yabaki 17. Au sa cakava na ka e vinakati, ia au lomatarotarotaka ke inaki dina ni Kalou meu cakava ya. Era dau tukuna na sista nira na biu ena bukawaqa i eli o ira era vakatitiqa! Ia au se vakatitiqa ga. Au kila o Jisu Karisito e dau veimaliwai, e ogaoga tale ga ena veivakavulici kei nodra vukei eso tale. (Maciu 4:23-25) Niu yabaki 20, au sa vakadeitaka ni sega na vuna vinaka meu cakacaka tiko ga kina vakasista. E tukuna vei au na neimami iliuliu keu se vakatitiqa tiko ga meu biubiu ena gauna totolo duadua, au kurabui sara ga ena ka e tukuna. E rairai leqataka nira na via muri au eso tale. Au mani biubiu mai na koronivuli ni lotu.

Niu yaco yani i vale erau sega ni cudru na noqu itubutubu. Ia ni sega na cakacaka ena vanua keitou tiko kina au mani toki vei ganequ i Jamani. E lewena o koya e dua na ilawalawa  vaKominisi era kai Sipeni. Au dau marau niu maliwai ira, nira dau valataka na nodra dodonu na tamata cakacaka kei na nodra sega ni vakaduiduitaki na marama. Au mani vakatulewataka meu sa curu tale ga kina, qai vakawatitaka e dua na turaga e lewena tale ga na isoqosoqo qo. Noqu dau veisoliyaka na nodra ivola lalai na Kominisi kei na noqu vakaitavi ena tayabe, au nanuma niu sa cakava tiko e dua na ka yaga.

Ia nira sega ni cakava na Kominisi na ka era tukuna, e vakayalolailaitaki au sara ga. Kuria qori, na nodra vakama ena 1971 na vale ni mata mai Sipeni e Frankfurt eso na itabagone mai na neimami isoqosoqo. Era vakayacora qori nira sega ni taleitaka na veivakaduiduitaki e vakayacora na matanitu o Sipeni. Ia au vakabauta ni cala na sala era vakaraitaka kina nodra kudru.

Ni sucu na neirau ulumatua au tukuna vei watiqu niu sa na sega ni lakova na soqo ni Kominisi. Dua na ka noqu galili nira sega ni sikovi keirau mai vakaveitinani noqu itokani makawa. Au lomatarotarotaka na inaki ni bula. E yaga beka na sasaga me vakavinakataki na bula raraba?

Ena 1976, au taura eso na ivola vei rau na veiwatini iVakadinadina i Jiova erau sikovi au mai. Ena nodrau veisiko tarava au vakatarogi rau ena vuna eda rarawa kina, kei na vuna e yaco kina na veivakaduiduitaki kei na ivalavala tawadodonu. Au kurabui ni rau sauma na noqu taro kece mai na iVolatabu! Au sega tale ni wawa, au sa vulica sara ga na iVolatabu.

Ena itekivu ni noqu vuli au vinakata ga meu vakarabailevutaka noqu kila ka. Ia a veisau qori ena gauna keirau lako kina vakaveiwatini ena nodra soqoni na iVakadinadina i Jiova ena nodra Vale ni Soqoni. Ena gauna qori sa rua na luvei keirau. Era dau kauti keitou ina soqoni na iVakadinadina ra qai dau raici rau na gone ena gauna e vakacagau tiko kina na soqoni. Au taleitaki ira kina na iVakadinadina.

Ia au se lomalomaruataka tiko ga na veika me baleta na lotu. Au mani vakatulewataka meu lai sikovi ratou na wekaqu i Sipeni. Ni bete ni lotu o tamaqu lailai a saga gona meu kua ni vulica na iVolatabu. Era vukei au vakalevu na iVakadinadina eke nira sauma vakaivolatabu na noqu vakatataro me vakataki ira ga na iVakadinadina mai Jamani. Au vakatulewataka meu na tomana tale noqu vulica na iVolatabu niu lesu i Jamani. Qori sara ga na ka au cakava, dina ga ni sa muduka na nona vulica na iVolatabu o watiqu. Au papitaiso me iVakadinadina i Jiova ena 1978.

Na ka dina ena iVolatabu e dusimaki au vakadodonu qai vakainaki kina noqu bula. Me kena ivakaraitaki, ena 1 Pita 3:1-4 era uqeti na yalewa vakawati mera “vakamalumalumu” vei ira na dui watidra ena “veidokai dina” ra qai bucina “na yalomalua, e talei sara ena mata ni Kalou.” E vukei au na ivakavuvuli qori meu vakayacora na noqu itavi vakaradinivale me vaka e dua na yalewa vakawati lotu vaKarisito.

Sa 35 na yabaki noqu iVakadinadina i Jiova. Au marau niu lewena na vuvale e vuravura raraba keimami qarava vata na Kalou, ratou wili kina e va na luvequ.