O ira era vesu mai na ivalu se ra vesu mai vakatawadodonu, era volitaki mera bobula e Roma. Era na sega ni lesu i nodra vanua se raici ira tale na nodra vuvale.

E levu era vakacakacakataki ena qara ni vatutalei me yacova nira mate, ia era vinaka cake o ira era vakacakacakataki ena iteitei se vale. Eso era vakasaurarataki mera dara na kola kaukamea e ceuti kina na icovi ena soli vua e kauta lesu mai na bobula vua na nona turaga. O ira era dau saga vakavica mera dro e dau tavuni e yadredra na matanivola F (fugitive) e kena ibalebale ‘veidroyaki.’

Na iVolatabu e tukuna ni o Paula a vakatala na bobula o Onisimo me lesu vei Filimoni na nona turaga. E tu vei Filimoni na dodonu me totogitaki Onisimo, ia a vakamasuti Filimoni o Paula me “ciqomi koya ena loloma” me vaka e dua na itokani voleka.—Filimoni 10, 11, 15-18.

O Finisia e via vakataki Lepanoni nikua, e rogo ena roka lokaloka ni Taia, e vakayacani qori ena siti o Taia. A vakayagataka o Tui Solomoni e Isireli makawa na “vutinisipi lokaloka,” a cakava na kenadau mai Taia me ukutaki kina na valenisoro a tara.—2 Veigauna 2:13, 14.

Ena gauna oya e saulevu na roka lokaloka ni Taia, ni levu na ka e caka ena kena vakarautaki. Kena imatai era na lai yauta mai waitui na kenadau e dua na mataqali vivili na yacana na murex. * Era na leuta na lewe ni vivili qai kauta tani mai e dua na ka weliwelia me vakayagataki ena kesa. Oti era na vakamasimataka qai sigana me vica na siga. Ena biu ena dua na saqa e tu kina na waitui, qai vakasaqari tu vakamalua me vica na siga. Me rokataki e dua wale ga na isulu, ena vakayagataki kina e 12,000 na vivili.

Ena vica na drau na yabaki, era toki na kai Finisia ena so tale na vanua ra qai volitaka na roka lokaloka. Era mani kenadau tiko ga kina ena cakacaka qori. E kune na nodra iyaya ni cakacaka ena veivanua volekata na Wasa na Mediterranean me yaco sara ena ra ni vanua o Cádiz mai Sipeni.