Au susu ena tauni o Rmaysh, volekata na iyalayala ni vanua o Isireli kei Lepanoni, donuya nira veivaluvaluti tu kina na lewenivanua.Au se nanuma vinaka tu ga na kena dau kacabote na gasaukuro bulu, mai kedra wale na isamu ni dawa eso ni vakaleqai kina na yavadra kei na ligadra. Dua na ka na dredre ni bula qai takalevu na itovo kaukaua kei na basulawa.

Keitou lotu Maronite vakavuvale, e ribatani mai na lotu Katolika ena yasayasa vakaTokalau. E dau gumatua o tamaqu me vakarautaka na veika me keitou bula kina na le 12 na veitacini, ia e dau sasagataka o tinaqu me keitou dau kauaitaka na veika vakayalo. Toso na gauna, au raica ni sega ni cakava e dua na ka o lotu ena ivakarau e takalevu tu ena gauna oya, qori na nodra vakacegui na gadreva tu na veivuke.

Au tekivu taleitaka na karate niu se itabagone. Au na tereni vakaukaua me yacova niu sa kenadau ena vakayagataki ni liga, yava kei na iyaragi. Au dau veinanuyaka, ‘dina ga niu sega ni rawa ni tarova na ivalu, ia au rawa ni tarovi ira e voravora nodra itovo.’ Keu raica ni rau veivala tiko e rua, au na saga meu tarovi rau. Au dau cudru totolo qai so mada ga na ka lailai e vakacudrui au. Noqu ivalavala era rerevaki au kina e levu ena ceva kei Lepanoni, niu saga tiko meu tarova na ivalavala tawadodonu kei na itovo voravora.

Au lewena ena 1980 e dua na isoqosoqo ni karate mai Beirut. Au vakaukauayago e veisiga dina nira kacabote tiko na gasaukuro. Noqu bula e veisiga na kana, moce, kei na vakatotomuri Bruce Lee, e dua na daukarate kai Jaina e tiko e Merika qai dau vakaraitaki ena iyaloyalo. Au vakatotomuria na nona ikotikoti, ilakolako, kei na nona ivukivuki. Au sega tale ga ni dau dredre.

Au vinakata meu kenadau ena karate e Jaina. Niu vakaukauayago tiko ena dua na yakavi ena noqu vakavakarau ena ilakolako i Jaina, au rogoca sara na tukituki e katuba. Qo o noqu itokani kei na rua na iVakadinadina i Jiova. Niu se bunolevu sara tu ga ena noqu  isulu ni tereni loaloa, au kaya vei ratou, “Au sega ni kila e dua na ka ena iVolatabu.” Ia au sega ni kila ni siga tale ga oya ena veisau kina na noqu bula.

Rau vakaraitaka vei au na iVakadinadina mai na iVolatabu na vuna eda na sega ni walia rawa kina na veivakaduiduitaki kei na itovo kaukaua. Rau vakamacalataka ni vu ni veika ca kece o Setani na Tevoro. (Vakatakila 12:12) Au qoroya niu raica vei rau na bula vakacegu kei na nuidei. E uqeti au tale ga na nodrau vakavulici au ni tiko na yaca ni Kalou. (Same 83:18) Rau wilika tale ga vei au na 1 Timoci 4:8: “Ni yaga vakalailai ga na vakarautaki ni yago; ia na noda qarava na Kalou e yaga ena ka kece, ni na vakalougatataki kina noda bula ena gauna qo kei na noda bula ena gauna mai muri.” E uqeti au sara ga na veivosa qori.

Ia ratou vakaroti rau na iVakadinadina na noqu vuvale me rau kua ni lesu mai, vakavuna me keitou sega ni sota tale. Dina ni yaco qori, au vakatulewataka me sa tini noqu vuli karate meu tekivu vuli iVolatabu. Sega sara ga ni ratou duavata kina na taciqu, ia au nakita meu kunei ira na iVakadinadina i Jiova qai vuli iVolatabu kei ira.

Se mani vakacava noqu sasaga au sega ni kunei ira na iVakadinadina i Jiova. Au rarawataka na mate vakasauri i tamaqu kei na so tale na leqa e yaco e vale. Gauna vata qori au cakacaka tiko kina ena dua na kabani ni tara vale, dua gona na siga a tarogi au o Adel keirau cakacaka vata, se cava au matararawa voli kina. Tekivu sara me vakamacalataka na inuinui totoka e yalataki ena iVolatabu me baleta na veivakaturi. Ena ciwa na vula e tarava e vosota na turaga yalovinaka qo o Adel me vakavulici au ena iVolatabu.

Toso na vuli, au raica ni vinakati meu veisautaka noqu itovo. E sega ni rawarawa qori, niu dau yalototolo qai cudrucudru. Au vulica na sala meu lewa vinaka kina noqu cudru. Kena ivakaraitaki, na Maciu 5:44 e veivakasalataki kina o Jisu: “Lomani ira tiko ga na kemuni meca, masulaki ira tale ga era vakacacani kemuni.” E tukuna tale ga na Roma 12:19: “Ni kua ni sauma na ca e caka vei kemuni, . . . ni volai: ‘E noqu itavi meu veisausaumi; au na sauma, e kaya o Jiova.’” E vakacegui au dina na veitikinivolatabu qori kei na so tale.

Dina ni ratou sega ni taleitaka noqu vuvale noqu vuli iVolatabu kei ira na iVakadinadina i Jiova, ia qo eratou sa dokai ira. Sa mai tomani au e dua na taciqu qai dau tutaka o tinaqu na neirau vakabauta me yacova nona mate.

Au kalougata niu mai vakawatitaki Anita e dua na marama yalodina, keirau dau vakayagataka vakalevu neirau gauna ena kena vunautaki na itukutuku vinaka. Keirau toki ena siti o Eskilstuna mai Siwitisiladi ena 2000, qai tekivu mai na gauna qori keirau sa vakavulici ira tiko era vosa vakaArapea ena iVolatabu.

Dua na ka noqu lomani ira na vakalolomataki. Ia au lomavakacegu niu kila na vuna era yaco tiko kina, au marau tale ga ni sa voleka ni vakaotia o Jiova na veika ca qori.—Same 37:29.