E vakamacalataki ena imatai ni ulutaga ni dau vakaliuca o Jisu na “vunautaki ni itukutuku vinaka ni matanitu ni Kalou.” (Luke 8:1) E taubale me vicasagavulu na maile ena veivanua e Isireli, me vunautaka kina na Matanitu ni Kalou. E volatukutukutaki na nona cakacaka vakaitalatala ena va na Kosipeli, e cavuti vaka100 vakacaca na Matanitu ni Kalou. E laurai vakalevu qori ena veivosa i Jisu, ia eda kila ni so tale na ka e vakamacalataka me baleta na Matanitu ni Kalou!—Joni 21:25.

Cava e vakaliuca kina o Jisu na Matanitu ni Kalou ena nona bula e vuravura? Ni kila o Jisu ni lumuti koya na Kalou me iLiuliu ni Matanitu qori. (Aisea 9:6; Luke 22:28-30) Ia e sega ni cakava qori o Jisu me rogo se vakalagilagi kina. (Maciu 11:29; Marika 10:17, 18) E sega tale ga ni cakava qori me baleti koya ga. E vakaliuca ga na Matanitu ni Kalou * ena vuku ni ka ena cakava me baleti ira e lomana, ya na Tamana vakalomalagi kei ira na yalododonu.

E lomani Tamana vakalomalagi vakalevu o Jisu. (Vosa Vakaibalebale 8:30; Joni 14:31) E qoroya o koya na nona itovo vakasakiti me vaka na loloma, nona dauveikauaitaki, kei na nona yalododonu. (Vakarua 32:4; Aisea 49:15; 1 Joni 4:8) Kena ibalebale, e cata dina o Jisu ni rogoca na itukutuku lasu e tukuni me baleti Tamana—me vaka nona sega ni kauaitaki keda qai vinakata meda rarawa. Qori na vuna e gumatua kina o Jisu me kacivaka na “itukutuku vinaka ni matanitu ni Kalou”—e kila tale ga ni Matanitu qori ena kauta laivi na veika e vakarogorogocataka na yaca i Tamana. (Maciu 4:23; 6:9, 10) Ena sala cava?

Ena vakayagataka o Jiova na Matanitu me vakayacora na veiveisau ena yaga vei keda. “Ena qusia . . . na wainimata kece” mai na matadra era qaravi koya ena yalodina. Ena kauta laivi o Jiova na veika e vakavuna na tagi, ena raica me “sega tale na mate, na lolosi, na tagiyaso, kei na mosi.” (Vakatakila 21:3, 4) Na Kalou ena vakayagataka na Matanitu me vakaotia na veika e vakavuna tiko na rarawa ni kawatamata. *

Sa rauta me gumatua o Jisu ni vunautaka na veika me baleta na Matanitu! E kila ni Matanitu qo ena vakadinadinataki kina ni kaukaua qai dauyalololoma  o Tamana. (Jemesa 5:11) E kila tale ga o Jisu ni na yaga tale ga vei ira e lomana—ya o ira na yalododonu—na Matanitu ni Kalou.

A bula tu mai lomalagi kei Tamana o Jisu ni bera ni mai bula e vuravura. E vakayagataki koya o Tamana mera buli kina na veika era tu qo—na lomalagi vakatubuqoroqoro, na isoso kalokalo, noda vuravura totoka kei na veikabula era tawana. (Kolosa 1:15, 16) Mai vei ira na ka buli kece, e dau “taleitaki” ira vakalevu na kawatamata o Jisu.—Vosa Vakaibalebale 8:31, NW.

E vakadinadinataki qori ena nona cakacaka vakaitalatala e vuravura. Ni tekivu nona cakacaka vakaitalatala a tukuna ni gole mai vuravura me mai “vunautaka na itukutuku vinaka” vei ira na dravudravua. (Luke 4:18) E sega wale ga ni vunau o Jisu, ia e vakaraitaka sara ga nona lomani ira na kawatamata. Kena ivakaraitaki, ni gole yani e dua na ilala levu mera vakarogoci koya, e “lomani ira [o Jisu] e qai vakabulai ira na tauvimate.” (Maciu 14:14) E uqeti Jisu na loloma ena gauna e raica kina e dua na turaga e tauvi koya na mate mosimosi qai vakaraitaka nona vakabauta ena nona vinakata me vakabulai koya. E vakabulai koya qai kaya vakayalololoma vua: “Au vinakata! Mo savasava mai.” (Luke 5:12, 13) E “vusolo na loma i Jisu” qai “tagi” ni raici Meri ni tagicaki ganena o Lasarusa sa mate. (Joni 11:32-36) Qai vakatubuqoroqoro nona vakaturi Lasarusa o Jisu a mate tu me va na siga!—Joni 11:38-44.

Io, e kila o Jisu ni lekaleka na yaga ni ka e cakava ena gauna ya. E kila ni na yaco na gauna era na tauvimate tale na vakabulai, o ira na vakaturi era na mate tale. E kila tale ga ni Matanitu ni Kalou e iwali duadua ga ni leqa. Qori na vuna e sega wale ga ni cakamana kina o Jisu, ia e gumatua ni vunautaka “na itukutuku vinaka ni matanitu ni Kalou.” (Maciu 9:35) Na nona cakamana era sabolo wale ga ni veika ena cakava na Matanitu ni Kalou e vuravura taucoko. Raica mada na ka e yalataka na iVolatabu me baleta na gauna qori.

•  Sega tale na tauvimate.

  “Ena qai rai na matadra na mataboko, ka rogo na daligadra na didivara. Ena qai ladelade na lokiloki me vaka na me kila, ka sere na yamedra na galu.” Kena ikuri, “na lewe ni koro ena sega ni kaya, ka’u sa tauvi mate.” —Aisea 33:24; 35:5, 6.

• Sega tale na mate.

  “Era na taukena na vanua ko ira na yalododonu, ka tiko kina ka sega ni mudu.”—Same 37:29.

  “Ena vakaotia sara na mate ko koya; ia na Turaga ko Jiova ena tavoya na wai ni mata mai na matadra na tamata kecega.”—Aisea 25:8.

• Era na vakaturi na mate.

  “Ni sa voleka na gauna mera rogoca na domona o ira kece na tu ena ibulubulu mera tucake mai.”—Joni 5:28, 29.

  “Nira na vakaturi mai na mate.”—Cakacaka 24:15.

• Sega ni leqa na cakacaka qai vakavale na tamata.

  “A ra na tara vale, ka tiko kina; era na tea eso na were-ni-vaini, ka kania na vuana, era na sega ni tara, ka tiko kina na tamata tani, era na sega ni tea, ka kania na tamata tani. . . . era na rekitaka vakadede na cakacaka ni ligadra ko ira na tamata ka’u sa digitaka.”—Aisea 65:21, 22.

•  Sega tale na ivalu.

  “Sa vakaotia nai valu mai na yalayala kei vuravura.”—Same 46:9.

  “Ena sega ni lavei seleiwau e dua na matanitu ki na dua na matanitu, a ra na sega ni vulica tale nai valu.”—Aisea 2:4.

• Ena levu na kakana.

  “Ena qai vuataka na vuana ko vuravura; Ena qai vakalougatataki keda na Kalou, io, na noda Kalou.”—Same 67:6.

  “Ena [levu] e vuravura e na dela ni veiulu-ni-vanua na sila e qumi rawarawa ga.”—Same 72:16.

• Sega na bula dravudravua.

  “Ni na sega ni guilecavi . . . na tamata dravudravua.”—Same 9:18.

  “Ni na vakabula ko koya na dravudravua ni sa tagi; Kei koya sa vakararawataki ka sa sega e dua me vukei koya. Ena lomana ko koya na tamata malumalumu ka dravudravua, ka vakabula na yalodra na dravudravua.”—Same 72:12, 13.

O sa raica na vuna e kauaitaka kina vakalevu o Jisu na Matanitu ni Kalou ni o dikeva na veika ena cakava na Matanitu qo? E gumatua o Jisu ni vunautaka vei ira na vakarorogo na veika e baleta na Matanitu ni Kalou, ni kila o koya ni Matanitu ga qo ena walia na leqa eda vakila tu nikua.

Vakacava o taleitaka na veika e yalataka na iVolatabu me baleta na Matanitu qo? Ke vaka kina, vakacava mo vulica e levu tale na ka me baleta na Matanitu qo? Cava mo cakava mo vakila tale ga na kena veivakalougatataki? Ena saumi qori ena ulutaga tarava.