Keitou vakaitikotiko volekati Leipzig, ena tokalau kei Jamani volekata na vanua rau yala kina o Czech kei Poladi. Keitou biuvanua niu se yabaki ono ena vuku ni cakacaka i tamaqu—keitou toki i Brazil, qai tarava i Ecuador.

Au lesu i Jamani niu sa yabaki 14 meu curuibure ena dua na koronivuli e kea. Me vaka ni rau tu mai Sauca Amerika noqu itubutubu, au mani qaravi au ga kina vakataki au. Lai vakavuna meu nuitaki au ga qai lecava ni na tarai ira eso tale na ka au cakava.

Rau suka tale mai Jamani noqu itubutubu ena gauna au yabaki 17 kina. Dina ni keitou tiko vata, ia noqu dau nuitaki au ga e vakadredretaka meu vakamalumalumu ena nodrau veidusimaki. Mani biubiu mai vale niu sa yabaki 18.

Ia au liaca ni sega ni vakainaki na noqu bula. Au raica na duidui ni ivakarau ni bula kei na nodra sasaga na veisoqosoqo eso. Au vakadeitaka ni noqu inaki meu marautaka na totoka ni veika bula e vuravura ni bera ni vakacacana na kawatamata.

Au volia e dua na motopai meu gole i Aferika. Ia sega ni dede au lesu tale i Urope me lai vakavinakataki. Au gole sara ina baravi kei Potukali, au vakatulewataka me sa cegu noqu vodo motopai meu sa soko ga.

Au tomana e dua na ilawalawa itabagone era vakarau sokota na Wasa na Atalanitika. Maliwai ira o Laurie qai watiqu e muri. Keirau soko ina yatu yanuyanu na Caribbean, tiko vakalekaleka e Puerto Rico, oti suka tale i Urope. Keirau vaqara e dua na waqa me vakavinakataki me keirau vakaitikotiko kina. E tolu na vula na neirau sasaga qai tini botoilevu niu kacivi meu veiqaravi ena mataivalu ni Jamani.

Au lewena na mataivaluiwai ni Jamani me 15 na vula. Ena gauna qori, keirau vakamau kei Laurie qai lalawataka me keirau gade tale. Ia ni bera niu curu ena mataivalu,  keirau volia e dua na waqa ni veivueti. Niu sa lewena na mataivalu, keirau sa qai vakavinakataka me baleta na neirau gade. Au sa cegu mai na mataivalu, ena gauna vata qori era sikovi keirau mai na iVakadinadina i Jiova, tekivu sara neirau vuli iVolatabu.

Au nanuma ni sa vinaka tu noqu bula, sega ni gadrevi meu veisautaka. Niu sa vakamautaki Laurie, sa sega tale ga niu vakatavako me vaka e liu. (Efeso 5:5) Au nanuma ni vinaka na neirau inaki me keirau gade qai sarava na vakatubuqoroqoro ni veika e bulia na Kalou.

Ia laurai vakamalua e vinakati na veiveisau, vakabibi ena noqu itovo. Niu dau nuitaki au ga qai dokadokataka na noqu kila kei na veika au sa rawata. Au dau vakaliuci au ga.

Au wilika ena dua na siga na Vunau rogo i Jisu ena Ulunivanua. (Maciu, wase 5-7) Taumada au sega ni taura rawa na ibalebale ni vosa i Jisu me baleta na marau. Kena ivakaraitaki, e tukuna nira na marau na via kana kei na via gunu. (Maciu 5:6) Au mani lomatarotarotaka se na marau vakacava o koya e vinakata tu na veivuke. Ia niu tomana noqu vuli, au liaca nida vinakata kece meda vakacegui vakayalo, ia taumada ena vinakati meda yalomalumalumu ni vakadinata na tikina qori. Me vaka ga e tukuna o Jisu: “Era marau o ira na kauaitaka nodra bula vakayalo.”—Maciu 5:3, NW.

Sega ni dede keirau toki i Varanise, keirau gole sara i Itali. Na veivanua keirau gole kina keirau sotavi ira na iVakadinadina i Jiova. Au qoroya na nodra duavata kei na nodra vakaraitaka na loloma dina. Au raica tale ga nira dua ga na mataveitacini e vuravura raraba. (Joni 13:34, 35) Toso na gauna keirau papitaiso me keirau iVakadinadina i Jiova.

Ia se vinakati meu vakavinakataka tiko ga noqu itovo. Keirau vakatulewataka vakaveiwatini me keirau sokota na baravi kei Aferika, takosova na Wasa Atalanitika me yaco i Merika. Ena gauna keirau soko tiko kina e wavoliti keirau na wasawasa vakaitamera, au vakadinata kina niu dua wale ga na ka somidi ni vakatauvatani kei na vakasakiti ni Dauveibuli. Ena gauna vata qori au dau wili iVolatabu ni sega na ka me caka. E uqeti au na itukutuku ni nona bula o Jisu e vuravura. E sega ni vakacerecerei koya, dina ni uasivi qai levu na ka e rawa ni cakava. E sega ni vakaliuci koya, ia e vakaliuca na Tamana vakalomalagi.

Noqu vakasamataka vakatitobu na ivakaraitaki i Jisu, au raica ni dodonu meu vakaliuca na Matanitu ni Kalou, sega ni veika au vinakata. (Maciu 6:33) Neirau yaco i Merika keirau vakatulewataka vakaveiwatini me sa rauta na gade, me keirau vakavinakataka na neirau ka vakayalo.

Au dau lomalomaruataka na vakatulewa au cakava e liu niu dau nuitaki au ga. Ia qo au sa kunea na ivurevure ni vuku e nuitaki me dusimaki au. (Aisea 48:17, 18) Qo sa qai vakainaki na noqu bula au sa qarava na Kalou qai vakavulici ira eso tale me baleti koya.

Na neirau bulataka vakaveiwatini na ivakavuvuli mai na iVolatabu e qaqaco kina na neirau ivau ni vakawati. Sa dua na luvei keirau yalewa totoka, e vulici Jiova qai lomani koya tale ga.

Dina ni vakilai na dredre ena neitou bula vakavuvale, ia ena veivuke i Jiova keitou vakadeitaka ni keitou na sega ni soro qai nuitaki koya tiko ga vakatabakidua.—Vosa Vakaibalebale 3:5, 6.