Me vakataki Eliki ga, levu nikua era sega ni dau cakacaka vakaukaua, ra vakasavuliga. E kaya e dua e dau vakavinakataki motoka o Eroni: “Era nanuma e levu ni ka beci mera cakava na cakacaka era buno kina vakalevu. ‘Era kaya: “Au na toka mada ga ena cakacaka qo me yacova ni dua tale na cakacaka vinaka au raica.”’”

Cava era nanuma kina eso ni sega ni ganiti ira mera cakacaka vakaukaua? De dua sa vakamuai tu nodra rai ena tabana ni tukutuku, ni dau uqeta vakalevu na bula vutuniyau kei na lomawele. E kaya o Maciu, e dau vakavinakataki iyaya ca: “Era nanuma eso ni levu ga ni nomu cakacaka vakaukaua, na lailai ni ka o rawata.” Qori tale ga na ka e raica o Savenaca, e dau sasamaki. E kaya: “Sa dau levu ga na vakalusi gauna, sa sega ni caka na cakacaka e dodonu me caka ena loma ni dua na siga.”

Ia e laurai ni levu era sa rawaka tu era taleitaka na cakacaka. E kaya o Taniela, e yabaki 25 qai dau tara vale: “E dau vakaicovitaki vakalevu na noda cakacaka vakaukaua, vakauasivi ke da kila na vuna eda cakacaka tiko kina.” Duavata kina o Adriu, e yabaki 23, “Au vakabauta ni cakacaka ena vinakati kina mo marau, mo taleitaka tale ga. Ena yalani nomu marau ke o sega ni cakacaka vakaukaua, o sega ni yavavala, o vuturi vakalevu!”

E donu vakacava nodrau rai o Taniela kei Adriu me rau dau cakacaka vakaukaua? Rau dau muria na ivakavuvuli vakaivolatabu. Eda uqeti ena iVolatabu meda cakacaka vakaukaua, mamakutu, meda vosota tale ga. E uqeta na iVolatabu meda cakacaka, e vakaraitaka tale ga na sala meda marautaka kina.

Na ivakavuvuli vakaivolatabu cava ena uqeti iko mo marautaka nomu cakacaka? Dikeva mada e vica ena vakamacalataki ena ulutaga tarava.