Au susu ena dua na vanua dravudravua ena korolevu o Montreal. Takali o tamaqu niu se qai vula ono, o Na ga e qai veisusu tiko. Au itini vei keitou na le walu na gone.

Niu tubu cake tiko, e dau ivakarau ni noqu bula na vakayagataki wainimategaga, veimauilavo, ivalavala kaukaua, au vakailala tale ga kei ira na dau basulawa. Niu se qai yabaki 10, era dau talai au na saqamua kei ira na dau soli dinau era lavaka vakasivia na tubu. Au dau lasulasu, taleitaka vakalevu na veidabui meu vakaisini ira kina na tamata. Na bula qori e vaka ga na wainimategaga vei au.

Niu yabaki 14, au kila e levu na iwalewale ni lawaki. Kena ivakaraitaki, au dau volia vakalevu na iyaya era sega ni koula dina, au tocia kina na ivakatakilakila nira koula dina, au qai volitaka e gaunisala kei na vanua ni vakele motoka ena sitoa. Taleitaka vakalevu noqu rawa ilavo vakarawarawa tu ga va qori. Ena dua mada ga na siga au rawata kina e $10,000!

Au vakatalai mai na valeniveivesu ni itabagone niu yabaki 15. Ni sega na vanua meu tiko kina, au dau moce tu ga e gaunisala, vanua ni gade, se nodra vale eso keimami veikilai.

Ra dau vaqaqai au vakalevu na ovisa niu dau lasulasu. E sega na yavu meu bala kina e valeniveivesu ni ka au volitaka era sega ni iyaya butakoci. Ia au totogitaki meu sauma na ilavo levu niu dau lasu, au lasutaka na kequ itukutuku, sega tale ga noqu laiseni ni volivolitaki. Au sega mada ga ni rere niu talai meu lai kumuna mai na nodra ilavo o ira na dau soli dinau ra qai lavaka vakasivia na tubu. E vakarerevaki na cakacaka qo, so na gauna ena vinakati meu vakadakai. So tale ga na gauna au dau cakacaka kei ira na ilala daubasulawa.

Au se qai yabaki 17 au sa rogoca na itukutuku ena iVolatabu. Qori ena gauna keirau sa mai tiko vata kina kei na dua na goneyalewa e se qai vulica  tiko na iVolatabu kei ira na iVakadinadina i Jiova. Ia au sega ni taleitaka na ivakaro vakaivolatabu me baleta na itovo savasava, au mani biuti koya, dewa tale vua e dua na yalewa keirau sa dau veibuku tiko.

Yaco na veisau ena gauna sa mai vuli tale ga kina na ikarua ni noqu itau kei ira na iVakadinadina! E veisautaka nona bula, au qoroya nona sa dau yalomalumalumu qai yalovosovoso. Au mani vakadonuya meu lako ena nodra soqoni na iVakadinadina i Jiova. Era vakaitovo ra qai yalovinaka na kidavaki au. Veibasai sara ga kei na bula au kila tu! Na gauna au tubu tiko kina, vaka meu sega ni dau taleitaki e vale, au sega gona ni vakila na loloma kei na veikauaitaki. Niu dau vinakata meu lomani, qori sara ga na ka era qai vakaraitaka vei au na iVakadinadina i Jiova. Au taleitaka nodra veisureti meu vuli iVolatabu.

A rairai vakabulai au na ka au vulica ena iVolatabu. Au se qai lalawataka tiko kei na rua noqu itokani me keitou lai butako me saumi kina noqu dinau ni veimauilavo e sivia na $50,000. Marau vakalevu niu sega ni lako! Ka ni rarawa ni rau lai butako na noqu itokani, dua e vesu, dua tale e mate.

Ni toso tiko noqu vuli, au raica ni levu sara na veiveisau e vinakati vei au. Kena ivakaraitaki, au vulica na ivakavuvuli ena 1 Korinica 6:10: “O ira na daubutako, daukocokoco, daumateni, dauveivakasewasewani, kei ira na dau kovea na ka, era na sega ni rawata na Matanitu ni Kalou.” Noqu wilika na tikinivolatabu qori, au luluvu niu vakasamataka na kequ ituvaki. Dodonu meu veisautaka sara ga noqu ivakarau ni bula. (Roma 12:2) Au dau voravora, yalokatakata, dau lasulasu tale ga.

Ia au vulica ena iVolatabu ni dauloloma o Jiova qai dau veivosoti. (Aisea 1:18) Au vakamasuti koya gona mai vu ni lomaqu me vukei au meu biuta na noqu bula makawa. Ena nona veivuke ga au rawa kina ni veisau vakamalua. Dua na veisau levu na neirau sa vakalawataka na neirau bula vakawati kei na noqu itau.

Au sa yabaki 24 tiko ena gauna qori, sa tolu tale ga noqu isolisoli. Au vinakata e dua na cakacaka meu kua tale ni veidabui tiko kina. Ia au sega ni vuli vinaka, sega tale ga ni dua na ivola ni cakacaka e tu vei au. Au vakamasuti Jiova tale, au lai vaqara cakacaka sara. Au vakaraitaka vei ira eso na boso niu via veisautaka noqu bula, meu cakacaka vakadodonu qai dina ena ka au cakava. So na gauna au vakamacalataka niu vuli iVolatabu tiko, au saga tale tiko ga meu dua na lewenivanua vinaka. Levu era vakasukai au. Dua na gauna au qai talaucaka na noqu bula e liu vei koya e dau vakatarogi ira na lai kere cakacaka yani, e mani kaya: “Au sega ni kila na cava meu na solia kina vei iko na cakacaka qo, ia au sa na vakacakacakataki iko mada ga.” Au vakabauta ni sa saumi na noqu masu. Yaco na gauna me keirau papitaiso vakaveiwatini.

Vu ni noqu se bula tiko nikua na noqu muria na ivakavuvuli vakaivolatabu kei na bula vaKarisito. Dua tale ga noqu vuvale mamarau. Savasava noqu lewaeloma niu vakadeitaka ni sa vosoti au o Jiova.

Sa sivi qo e 14 na yabaki na noqu veiqaravi tiko vakatabakidua meu veivakavulici ena iVolatabu, sa mai tomani au tale ga o watiqu. Ena loma ni 30 na yabaki sa sivi, au marautaka na noqu vakavulica e le 22 noqu itokani vakacakacaka mera mai sokaloutaki Jiova tale ga. Au se dau lako tiko ga ena sitoa, ia au sega ni lai veivakaisini me vaka e liu. Au sa dau lai tukuna ga noqu vakabauta. Au via vakamacalataka vei ira na inuinui totoka me baleta na vuravura vou, nira na sega kina na dau lasulasu.—Same 37:10, 11.