KENA ISAU VAKAIVOLATABU: “Sa voleka mai na gauna mera rogoca kina na domona [Jisu] o ira kece na tu ena ibulubulu nanumi mera tucake mai.”—Joni 5:28, 29.

E parofisaitaka o Jisu nira na lala na iBulubulu ena dua na gauna e se bera mai ni sa veiliutaki o koya ena Matanitu ni Kalou. E nanuma lesu o Fernando sa cavuti oti mai: “Au kurabui ena imatai ni gauna au wilika kina na Joni 5:28, 29. Au lomadei me baleta na veigauna se bera mai, donu tale ga noqu rai.”

Ena gauna makawa, a kila tiko na turaga yalodina o Jope ni na vakaturi koya tale na Kalou ke mate. E taroga: “Ke mate e dua na tamata, ena bula tale?” E sauma ena nuidei: “Au na wawa tiko ena siga kece sa loku tu vei au [ena iBulubulu] me yacova niu sa vakacegui. Oni na kaci mai, au na rogo yani.”—Jope 14:14, 15.

E kila vinaka tu na ganei Lasarusa o Maca na veivakaturi. E kaya vua o Jisu ena gauna e mate kina o Lasarusa: “Ena tucake tale na ganemu.” E sauma o Maca: “Au kila ni na tucake tale ena gauna ni veivakaturi ena iotioti ni siga.” Sa qai kaya vua o Jisu: “O yau na vu ni veivakaturi kei na bula. O koya e vakaraitaka ni vakabauti au, ke mani mate, ena bula tale.” (Joni 11:23-25) Oti e vakaturi Lasarusa sara o Jisu! Na italanoa veivakurabuitaki qori e ivakaraitaki lailai ga ni veika lelevu ena yaco ena gauna se bera mai. Vakasamataka mada na gauna ya, ni na vakayacori na veivakaturi va qori e vuravura raraba!

KENA ISAU VAKAIVOLATABU: E vakamacalataki ena Vosa ni Kalou ni duidui nona vakaturi o Jisu ni vakatauvatani kei ratou na le walu tale e volaitukutukutaki ena iVolatabu. Eratou a bula tale tiko e vuravura na le walu qori. Ia eda wilika ena nona vakaturi o Jisu: “O Jisu Karisito . . . sa tiko o koya ena ligaimatau ni Kalou, ni gole i lomalagi.” (1 Pita 3:21, 22)

Vakacava, ena vakaturi duadua ga o Jisu i lomalagi? A tukuna taumada vei ratou nona yapositolo: “Keu lako meu vakarautaka e dua na tikina me nomudou, au na lesu tale mai meu kauti kemudou, mo dou tiko tale ga ena vanua au tiko kina.”—Joni 14:3.

A gole o Jisu i lomalagi, lai vakavakarau tiko me yacova nodra gole tale ga yani eso na nona tisaipeli. Na kedra iwiliwili taucoko na lai bula e lomalagi e  144,000. (Vakatakila 14:1, 3) Na cava era na lai cakava e lomalagi na imuri i Jisu qori?

E dua na itavi levu era vakacolati kina! E kaya na iVolatabu: “Era marau, era yalosavasava o ira na wili ena imatai ni veivakaturi, ena sega ni kaukaua vei ira na ikarua ni mate, ia era na bete ni Kalou kei Karisito, era na veiliutaki vakatui vata kei koya me 1,000 na yabaki.” (Vakatakila 20:6) O ira na vakaturi qo era na tui era bete tale ga kei Karisito mera veiliutaki e vuravura.

KENA ISAU VAKAIVOLATABU: E volaitukutukutaki ena iVolatabu na vosa qo ni yapositolo o Paula: “Au nuitaka na Kalou me vaka era nuitaka tale ga o ira qo, nira na vakaturi mai na yalododonu kei ira na sega ni yalododonu.”—Cakacaka 24:15.

O cei era wili ena ilawalawa e kaya o Paula nira “yalododonu”? Dikeva mada e dua na kena ivakaraitaki. A tukuni vua na turaga yalodina o Taniela ena gauna sa voleka tiko kina ni mate: “O na vakacegu ia o na tu ena nomu ivotavota ena icavacava ni gauna.” (Taniela 12:13) Ena vakaturi e vei o Taniela? “O ira na yalododonu era na taukena na vuravura, era na qai bula tawamudu kina.” (Same 37:29) E parofisaitaka o Jisu: “Era marau na yalomalua, nira na taukena na vuravura.” (Maciu 5:5) Ena vakaturi o Taniela kei na so tale na turaga vaka kina na marama yalodina mera bula tawamudu e vuravura.

O cei era wili ena ilawalawa e kaya o Paula nira “sega ni yalododonu”? Qo o ira na vica vata na bilioni era bula ra qai mate, levu vei ira era sega sara ga ni bau kila se mera bulataka na ivakavuvuli dina vakaivolatabu. Nira sa vakaturi, era na qai rawa ni kilai Jiova * kei Jisu, ra vakaraitaka tale ga nodra lomani rau. (Joni 17:3) O ira na yalodina ni qarava na Kalou era na rawata na bula me vaka ga na dede ni bula ni Kalou—me tawamudu.

KENA ISAU VAKAIVOLATABU: Na Kalou “ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.” (Vakatakila 21:4) “Era na tara vale era na tiko kina, era na tea na loganivaini era na kania na vuana.”—Aisea 65:21.

Vakasamataka mada na mataqali bula qori, vakauasivi ni o sa na marautaka kei ira na nomu itokani voleka era vakaturi! Ia o na vakadeitaka vakacava ni na vakayacori dina na veivakaturi?