“NA CAVA e yacovi au kina qo? Na cava e vakatara kina na Kalou?” E lomatarotarotaka qori o Sidnei, e yabaki 24 mai Brazil. A mavoa vakacalaka ena vanua ni vakasisisi ena tobu ni sili, sa mani vakaidabedabe qiqi tu ga kina.

Eso era dau rarawataka na Kalou nira sotava na vakacalaka, tauvimate, mate e dua era dau lomana, leqa tubukoso kei na ivalu. E dau yaco ga qori. A sotava veitaravi na leqa o Jope, na peteriaki a bula ena gauna makawa. E beitaka na Kalou ena nona kaya: “Au tagi yani ni kere veivuke, oni sega ga ni rogoci au, niu tucake, oni wanonovi au ga mai. Oni sa veisau moni vakalolomataki au, oni vorati au ena kaukaua taucoko ni ligamuni.”—Jope 30:20, 21.

E sega ni kila o Jope o cei e vakavuna nona leqa, se cava e vakatarai kina me yacovi koya qori. Ia na iVolatabu e vakamatatataka na vuna kei na ka meda cakava nida sotava na leqa va qori.

E kaya na iVolatabu me baleta na Kalou: “E uasivi nona cakacaka, ni dodonu na nona sala kece. E Kalou yalodina, e sega vakadua ni lewacala, e yalododonu qai daudina o koya.” (Vakarua 32:4) Ke “yalododonu qai daudina” na Kalou, ena sega ni nona inaki meda rarawa, se me vakadodonutaki keda se vakasavasavataki keda ni vakatara meda sotava na leqa.

E kaya tale ga na iVolatabu: “Ni vakatovolei e dua me kua ni kaya: ‘E vakatovolei au na Kalou.’ Ni sega ni vakatovolei rawa na Kalou ena ka ca, e sega tale ga ni vakatovolea e dua o koya.” (Jemesa 1:13) E tukuni ena iVolatabu ni uasivi na itekitekivu ni bula e vakalougatataki keda kina na Kalou. A vakarautaka vei rau na imatai ni noda itubutubu o Atama kei Ivi na itikotiko totoka, na veika kece me rau bula kina, kei na cakacaka yaga. E kaya vei rau na Kalou: “Drau vakawa, mera le levu mai, drau vakasinaiti vuravura, drau vakamalumalumutaka.” E sega sara ga na vuna me rau rarawataka kina na Kalou.—Vakatekivu 1:28.

Ia nikua sa sega ni uasivi na noda bula. Laurai ena ivolatukutuku ni kawatamata ni sa qai levu ga na leqa eda sotava. E dina kina na ka e tukuni qo: “Nira vutugu ra qai rarawa tu na kabuli kece me yacova mai qo.” (Roma 8:22) Na cava e yaco?

Meda kila na vu ni noda rarawa, ena vinaka meda lesu ga ena kena itekitekivu. A temaki Atama kei Ivi e dua na agilosi talaidredre, e qai vakatokayacataki me o Setani na Tevoro. A vakaroti rau na Kalou me rau kua ni kania na “vunikau e kilai kina na ka vinaka kei na ka ca” ia qai uqeti rau o Setani me rau cata na ivakaro qori ni Kalou. E kaya na Tevoro vei Ivi ni rau na sega ni mate ke rau talaidredre vua na Kalou, e beitaka kina na Kalou ni dau lasulasu. E kaya tale ga o Setani ni burogotaka na Kalou vei ira na nona ibulibuli na dodonu mera digia na ka vinaka kei na ka ca. (Vakatekivu 2:17; 3:1–6) E vaka me tukuna tiko o Setani ni na vinaka noda bula ke sega ni liutaki keda na Kalou. E basika kina e dua na ile—E dodonu me veiliutaki na Kalou?

A dua tale na ile ni Tevoro. E kaya nida qarava tiko ga na Kalou meda rawaka kina. E kaya na Tevoro vua na Kalou me baleta na turaga yalodina o Jope: “Oni sega ni viribaiti koya moni taqomaki koya kina, na nona vale kei na ka kece e taukena? . . . Ia qo, dodoka mada na ligamuni qai vakarusa na ka kece e taukena, ena vosavakacacataki kemuni dina e matamuni.” (Jope 1:10, 11) E vosa tiko qori o Setani me baleti Jope, ia e vakaibalebaletaka tiko vei keda kece nida qarava tiko ga na Kalou meda rawaka kina.

Ena saumi mada vakacava na ile kece qori? Na Kalou vuku duadua ga o Jiova ena sauma vinaka na ile qori, eda na sega tale ga ni yalolailai kina. (Roma 11:33) E vakatara mera veiliutaki vakalailai na veimatanitu vakatamata me laurai kina se veiliutaki nei cei e cecere.

Na ituvaki ca kei vuravura nikua e vakadinadinataka  ni guce na veiliutaki vakatamata. E sega ni dua na vakacegu, veitaqomaki kei na marau e vakilai ena nodra veiliutaki, era vakacacana tale ga noda vuravura. E vakadeitaka ga na dina ni ka e tukuni ena iVolatabu: “E sega ni vu vua na tamata e lako tu me lewa na nona ilakolako.” (Jeremaia 10:23) Ia na nona veiliutaki na Kalou e vakadeitaki kina me tawamudu na noda bula sautu, marau kei na noda tiko vinaka, ni qori sara ga na inaki ni Kalou.—Aisea 45:18.

Ena vakayacori ga vakacava nona inaki na Kalou me baleti keda? E vakavulici ira nona imuri o Jisu mera masuta: “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.” (Maciu 6:10) Io ena vakaotia na Kalou na veika rarawa eda vakila tu ena nona gauna lokuci ni vakayagataka na nona Matanitu. (Taniela 2:44) Sa na sega na bula dravudravua, tauvimate kei na mate. E kaya na iVolatabu ni na “vakabula” na Kalou “na dravudravua e tagi ni kere veivuke.” (Same 72:12-14) E yalataka na iVolatabu me baleti ira na tauvimate: “Ena sega ni kaya e dua na lewenivanua: ‘Au tauvimate.’” (Aisea 33:24) E kaya o Jisu me baleti ira na mate e nanumi ira tu na Kalou: “Ni sa voleka mai na gauna mera rogoca kina na domona o ira kece na tu ena ibulubulu nanumi mera tucake mai.” (Joni 5:28, 29) Sa bau veivakacegui dina na vosa ni yalayala qori!

Sa oti e rauta ni 17 na yabaki nona vakacalaka o Sidnei, e tukuni ena itekitekivu ni ulutaga qo, e kaya: “Au sega vakadua ni beitaki Jiova na Kalou ena noqu vakacalaka, ia au a rarawataki koya taumada. So na siga au dau yalolailai sara ga, au dau tagi niu vakasamataka na kequ ituvaki. Ia au vulica ena iVolatabu ni sega ni itotogi ni Kalou na noqu vakacalaka. E kaya na iVolatabu ‘ni dau yacovi keda kece na gauna kei na ka e sega ni namaki.’ Na noqu dau masuti Jiova kei na noqu wilika eso na tikinivolatabu e dau vakayaloqaqataki au vakayalo, e donu tale ga kina noqu rai.”—Dauvunau 9:11; Same 145:18; 2 Korinica 4:8, 9, 16.

Ni yacovi keda eso na ka, e rawa ni vakaseavutaka na noda rarawataka na Kalou na noda vakasamataka na vuna e vakatara kina o koya na veika rarawa, kei na nona sa vakarau muduka. Eda vakadeitaka ni “na vakaicovitaki ira tale ga era vakasaqarai koya ena yalogu.” Eda na vakacegui dina nida vakabauti koya kei Luvena.​—Iperiu 11:6; Roma 10:11.