NA RAI NI IVOLATABU
Vakalutu
E muduki dole e veiyabaki nodra bula e tini vakacaca na milioni na gone era se buketetaki tiko, qori e sivia na kedra iwiliwili na lewenivanua ena levu na matanitu.
E bibi na nona digidigi e dua se na kena vakayacori na ka e dodonu?
KA ERA TUKUNA ESO
Era dau vakalutu e levu na yalewa ena vuku ni leqa vakailavo, leqa vakavuvale, cakacaka, era via galala mera tomana nodra vuli, se ra sega ni vinakata mera itubutubu le dua. Eso tale era vakabauta ni cala na vakalutu, qai vakaraitaka kina e dua na yalewa bukete na veidabui.
KA E KAYA NA IVOLATABU
E ka talei vua na Kalou na bula, vakabibi na noda bula na tamata. (Vakatekivu 9:6; Same 36:9) Na ivakavuvuli qori e baleti ira na gone era se tiko ena katonigone, e inaki ni Kalou mera karoni e keri me yacova nodra sucu. E kaya e dua na dauvola iVolatabu: “Oni sogolati au ena katonigone i tinaqu. Na matamuni mada ga e raici au niu se kunekunetaki tiko, sa volai tu ena nomuni ivola na veisiga era buli tiko kina na veitikiqu kece.”—Same 139:13, 16.
E laurai tale ga na rai ni Kalou me baleta na gone e se bera ni sucu ena Lawa a soli vei ira na Isireli kei na noda lewaeloma soli vakalou. E tukuni ena Lawa me isau ni bula na bula. Ena totogi mate o koya e vakamavoataka na yalewa bukete qai mate na gone e se bera ni sucu. (Lako Yani 21:22, 23) Ia era na dikeva e liu na turaganilewa na inaki kei na ituvaki e yaco kina na leqa.—Tiko Voli Mai na Lekutu 35:22-24, 31.
E soli tale ga vei keda na tamata na lewaeloma. Ni muria e dua na yalewa na ka e tukuna nona lewaeloma qai rokova na bula i luvena e se bera ni sucu, ena savasava nona lewaeloma. * Ia ke sega ni muria, ena rawa ni vakaleqai koya se beitaki koya tale nona lewaeloma. (Roma 2:14, 15) E laurai ena levu na vakadidike ni o ira na yalewa era vakalutu e rawarawa mera nuiqawaqawa qai lomaocaoca.
Vakacava ke sega ni namaka e dua na yalewa me bukete qai leqataka me susuga vakacava na luvena? E yalataka na Kalou vei ira na yalodina ni muria nona ivakatagedegede: “Oni na yalodina vei koya e yalodina, ena tabucala na nomuni valavala vua na tamata e tabucala.” (Same 18:25) E kaya tale ga na iVolatabu: “Ni taleitaka na lewadodonu o Jiova, ena sega ni biuti ira na nona tamata yalodina.”—Same 37:28.
“E vakadinadina vei ira na nodra lewaeloma, na veika tale ga era vakananuma e beitaki ira se vakadonui ira.”
—Roma 2:15.
Vakacava ke o vakalutu ena dua na gauna sa oti?
KA ERA TUKUNA ESO
E kaya o Ruci e dua na itubutubu le dua: “Au sega ni rawa ni qarava tale e dua na gone, ni sa tolu tu na luvequ. Ia na gauna au vakalutu kina, au kila niu cakava e dua na ka vakadomobula.” * Vakacava ena vosoti Ruci na Kalou ena ka e cakava?
KA E KAYA NA IVOLATABU
E vakatotomuria o Jisu na rai ni Kalou ni a kaya: “Au sega ni lako mai meu kacivi ira na yalododonu, meu kacivi ira ga na ivalavala ca mera veivutuni.” (Luke 5:32) Ke da cala bibi mada ga, ena tu vakarau na Kalou me veivosoti ke da rarawataka dina na noda cala qai veivutuni se kerea nona veivosoti. (Aisea 1:18) E kaya na Same 51:17: “Na uto e kavoro qai bibivoro, kemuni na Kalou, oni na sega ni cata.”
Ke masu ena yalomalumalumu vua na Kalou o koya e veivutuni, ena savasava nona lewaeloma qai vakila na vakacegu ni vakasama. E kaya na Filipai 4:6, 7: “Na ka kece me vakaraitaki vua na Kalou ena masu kei na kerekere salavata kei na vakavinavinaka, ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.” * E vakila na vakacegu o Ruci ni vulica na iVolatabu qai talaucaka na lomana vua na Kalou. E kila tale ga ni tu vua na Kalou “na veivosoti dina.”
“E sega ni totogitaki keda [na Kalou] me vaka na noda ivalavala ca, se me sauma vei keda na ka e dodonu me isau ni noda cala.”
—Same 103:10.
^ para. 8 Ke rivarivabitaki mada ga na bula nei tina se o gone, sega ni ulubale ya ni kena vakayagataki na wainimate se so tale na veiqaravi vakavuniwai me muduki dole kina na bula ni gone se buketetaki tiko. Ia ke yaco e dua na leqa ena gauna ni vakasucu qai vinakati me vakatulewataki me bula o tina se o gone, rau na vakatulewa sara ga ena ituvaki qori na veiwatini. E tu tu yadua me qai caka na vakatulewa va qori ni sa totoka na veiqaravi vakavuniwai ena levu na vanua.
^ para. 12 Sa veisau eso na yaca.
^ para. 14 Ena veivakacegui tale ga na inuinui ni veivakaturi. Raica na ulutaga “Taro na Dauwiliwili” ena Vale ni Vakatawa 15 Epereli, 2009, e vakamacalataki kina eso na ivakavuvuli vakaivolatabu me baleta nona vakaturi na gone e mate ni bera ni sucu.
Rawa ni o Wilika Tale ga
SAUMI NA TARO VAKAIVOLATABU
Cava e Kaya na iVolatabu me Baleta na Vakalutu?
Tekivu vakacava nona tamata bula e dua? Ena vosota na Kalou ke dua na tina e vakalutu?
