“BIBI ENA NODA BULA VAKAYALO . . . NA INUINUI,” e kaya na ivola Hope in the Age of Anxiety. “Ena vakataudeitaki keda nida lomabibi, galili, se rere.”

E vakamacalataki ena iVolatabu ni bibi na inuinui ena noda bula. E veivakasalataki tale ga meda qarauna se o cei eda nuitaka ni kaya ena Same 146:3: “Kua ni nuitaki ira na turaga se dua na luve ni tamata, nira sega ni kauta mai na veivakabulai.” E ka vakayalomatua meda nuitaka na Dauveibuli ni tu vua na kaukaua me vakayacora na nona yalayala kece. E tawayaga na vakararavi vua na tamata me veivakabulai. Raica mada eso na ka e yalataka tu na Dauveibuli.

OTI NA VEIKA CA; VAKACEGU TAWAMUDU O IRA NA YALODODONU: E kaya na Same 37:10, 11: “Malua mada vakalailai, sa na sega vakadua na daucaka ca . . . Ia era na taukena na vuravura na yalomalumalumu, era na kunea na marau vakasakiti ena levu ni vakacegu.” E kaya tale na tikina e 29 ni “o ira na yalododonu . . . era na qai bula tawamudu” e vuravura.

OTI NA IVALU: O “Jiova . . . ena mai vakaotia . . . na ivalu e vuravura taucoko. E musuka o koya na dakaititi qai vorolaka na moto, e vakama na qiqinivalu ena bukawaqa.”—Same 46:8, 9.

OTI NA TAUVIMATE, RARAWA, SE MATE: “E sa tiko vei ira na tamata na vale ni Kalou . . . Ena qusia tani . . . na wainimata kece mai na matadra, sa na sega tale na mate, na lolosi, na tagiyaso, kei na mosi.”—Vakatakila 21:3, 4.

LEVU NA KAKANA: “Ena levu na covuata e vuravura, ena vuabale ena dela ni veiulunivanua.”—Same 72:16.

VEILIUTAKI GA NA MATANITU I KARISITO: “E soli vua [Jisu Karisito] na lewa, na lagilagi, kei na matanitu mera qaravi koya kece na lewe ni veivanua, na veimatatamata, kei na duivosavosa. Na nona lewa na lewa e sega ni mudu, ena sega ni oti, kei na nona matanitu ena sega ni vakarusai.”—Taniela 7:14.

Eda kila vakacava ni na yaco dina na yalayala qori? A vakaraitaka o Jisu ena veika e cakava ni se bula e vuravura ni veiganiti nona lumuti me Tui. A vakabulai ira na tauvimate, vakani ira na dravudravua, a vakaturi ira tale ga na mate. Na ka vinaka duadua e cakava, e veivakavulici ena sala meda marautaka tawamudu kina na vakacegu kei na duavata. A parofisaitaka tale ga o Jisu na veika ena yaco ena gauna se bera mai, kei na ivakatakilakila ena kilai kina ni sa vakarau cava na ituvaki qo.

E sega ni vinaka na veika e parofisaitaka o Jisu ni na yaco ena iotioti ni veisiga, ena sega ni vakilai kina na vakacegu kei na sautu! Ni cavuta na ivakatakilakila ni “ivakataotioti ni veika vakavuravura,” e kaya ni na yaco e veiyasa i vuravura na ivalu, leqa ni kakana, matedewa, kei na uneune kaukaua. (Maciu 24:3, 7; Luke 21:10, 11; Vakatakila 6:3-8) A kaya tale ga o Jisu: “Ni tubu na ivalavala tawadodonu, ena batabata na nodra loloma e levu.”—Maciu 24:12.

E vakamacalataka vinaka e dua tale na dauvola iVolatabu na sala era vakaraitaka kina e levu ni batabata nodra loloma. E kaya na 2 Timoci 3:1-5 ni levu era bula ena “iotioti ni veisiga” era na lomani ira ga, lomana na ilavo, kei na marau. Era na qaciqacia qai voravora. Sa na yali na veilomani vakaveiwekani, era na talaidredre na gone vei ira nodra itubutubu. E levu tale ga ena vakarairai nodra lotu.

Vakadeitaka na leqa kece qori ni sa voleka na icavacava. E vakadinadinataka tale ga ni sa vakarau vakilai na veika vinaka ena veiliutaki ni Matanitu ni Kalou. A cavuta o Jisu na veivakadeitaki qo ena nona parofisai me baleta na iotioti ni veisiga: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”—Maciu 24:14.

Era sa vakasalataki rawa ena itukutuku vinaka qori na daucaka ca, qai vakadeitaka vei ira na yalododonu ni sa vakarau vakilai na veika vinaka. Ke o via kila e levu tale na ka, raica na waqana e muri ni mekesini qo.