E RAWA NI TUDEI NA VURAVURA?
Veikau
ESO na saenitisi era vakatauvatana na veikau me vaka na yatevuso e vukea na noda bula tiko. Na vuna? Na veikau e vakasavasavataka na cagi me vaka na yatevuso. E vakayagataka na veikau na carbon dioxide e rawa ni vakaleqai keda, qai kaburaka na oxygen meda ceguva. E rauta ni 80 na pasede na kau kei na manumanu era bula e veikau. Ena sega ni rawa gona na bula ke sega na veikau.
Leqataki na Veikau
E vica vata na bilioni na kau e musu e veiyabaki me rawa ni caka kina na teitei. Tekivu mai na veiyabaki ni 1940, sa musu e veimama na veikauloa e veiyasa i vuravura.
Ni musu na veikau ena vakaleqai na manumanu, kei na kau kece e bula kina.
Buli na Vuravura me Tudei
E laurai ena so na vanua e musu kina na kau, nira tubu tale qai tete ena dua na vanua levu. Wale tiko ga qo, dua na ka nodra qoroya na dau dikeva na iyaubula na totolo ni kena tubu tale na kau ena vanua e musu, e bulabula tale ga. Qo eso na kena ivakaraitaki:
-
Era vakadikeva tiko na dauvakadidike na vanua e musu kina na veikau me caka kina na teitei, oti e sega ni mani vakayagataki. E caka qori ena 2,200 na vanua ena Yasayasa vakaMerika kei na Ra kei Aferika, qai laurai ni bera mada ga na tini na yabaki sa tubu tale kina na veikau bulabula.
-
Era kaya na dauvakadidike ena mekesini na Science, ni na rawa ni tubu tale na veikau ena loma ni 100 na yabaki qai lesu tale ena kena ituvaki e se bera ni musu kina.
-
Wale tiko ga qo, era dikeva na saenitisi e Brazil na totolo ni kena tubu ga vakai koya na veikau ni vakatauvatani kei na kena e tei.
-
E kaya na National Geographic me baleta na vakadidike qori: “Era marau nira raica ni sega ni vinakati me tei tale na kau.” Ena loma ga ni lima na yabaki, e tubu tale ena vanua e vakatovotovotaki qori “e levu na kau e kilai tani ena vanua ya.”
Sasaga me Wali na Leqa
E sagai tiko e veiyasa i vuravura me taqomaki na veikau, me vakalesui tale ga na kena sa vakacacani. E kaya gona na Matabose kei Vuravura ni sa “vakalailaitaki e veiyasa i vuravura na musu kau ena 50 na pasede” ni vakatauvatani kei na kena e musu ena 25 na yabaki sa oti.
Ia e levu tale na ka e vinakati me rawa ni taqomaki na veikau. E kaya e dua na isoqosoqo na Global Forest: “Ena vica na yabaki sa oti sa qai vakacacani ga vakalevu na veikau ena veivanua katakata.”
Era rawata tiko e vica vata na bilioni na ilavo na kabani ni musu kau vakaveitalia. Qori e dua na vuna e vakacacani kina na veikau ena veivanua katakata.
Era raica na dau dikeva na veikau me musu vakamatau na kau lelevu qai tei eso tale
Vuna Meda Nuidei Kina—Ka e Kaya na iVolatabu
“E vakatubura na Kalou o Jiova a mai na qele na vunikau kece ga e totoka na kena irairai qai vinaka me laukana.”—Vakatekivu 2:9.
E bulia na veikau na Dauveibuli me rawa ni tubu tale, qai yaga vei keda na kawatamata. E vinakata me maroroya qai taqomaka na veikau, kei na ka bula kece e tu kina.
E kaya na iVolatabu ni na vakaotia na Kalou na kena vakacacani na vuravura kei na veika bula kece era tu kina. Raica na ulutaga, “Yalataka na Kalou ni na Tudei na Vuravura,” ena tabana e 15.
a O Jiova na yaca ni Kalou.—Same 83:18.
