Cava sa Sega Kina na Veidokai Vei Ira Eso Tale?
VUNA MO DOKAI IRA KINA ESO TALE
Nida veidokai ena sega ni vakalevutaka na leqa.
-
E kaya na iVolatabu: “Na vosa vakayalovinaka e vakaseavutaka na cudru, ia na vosa kaukaua e vakatubura na cudru.” (Vosa Vakaibalebale 15:1) Io, ena vakalevutaka ga na leqa nida sega ni veidokai ena ka eda tukuna se cakava, ena rawa ni tini ca sara.
-
E kaya o Jisu: “Ni na cavuta ga na gusumudou na ka e sinai tu e lomamudou.” (Maciu 12: 34) Nida tauca na vosa e veibeci, ya e vakaraitaka sara ga nida vakaduiduitaki ira tiko eso tale ena vuku ni duidui ni vanua era cavutu mai kina, matatamata, yavusa, se matanitu.
Ena dua na vakadidike e caka ena 28 na vanua era vakatarogi kina e sivia ni le 32,000. E 65 na pasede vei ira qori era kaya ni ca duadua na itovo ni tamata ena gauna qo.
KA O RAWA NI CAKAVA
Ke o tiko e koronivuli se vanua ni cakacaka dokai ira tiko ga na tamata kece, ke oni sega mada ga ni duavata ena so na ka. Saga mo kila eso na ka drau rawa ni duavata kina. O na sega kina ni veivakalewai.
Cakava vei ira eso tale na ka o vinakata me caka vei iko. Ke o dau yalovinaka qai caka dodonu vei ira eso tale, qori tale ga na ka era na cakava vei iko.
Mo dau veivosoti. Ni o cakava qori ena sega ni nanumi ni ca nomu inaki, ia o sa raibaleta tiko kina na vosa kei na itovo mosimosi.
SALA ERA VAKARAITAKA KINA NA VEIDOKAI NA IVAKADINADINA I JIOVA
Era dau vakaraitaka na veidokai na iVakadinadina i Jiova ena nodra itikotiko kei na vanua ni cakacaka.
Era dauveivakavulici wale ena iVolatabu vei ira na tamata kece, ia era sega ni dau usuraka na nodra vakabauta se rai vei ira eso tale. Era saga ga mera muria na ivakasala ena iVolatabu nira wasea na itukutuku vinaka “ena yalomalua kei na veidokai dina.”—1 Pita 3:15; 2 Timoci 2:24.
Era sega ni dau veivakaduiduitaki, ia era ciqomi ira ga na dui matatamata era gole yani ena nodra soqoni, ra qai via vulica na iVolatabu. Era saga mera dauveivosoti qai “dokai ira eso tale.”—1 Pita 2:17, New International Version.
Era dokai ira na vakailesilesi ni matanitu ena vanua era tiko kina. (Roma 13:1) Era dau muria na lawa, qai sauma tale ga na ivakacavacava. Era tawaveitovaki ia era doka na nodra vakatulewa eso tale me baleta na veika vakapolitiki.