VEI IRA NA ITUBUTUBU
6: Veivakadodonutaki
CAVA E OKATI KINA?
Na veivakadodonutaki e rawa ni kena ibalebale na veidusimaki kei na veivakavulici. E okati kina nona vakadodonutaki e dua na gone ke cakava na ka ca. Ia levu na gauna e vakaibalebaletaka na nona tuberi na gone ena ivakavuvuli yaga ena vukei koya me vakatulewa vinaka, me kua kina ni cakava na ka ca.
VUNA E BIBI KINA NA VEIVAKADODONUTAKI
Ena veiyabaki sa sivi, sa sega ni dau caka na veivakadodonutaki ena vuvale. Era nanuma na itubutubu nira na beci ira na gone ke ra vakadodonutaki. Ia na itubutubu yalomatua ena kotora na lawa veiganiti qai vakavulici luvena me muria.
“E dodonu mera kila na gone na ka mera cakava kei na ka mera kua ni cakava, ni na vinaka kina na nodra bula ena veigauna se bera mai. Ke ra sega ni vakadodonutaki na gone, era na vaka na waqa e sega na kena iuli, e soko tu ga vakaveitalia, qai rawa ni luvu.”—Pamela.
KA O RAWA NI CAKAVA
Dei ena ka o vakatulewataka. Ke sega ni via muria o luvemu na ka o tukuna, vakadodonutaki koya me kila na ca ni talaidredre. Ia vakavinavinakataki koya ke talairawarawa ena ka o kaya.
“Au dau vakacaucautaki ratou na luvequ ena nodratou talairawarawa ni sa sega ni laurai na itovo qori ena gauna qo. Na veivakacaucautaki e dau vakarawarawataka nodratou ciqoma na veivakadodonutaki.”—Christine.
IVAKAVUVULI VAKAIVOLATABU: “Na ka kece e kaburaka e dua ena tamusuka tale ga.”—Kalatia 6:7.
Yalorawarawa. Na veivakadodonutaki e tau e dodonu me veiganiti kei na nona yabaki ni bula o luvemu kei na cala e cakava. Ena yaga vakalevu na veivakadodonutaki ke salavata kei na cala e caka. Kena ivakaraitaki, ke vakasabusabutaka na talevoni, rawa ni kau laivi vua se yalani nona vakayagataka. Ia kua ni dau cudru totolo ena so na ka lalai sara e rairai votivoti ga vei iko.
“Au dau saga meu kila ke nakita nona talaidredre o luvequ se vakatulewa cala ga. Eso na cala e cakava o gone sa na veiganiti sara ga me caka kina e dua na ka me rawa ni muduka. Ena yasana adua, ena rairai vinakati ga me vakaraitaki vua na nona malumalumu.”—Wendell.
IVAKAVUVULI VAKAIVOLATABU: “Ni kua ni vakacudrui ira na luvemuni, de ra yalolailai kina.”—Kolosa 3:21.
Veivakadodonutaki vakayalololoma. Ena rawarawa me ciqoma o gone qai muria na veivakadodonutaki ke kila ni ivakaraitaki ni nona loloma na itubutubu.
“Ni cala na luvei keirau tagane, keirau dau tukuna vua ni keirau marautaka na vakatulewa vinaka kece e sa vakayacora oti. Keirau vakamacalataka vua ni na sega ni vakacacana na kena irogorogo na nona cala ke cakava na veisau e gadrevi. Keirau na tu vakarau tale ga me keirau vukei koya.”—Daniel.
IVAKAVUVULI VAKAIVOLATABU: “Na loloma e vosovoso qai yalovinaka.”—1 Korinica 13:4.
Rawa ni o Wilika Tale ga
NA VALE NI VAKATAWA
Mo Vakadodonutaki Luvemu Vakacava?
E vakamacalataki ena iVolatabu e tolu na iwalewale yaga ni veivakadodonutaki.
YADRA!
Sa Vakacava tu na iTovo Nikua?
Vakacava se ra muria tiko ga na itubutubu nikua na ile a tukuni sara ena veiyabaki ni 1960?
YADRA!
Sala mo Vakavulici Luvemu iTabagone Kina
Na veivakavulici se veivakadodonutaki e kena inaki mera vuli kina na gone. E rawa ni vukei iko na ivakavuvuli vakaivolatabu mo vakavulici luvemu itabagone me talairawarawa, me kua ni dau be.
