5 Ena Oti na Rarawa?
Vuna e Bibi Kina
Ke tiko na vuna vinaka meda vakabauta ni na oti na rarawa, na inuinui qori ena vukei keda me donu noda rai me baleta na bula, donu tale ga noda rai me baleta na Kalou.
Vakasamataka Mada
Levu era via vakaotia na rarawa, ia e vakaiyalayala ga na ka era rawa ni cakava. Dikeva mada qo:
Dua na ka na levu ni wainimate era tu nikua, ia . . .
-
Dua na iwiliwili levu era mate ena vuku ni mate ni uto.
-
Vica vata na milioni era mate e veiyabaki ena vuku ni kenisa.
-
E vola o Dr. David Bloom ena ivola na Frontiers in Immunology: “Sega ni oti rawa na levu ni mate e tu nikua. Eso na mate e veitauvi tu vakabalavu, eso na mate vovou, eso sa oti ia era basika tale.”
Eso na matanitu e levu kina na ilavo, ia . . .
-
E vica vata na milioni na gone era mate e veiyabaki, e yaco vakalevu qori ena vanua dravudravua.
-
E vica vata na bilioni era tiko ena vanua e sega ni vinaka kina na ivakarau ni bula.
-
E vica vata na milioni e sega ni savasava na medra wai.
Levu nikua era kila tu na dodonu ni lewenivanua, ia . . .
-
E kaya e dua na ripote ni Matabose kei Vuravura, e levu era volitaki tamata vakatawadodonu ena veivanua kei na matanitu, “era sega ni kila na vakailesilesi na ka e yaco tiko, se sega vei ira na ivukevuke mera veilewaitaki kina na dauvolitaki tamata.”
MO KILA ESO TALE NA KA
Sarava ena jw.org na vidio, Na Cava na Matanitu ni Kalou?
Ka e Kaya na iVolatabu
E kauaitaki keda na Kalou.
E kila vinaka tu noda mosi kei na rarawa.
“[Na Kalou] e sega ni beca se sevaka na rarawa i koya e vakaloloma tu, e sega ni vunia na matana vua. Ni tagi me kere veivuke vua, e rogoca o koya.”—SAME 22:24.
“Biuta vua na nomuni lomaocaoca kece, ni kauaitaki kemuni o koya.”—1 PITA 5:7.
Dua na siga ena oti na rarawa.
E yalataka na iVolatabu ni sa vakarau vakayacori na inaki ni Kalou.
“Na Kalou ena . . . qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.”—VAKATAKILA 21:3, 4.
Ena vakaotia na Kalou na ka e vakavuna tiko noda rarawa.
Ena cakava qori ni vakayagataka nona Matanitu, e kaya na iVolatabu ni tiko dina na matanitu qori.
“Ena vakarautaka na Kalou ni lomalagi e dua na matanitu ena sega sara ni vakarusai. Ena sega ni soli na matanitu qo vua e dua tale na tamata. . . . Ena tu ga me tawamudu.”—TANIELA 2:44.
