E Rawa ni Vakaleqa Vakacava na iYaya Vakalivaliva Nomu Veitokani?
Se mani vakacava na yawa ni vanua eda tu kina, eda se rawa ga ni veitaratara kei ira eso tale nida text, imeli, video call, se vakayagataka na sala ni veikilai ena internet (social media). Io, qori era ivukevuke yaga.
Ia eso, nira vakayagataka vakalevu qori mera veitokani vinaka kina, era . . .
-
sa sega ni qai kauaitaki ira dina na nodra itokani.
-
yalolailai.
-
nanumi ira ga.
KA MO KILA
VEIKAUAITAKI DINA
Noda kauaitaka dina e dua, ena vinakati kina noda gauna meda vakasamataki koya vinaka kei na kena ituvaki. Ia e sega ni rawarawa meda cakava qori ke da vakauitukutuku vei ira e levu, se sarava tiko na levu ni ka era biuta mai eso tale (posts).
Ke levu era vakauitukutuku mai vei iko, ena rawa ni vaka tu e dua na icolacola nomu sauma lesu, de dua o na sauma tu ga me rawa. O sega ni via vukea dina nomu itokani, o saga tiko ga mo sauma lesu na itukutuku kece e vakau mai.
VAKASAMATAKA MADA: O na vakaraitaka vakacava ni o ‘kauaitaki’ ira dina na nomu itokani ni o vakauitukutuku vei ira?—1 PITA 3:8.
YALOLAILAI
E laurai ena dua na vakadidike ni levu era yalolailai nira sarava na veika e biu mai ena sala ni veikilai ena internet. Era kaya na dauvakadidike qori, ni noda sarava na kedra itaba eso tale kei na ka era cakava, e rawa nida “lai nanuma kina ni vakavucesa tu na noda bula.”
Nida sarava na veika marautaki era cakava eso tale, eda na rawa ni lai vakatauvatani keda kina. O na rawa ni nanuma ni sega ni marautaki na nomu bula me vakataki ira eso tale.
VAKASAMATAKA MADA: O na qarauna vakacava mo kua ni vakatauvatani iko kei ira eso tale ena sala ni veikilai ena internet?—KALATIA 6:4.
NANUMI IKO GA
E kaya e dua na qasenivuli ni so nona gonevuli era dau nanumi ira ga. Ena sala cava? Era veitokani ga kei ira era na rawaka kina. Na itokani va qori era dau via vakayagataki ira ga eso tale. Era vakayagataki ira nodra itokani me vaka na talevoni, ya nira golevi ira ga nira vinakata e dua na ka.
VAKASAMATAKA MADA: E laurai ena ka o biuta ena internet ni o dau veisisivi qai nanumi iko ga?—KALATIA 5:26.
KA MO CAKAVA
DIKEVI IKO VINAKA
Ni o lewa vinaka nomu vakayagataka na talevoni, tablet se kompiuta, o na rawa ni veitaratara tiko ga kei ira nomu itokani, oni na veivolekati tale ga.
IVAKAVUVULI VAKAIVOLATABU: “Na loloma . . . e sega ni kauaitaka ga na ka e baleti koya.”—1 KORINICA 13:4, 5.
Toqa se vola na ka o nanuma mo cakava.
-
Me levu na gauna meu veitalanoa sara ga kei ira noqu itokani (kua ni text tu ga se imeli)
-
Biuta vakatikitiki (se bokoca na rorogo ni) noqu talevoni niu veitalanoa tiko kei ira eso tale
-
Vakalailaitaka noqu sarasara ena sala ni veikilai ena internet
-
Meu dau vakarorogo vinaka nira vosa eso tale
-
Qirita e dua e sotava tiko na veika dredre
Rawa ni o Wilika Tale ga
YADRA!
O Cei na iTokani Dina?
Levu era vakadinata ni yaga na itokani vinaka. Rawa vakacava mo itokani vinaka? E vakamacalataki ena ulutaga qo e va na ivakavuvuli vakaivolatabu e rawa ni dusimaki iko.
RA TAROGA NA ITABAGONE
Na Cava Meu Kila me Baleta na Biu iTaba ena Internet?
O na vakatulewa vinaka vakacava me baleta na biu itaba ena internet?
YADRA!
Veidokai ni o Vakauitukutuku
Vakacava e veibeci ke o wilika na itukutuku e vakau mai vei iko ni drau se veitalanoa tiko kei na dua? Se veibeci ke mo kua ni wilika na itukutuku qori, ia mo tomana tiko ga nomudrau veitalanoa?
